VÂNGDUOINA AM PATHIEN REM RUOT?
VÂNGDUOINA AM PATHIEN REM RUOT?
Vângduoina le vângneinahai hin hmêl le piengzie an nei tak tak naw a, chûleiin mi tam takin ei chunga thil tlunghai hi a hâihu lai chun zuk hrietthiem el hi a'n tak rêng a, malsawmna khawm vângduoinaa ngaia a ieng a ieng hmaa zuk inngaisietpui el khawm a awl hrim a nih. Chuong ang bawk chun vângduoina khawm hi a tîr chun malsawmnaa ngai pal khawm a awl bawk. A khawhnungah a nîna indik tak chu a la hung inlang suok tho hlak.
Motor thar nei dâm hi mihriem ngaia chu malsawmna a ni ngei el, amiruokchu ei thîna ding dâm a lo ni dai thei. Accident-a thî le hliem tam tak hai hi manî motor vêka chuong thilhai chu tuok an ni nuom a; an nei thar hlim lai chun vângduoina khura ṭhuoi lûttu ding la hung ni'ng a tih tî rêng an ngaituo phâk ngai nawh. Chuong ang bawk chun pawisa hau hnêr hnûr hai hi a tâwpa chu damdawi inruithei mana dâm an la hung insêng ral a, natna inenkawl man ringawta dâmin an hmang zo a, lei chawina dâm le suol thawna ringawta dâm an inchan hlak. Chuong ang mîhai tâ ding chun hâusakna chu vângduoina a nih.
Hrisêlna hi malsawmna chikhat chu a lo ni te meu el. Amiruokchu manî dit zâwng thawna le nuom chênna ding ringawtin ei hmang ṭangkâi a ni chun, ei tâ dingin hrisêlna hi vângduoina, Pathien hlata umna a hung ni ding a nih. Chuong chu thil um dân a nî leiin vângduoina le vângneina hi a thlier hran a'n tak êm êm a, chûleiin manî thîna ding khawm malsawmna sâwna a lawmna siema lo hlimpui rak rak hi thil awl tak el chau khawm ni lovin nî tin tina thil tlung zing zing a nih. Chuong ang deu chun, malsawmna khawm hi a phut a pha chun beisei angin a hmêl a'n lang mawi rak naw chun vângduoina sâwna a ieng ieng hmaa lo beidawng inhmat khawm thil awl-âi tak, ringnaa mi dâwizephai tâ ding lem chun inngai sea tlûkpui dêr theina a ni bawk.
A dik a dik chun damdawi ṭha hrim hrim hi a tlângpuiin a thlum tieng nêkin a kha tieng, a'n hnik tieng nêkin a'n hnik naw tieng deu vawng a ni hlak. Chuong ang deu chun malsawmna hmêlhmang khawm hi a tlângpuiin a ṭha tieng nêkin a se tieng hi a put nuom bîk a, ei inkhî suol rawp hlak hrim a nih.
Mîhai nêkin natna le harsatna tieng ei lo hâusa bîk deu a ni khawmin malsawmna danglama ngai el ding a nih. Inchûktirna mîhai ei pêk ding chun thiemna tieng annî chunga ei um a ngai a, lusûnhai hnêmtu ding chun lusûn nawhai chu an tlâk nawh. Mî nêka sûn râwn a ngai. Dam naw khum beta zâl hnêmtu dingin mi hrisêl chu a qualified nawh. Khum beta natna vawi tam lo tuor ta hai vêkin mî an hnêm thiem. Kei a ziektu ngei el khawm hi accident thi ngama ka tuok hma khan chu tu khawm ka hnêm thiem nawh. Natna po po deu thaw khûm thei hiel ding, rîng tliek hiel khawpa accident ka hei tuok zet chu natna khuma zâl tam takin an natna an theinghil a, an ngai nêp pha rawng rawng el a nih.
Chûleichun, natna dâm, rimsikna dâm le harsatna chi dang dang mîhai nêka zuol kâiin ei lo tuok a ni thei, lungngai naw'm ei nîu; mîhai hnêmtu dinga Pathien rem ruot ei chunga tlung khawm a lo ni thei. Pathien mi thlang bîk ei nîna khawm ni'ng a tih, lawm lem ding ei nih. Tu hin ei lawm naw khawmin, nakie tienga ei lawmna ding tho a la nih. Mîhai tâ dinga malsawmna nî ding chun kebâi dâm a lo ṭûl a, mitdel le nasêt chen dâm a lo ṭûl a nih. Rimsikna intem ve ngai lotu chun iengtin am mî harsatna va hrethiemin va hnêm thei a t'a? Jakob êlpui khîk bâipêka a um kha Pathien mal mi sawm nuom dân a lo ni lem. Chuleiin natna le harsatna tam tak lo tuok inla khawm, Jakob anga malsawmna ei dawng theina dinga ei êlpui khîk bâipêka ei umna khawm a lo ni zing thei.
A tâwp taka dingin; ieng ang harsatna khawm lo tuok inla, mîhai po po khûm thei khawpa harsanain mi lo bâwm sien khawm, khûm ruol lo, harsatna po po tuor kim tah, mi hnêmtu ding Isu Krista ei nei a nih. A tuorna kha tu khûm ruol lo, rimsikna po po laia a chungchuong tak, a tâwpkhâwk, mi po po hnêmtu dinga lo tuor a nih. Chuleiin ei Lalpa Isu Krista tuorna kha ngaituo hlak ei tîu a, chuongchun ei rinum tuorhai suknêpin um a t'a, ei dampui hlak ding a nih.
*In lungril châu le ngûia in um nawna dingin, mi suolhai dodâlna tuortu chu ngaituo hlak ro.*
~ Hebrai 12 : 3
*Lalpa'n a thu mawl tea ei suklanghai chu ṭûl le ṭha a tî ang takin mal mi sawmpêk raw se.*