CHRISTMAS BORUOKIN LUNG A MI'N LÊN
Covid-19 thlipui râwng tak kâra lêngin, hriet lo kârin November thla ei lo chuong kâi nawk dêr el ta a. Ei itûng êm êm hlak, Christmas nî ding chu thla khat lai chauin a mi dâi dan ta a nih. Christmas boruok rim a'n nam ṭan hmiei hmiei tâk leiin, lunglêng a kei tho a, lung hlui a'n lêng vawng vawng el.
Nipui hnawt hmangtu ṭhâl romei zâmin tlâng tin muol tin an bâwm zîng chuoi a. Sûn lalpa chu sûm zîngin sawt tak a hlie leiin inhnu êm êmin phak le inphalam hmêl tak putin sak tieng kâwl kûnga inthawkin a hung suok tût tût a. Ramhnuoi lalpa, sakeibaknei a hung inlang ta chun sa tinrêngin ṭiin an inrel hmang hlak ang hin, sûn lalpa, nisa a hung inlang ding chu hmu ngam lovin zîng ârasi la'n lang pheu pheu hai khawm chun inzain an inrel rûksan zo a, hmu ding an um ta nawh. Favâng thli chun inthli hieu hieuin thing hnahai chu dam te tein a hung sâwi hnîng del del a. Thuhriltuin "Iengkimin hunbi le tâwp hun an nei" a tî kha an hriet lei khawm chu ni chuong lovin, hna hluihai chun an hunbi a tawp tah tî hrein, hna tharhai tâ dinga hmun inkienin lungawi takin an ṭil thla ṭuk ṭuk a. Fûr tui lien khawmin tu hril hriet fahran khawm ngai lovin thlasik inlal hun a tlung ta tî hrein, a chan dinga ruota um chu sêl ngam lovin, inzâ takin Bay of Bengal tuipui tieng an liem thla dul dul a.
Fûr thlâi le thei ra chi tinrênghai khawmin an hunbi ruot a pêl tah tî hrein nipui phâta inhmu nâwk dingin inṭhena zâi an mi remsan ta a. Invawt le thokânghai khawmin an bu inhnik tak ran le mihriem thisen chunga zâ mi ngaipêkin, an hlapui "Thisen hlu thisen hlu" tia khuong le sekî leh inri bung bunga zâi rema zân tin tina an inkhâwmpui ko chu ṭumṭiek zâi rêlin, zalênna dâr an mi khâwng ripêk ta a. Vân ruotui khawmin Lal hung pieng ding hi lo hrein, thlasik sûng poa dingin châwl a la lâk hri a. Thlipui, kâwl inlep, riel le ṭêkhai khawmin châwl nî inser lo bîk chu thil inzakumah ngaiin winter vacation hmangah an lo liem thla ve bawk a. Chû ruol chun lampuia chirhak pawr inthluok dêk dûk hai khawmin thlasik leh an inhme naw tî hrie ni âwm hrimin an umna hmun chu inrang mangkhêngin an inkiengsan a, pilvutin chan ṭha chang inti fûtin invak surin an hmun ruok chu va hluopêkin, hritlâng khawsik the darna sin chu ṭhahnem ngai tak le kut zâng takin a va thaw ṭan ta nghâl a.
