THLIER BÎK NEI LO NATNA

THLIER BÎK NEI LO NATNA

Natna hin tû khawm thlier bîk a nei naw a, inzâ le zuom bîk a nei bawk nawh. 

Natna hi thil huoisâr tak el a ni a. Pathien mî le mî naw inzâ bîk a nei naw a, mi suol le mi ṭha ditsak bîk a nei bawk nawh. Chûleiin natna le mihriem mizie hin inzawmna an nei nawh. Ei suol leia na tuor ei ni chuong naw a, ei ṭhat lei rênga zuk hrisêl bêk bêk khawm ei ni chuong nawh. 

Pathienin sie le ṭha hrietna a mi pêk seng a, chu chû hmang chun ei damna ding chu dap chawpin, a mi sukse theitu laka ei invêng el ding a nih. Pathien mit hmuah fel rak inla khawm, fâk le dâwn tieng ei insûm sî naw chun natna laka mi hum hum thei bîk naw nih. Ei Pathien hi thlier bîk nei lo a nîna tak khawm hi lâwm a um hle ruol ruolin, a kârchâng chu a buoithlâkna a tam hei ti'ng ei tih. Ei fel lei le ei ṭhat leiin a suolhai nêka vângnei lema a mi siem chuong naw a, a suolhai nêka hrisêl lemin a mi'n umtir chuong bawk nawh. Mi ṭhahai chungah nî inêngtirin, mi suolhai chungah khuo a'n durtir chuong nawh. A tâwi zâwngin, a ṭhen chungah nî insattirin, a ṭhen chungah ruo a'n sûrtir ngâi bawk nawh.

Mi fel le ṭangkâi em em hai dâm chu, vângduoina tuokin natna sukdam thei lo hiel dâmin a tlâkbuok a. Mi suol hrem phû ngâwi ngâwi hai dâm chu hrisêl em emin an um nâwk a. A châng leh mi taima em em hai chu an thil thawnaah hlawsamin, mi thabo lem hai dâmin hlawtlingna an chang a. A mamaw ngâwi ngâwi hai nêkin a chuongliem neihai dâm chu malsâwmna vur sain an um lem a. Chuong ang khawvêla chêng chu ei ni a, a châng hin chu Pathien rorêl dân hi fair lo ngâwi ngâwia ei hriet châng a um a. A lakah ei nuor ngâwi ngâwi nî khawm a bo ngai nawh.

Pathien hin mi suol le mi ṭha hi thlier bîk lo nei sien la chu, chuong thilhai po po chu um lo ding a ni a. Mi suol thi zo pei ei t'a, ei khawvêl hi a hluotu ding ei um ta da'l ding a nih. 

Ei chêngna khawvêla hin thil hi a lo um famkim khawp el. Mi suolin a suol râ a sîkna khawvêl le mi ṭhain a thil thaw ṭhat râ a sîkna khawvêl ni nâwk sî a nih. Mihriem hringnun hi chawkpawl nuna sip a ni a, a châng chu fel fâi deuin rorêlna ei hmasawn a, a châng leh hrietthiem harsa khawpin indik lo takin rorêlna ei chungah a tlung nâwk sî.

Ei Pathien hi a hming *MAKA REMRUOTTU* a lo nîna mâin a rem ruot dân hi mak a, mihriem varnaa sui suok ruol ding zie zâng hi a ni nawh. Hla siemtu khawmin,

*Ka Lalpa remruot dân,*

*Tu'n am hril zo an t'a?*

a lo ti thlu thlâwt el. Pathien rem ruot dân makzie chu a hmu chieng hle chu ni'ng a tih. 

Pathien hin ei dit dân le ei hriet thiem zâwng nêkin, Ama dit dân le ei hriet thiem naw dân tak hin ei chungah ro a rêl hlak. Chûleiin ei thil hnîhai hi, mi thawpêk loa hlawsama ei inngai ta hnung dâm hi, ei inbeisei naw dân le ei lo inchân naw dân daia a mi thawpêk lei dâm hi a lo ni nuom vieu hlak. Thlasik dei hunah mîhai angin inthuom lumna ding thuomhnaw man tam nei  zo naw inla khawm, a âiin hrisêlna dâmin Pathien chun thuomhnaw nêka ṭha lemin a mi lo inthuom dai thei a nih. Mîhai angin sûng le kuo mi ṭhangpuitu ding nei zo naw inla khawm, pawisa tam tak lam suok theina hrisêlna le hrâtna dâmin Pathienin mal a mi sâwm thei a nih. Lung varna dâm mi pein lekha thiem theina dâmin mal a mi sâwm thei bawk.

Chuong ang chun hmêl danglam tak takin ei lo inbeisei nawna kî tieng dai dâmin Pathien kut hi a hung inlang hlak a nih. Chûleiin Pathienin a mi tosan anga ei ngaihai dâm hi ei lo hriet naw lei mei mei dâm hi a lo ni rawp hlak.

A tâwp taka dingin ei hriet dinga ṭha chu hi hi a nih:

Natna siemtû chu Pathien a ni a, amiruokchu intlungtirtû chu Pathien a ni kher nawh tî hi. A tâwi zâwngin, iengkim siemtû chu Pathien a n'a, sienkhawm iengkim intlungtirtû chu Pathien a ni kher nawh. Ieng po khawm chu ni sien, ei ṭhatna dinga Pathienin iengkim hi a mi ruotpêk a lo ni lem hlak. 

*Lalpa'n a thû mal mi sâwmpêk raw se.*