THU THEI LO NUN
THUP THEI LO NUN
*Khawvêl var in nih. Tlâng sîpa khaw um chu thup hmang thei an' nawh.*
~ Mathai 5:14
Khawvêla hin thil ieng khawm hi thup sawng thei tak tak hi a lo um nawh. A phut a pha chun ieng anga thu rûk khawm lo ni raw se, a sawt a seia chu pho langin a la hung um tho tho hlak.
Nuhmei pasal kâra thu rûk, puon hnuoi thil khawm ni sien, thla 9 hnungah thup hmang ruol lovin a la hung inlang suok tho hlak. Mî mit hmua inlang mawi tum a, lemchang nun ei haw fâwmhai khawm hi sawt a dai ngai nawh. Ei mizie le ei nîna indik tak chu mîhaiin an hriet taluo. Chu nu chu pa chun mî lai a mi lo hril siet a, annâwleh tu rêng am a ni ding mi lo hril setu hi? tia buoi buoi nêkin mî mi hril siet thei lo dinga insiemṭhat hi tum el ding. Mi'n mi hril se naw hai sien khawm ei nîna indik tak kha chu tlâng hriet a ni zing tho. Annâwleh mîhaiin an mi'n pâk rak khan ei zuk fel duok tah tîna a ni chuong nawh. An mi dem a, an mi'n pâk a, umzie a nei nawh, ei nîna chu a pângngâi zing tho. A dum chu zuk hril mawi raka zuk vâr duok thei khawm a ni nawh.
Mihriemhai hi rawng ei nei seng a, ei rawng kha mîhaiin an lo hmu ve vawng a nih. Mi ṭha chu hril mawi fâwm ngai lo khawmin an hming a ṭha sa zing a ni a, chuong ang bawk chun mi suol chu dem hran khawm ngai lovin an hming chu a se sa ta sa zing tho a nih. Tu mi lo hril siet rêng am a nih? Annâwleh ama nu ama pa sawn a mi hril siet pei rêng rêng tia inhântaw buoi buoi el ding khawm ei ni lê, mîhai hril siet thei lo dingin mani nun kha hmang ṭhat el ding a nih. Negro (mi dum)-hai chu ṭawngbâu thiem leia zuk hril mawi raka Sâphai anga zuk vâr pêt puot el thei ding khawm an ni naw a, chuong ang bawkin Sâp (mi ngo)-hai khawm zuk dem raka Negro-hai anga zuk hril dum rak thei khawm an ni bawk nawh. Vun rawng ei nei ang tho hin ei nunchang khawmin rawng a nei a, chu rawng ei put ang dungzuiin ei nîna le ei mize indik tak chu a hung inlang pei el a nih.
Ei Bible-in *"Tlâng sîpa khaw um chu thup hmang thei an' nawh"* a lo tî angin, Pathien nâu indik tak hai chu zân thim hnuoia thla var angin hmu hmai ruol an ni ngai nawh. Chuleiin ei nîna indik tak chu pho lang khawm a ngai hran nawh, mîhai hmu theiin a var suok el hlak a nih. Îtthîkna leia ṭhenkhat hril sieta ei lo um a ni khawmin ei nîna, ei rawng indik tak kha mi dang hmua chu a'n thlâk danglam thei chuong nawh. Mi ṭha i nîna kha mi suola thlâkthlengpêk thei i ni chuong naw a, mi suol i nîna kha mîhai inpâk fâwm le ditsakna leia mi ṭhaa zuk inbûk thleng thei khawm a ni bawk nawh.
Mîhai mi'n pâkna leiin phûr hlut naw'm ei nîu a, mîhai mi hril sietna leiin inngai se bawk ding hi ei ni nawh. Chu chu puitling lo mizie a nih. Mihriem chun an nuom po leh an mi'n pâk a, an nuom leh an mi dem siet a, an nuom leh an mi hnâwl a, Lalpa ruok chun ei nîna ang angin a mi pawm zing a nih.
Ei Pathien thu bawkin *"Khawvêl var in nih"* a mi ti a, khawvêl var ni sî mîhai lampui indik loa zân thim hnuoia panna ding mumal khawm hre loa petek hai lampui el vartu ei ni sî naw chun khâwnvar hmang tlâk lo ang ni'ng ei t'a, hnâwlin ei la um ding a nih. Khawvêl thim hnuoia lênghai el vartu dinga mei var ei ni a, chûleiin ei var hi insuo'ng ei tîu a, zân thim hnuoia khawm sûn angin var ta'ng a t'a, chuongchun sûn vara chun mawi takin ei lêng tlâng ding a nih. Zân thim hi mi suolhai tâ dinga suol rawng bawlna hun remchâng a ni a, chûleiin ei var hi insuo'ng ei tîu a, chuongchun mi suolhai tâ dingin suol rawng bawlna kawt ei khârpêk a hung ni ding a nih.
Ei var insuo'ng ei tîu a, khawvêl inthim hnuoia lêng a, hma tieng pan hlei thei loa lam laka inmai buoi el ta hai lampui el vartu nî tum ei tîu. Manî in sûng khura chau var ding ei ni naw a, tuol inthima lênghai lampui indik kâwk hmutu dinga var suok ding hi ei nih. Ei var suok ding anga ei var suok zo naw leiin khawvêl thim hnuoia lêng mi sâng tamin bo ralna lampui hrawin muol an liem mêk zing a nih. Chuonghai chu ṭhuoi kîra an um theina dinga var insuo dingin nang le keiin mawphurna insâng tak ei nei a nih. Chû mawphurna chu hlen ngei dingin var suok ei tîu khai. Khawvêl var ei ni si a.
Lalpa'n a thû mawl tea ei suklanghai chu ṭûl le ṭha a tî ang takin mal mi sawmpêk raw se.