Sumdâwngtuhai khawmin thlasik dei hung inṭan ding chu lo hrein, nipui thuomhnawhai chu kilkâra hnaw lûtin, thlasik thuomhnaw lum tak tak el hai chu pholêng angin an dâwr tuolahai chun mî mit lâk thei dân ding takin an târ dawk têr tuor a. Christmas hmaa puonṭiek anga hlutna bo dêr, a thlâwn khawma mi tam takin an dit ta lo ding, kilkâr sawt tak el hluo el ta hai dâm chu hî Christmas nî hin, rângkachaka zuk inchang ta thut ang ziezângin a manhai chu babêl in sâng tawng vâng vâng khawpin an suksâng âwr âwr a. A'n vêt pâwl hlak hi ei lo tam nasa ngang el; a quality a ṭha le a ṭha naw khawm thlu lovin, a man tam tam kha a ṭha sâwnin inbak kei vâng vâng khawpin chang naw inlâuin ei la'n chûhla hlak a ni chu. A zawrtuhai hlak chun invêt an mi tî luotin ei hnung tieng a rûkin an mi lo nui êu tet tet a. An mi hlêm hlum vâng vâng a nih tî hmêl hre lovin an chungah ṭûl lo pui puiin lawmthu dâm ei la hei hril zui kuol vêl a. Ei invêtzie suklangna el chau a nih tî rêng ei hriet si nawh.
Christmas nî le kum thar lawm nî hlak chun a mihriem lungril thar si lovin ei thuomhnaw chau chu a sen inlâr ver vur a. Setanin a lo lawm luotin lo innui vur vur hlak dingin ka zuk ring chu tie. Hî nipui nia sa hme naw chu, mo lawm nia a monu ṭhang lo ang tluk hiela khingbâi le bâk ṭutin ei hriet a, thu hril le lêng khâwm thâ khawm a suktho thei nawh. Ruoi hi thlarâu kotu le ke sukchêttuah ei ruot a, a ṭhang lo chun ei kut le kehai a âiinkhuop a, ei hmûr le bâuhai chu a hruktu um ang elin, Israel-hai thukhawchâng angin ei lei chu ei dangah a kawp tlat a. Pathien inpâk dingin kâk zâi a rêl thei nawh. Sienkhawm sa le ruoi thil chu a thlarâu chawk thotu le sukphûrtu ni tâk a ruongin, phîng suknatu le êk in tlân râwnna mei mei chau a lo ni lem si a.
Ei ran ruolhai hlak chun Christmas hme bêlpui hluotu ding an nih tî rêng hre phâk lovin an lo inchâwm thâu el ul a. Mihriem chu a hrisêl le a hrât hrât ei dam sâwt a, ran tâ ding ruok chun a hrisêl sêl le a thâu hmasa sa chu nun rinumna le hringnun tâwina a lo ni lem si a.
Lal pieng nî taka ke pali nei, mihriem ang thoa dam nuom ve ngâwi ngâwi el, khêk rei ruia ei hei vuok kuoi ṭhuoi ṭhuoi el hlak hi chu a birthday neitu-pa tâ dingin a ngaithlâk a'n hawi chie di'm tî dâm lungrilin ka ngaituo neu neu hlak. Sienkhawm a Christmas boruok sukinhawitu le a thlarâu ke sukchêttu taka ei ngai tlat si chun ieng am hril chuong ei t'a?
Ran chu ei lunginsiet lei ringawtin Christmas nia sa hme lo insûm a, lo insie hrana hme dang lo hme bîk ngawtna ding thu hlak chêng lo. Mîhaiin sa hme an inchûhla el lai a, anṭam hmepawk lo hme bîk dai el khawm chu invêtna chikhatah mi'n mi ngai râwi an tih ei ti bawk si. A châng chu manî nuom naw dân dâna um hi mi angna le ruol banna a lo ni ve bawk leh. Chu chu thil chun manî dit thlangna tlâng chunga khawm mi'n ngîrtir thei lovin, dit lo thlangna ruom khurah a mi ṭhuoi lût hlak a nih.
Hî khawvêla hin tu khawm mihriem dit thlangna rênga pieng hi ei um si naw a. Ei dit thlangnaa pieng ei ni naw ang hrimin, ei dit thlangna ni bawk lovin pilvuta kîr vawng ding hi ei la ni si a.
Krismas boruokin lung a mi'n lên ie,
Nun hlui muol liem hnung ngaiin ka ko ruoi ruoi;
Sienkhawm kîr an rêl ta nawh,
Hnung kîr ta lona ramah chatuona dingin an lo ṭin ta si a.