SUI SUOK RUOL LO LALPA REM RUOT DÂN MAK
SUI SUOK RUOL LO LALPA REM RUOT DÂN MAK
Pathienin mihriemhai hi ama angpuia a mi siem ei nî leiin inangna tam tak ei nei a; amiruokchu inang nawna khawm tam tak ei nei bawk a nih.
Pathien ngaidân le remruot dân kawnga hin mihriem le inang nawna nasa tak ei nei a, chû inang nawna tak chu a nih a makna le sui suok a sukharsatna lai chu. Mihriemin rem ei ruot chun, ei thil riruong dâna inthawkin mîhaiin ei thil tum le a san ding âwm chu an lo hrietthiem nghâl thei a; Pathien remruot le thil tum ruok chu chuonga sui suok thei a ni ve naw a, a letling zâwng dâmin thil a hung her kuol a, a bula ṭan lovin a tâwp tienga inthawk dâmin a châng leh a ṭan a. Chuong anga mak tak taka thil thaw hlak Pathien a nî leiin, a thil tum hi mihriem thiemnaa sui suok ruol an' naw a, hrietthiem phâk ruol ding khawm a ni bawk nawh. Ei hrietthiem ding khera remruot a ni ngai si naw a.
Pathien remruot lai poa hrietthiem harsa pâwl taka inlang chu thîna thua hin a ni âwm e. Mi suol hieng zo zâi um laia mi ṭha, in sûnga ṭangkâi tak kher kherin thîna an hei tuok el dâm hi a mak bêk bêk a, Pathien remruota zuk pawm el khawm a harsa hiel hlak. A ṭhen chu Pathien mî tak el, nâu pakhat chau nei a, an nâu nei sun hun lo taka thî dâm an um lâiin, ṭhenkhat nâwk thung chu Pathien a um le a um naw khawm hre fu lo deuthawa khawvêl pâr tlâna lêngin lua kêl sam ṭo rak khawpa la dam le hrisêl dâm an um nâwk a. Inkhâwm, Bible tiem le ṭawngṭâi taima êm êm el, sienkhawm hrisêl le dam hmêl hmu thei dêr lo dâm an um lâiin, a ṭhen ruok chu Kristien an nî le nî naw indawn ngai hiel khawpa inkhâwm, Bible tiem le ṭawngṭâi thlathlam, sienkhawm hrisêl êm êm si dâm ei um a. Hieng thil po po hi mihriem varna chun a sui suok zo naw a, a hrietthiem phâk bawk nawh.
Khawvêl po poa chanchin ṭha hi the dar ding ei nih tî hrein, chu chu sin chu hlen dingin a ṭhen sakawr ang ela Pathien rawng bâwl dinga a sûr a sâ ti loa hrât taka ke pên, an tlân laklaw laia inpal thlu dêra tho ta lo sawng dâm an um lâiin, a ṭhen chêngkawl anga hniek phâwi dêr loa hnung tieng hma tieng khawm insawn thei ta lo rawngbâwltu inti si, manî um hmuna inṭhung mûm el ta hai dâm chu a hrisêl le a dam sâwt sâwta ṭhang dâm an la hei ni nâwk a. Mihriem hringnun hi a fair nawh ei ti nuom el hlak a nih a châng hin chu. Amiruokelchu Pathien thu lo le hrietpui lovin ieng thil khawm hi a tlung ngai si nawh. Hrietthiem a'n tak ngei ie. Hrietthiem leia zuk pawm dam el thei chî khawm ni bawk naw nih mihriem dâna chu.
Ei Pathien hin a remruot dân hi mi'n hriettir kher a tum naw a, a taka mi'n hmutir kher hi ṭûlin a hriet bawk naw khawm ni ngei a tih; Vânram inhawi dingzie dâm hi ringna le beiseina mit chauin ei hmu a phal a, Ama beiseia mâwl taka a remruotna pawm a, tuor fan fantuhai chauin hrietthiemna le lâwmna an nei hlak. Pathienin a rorêl dân le a remruot dân hi ei hrietthiem dân ding khera a thaw ni sien la chu, mi râwn ngei a tih. Amiruokchu chu dinga a thaw an' naw leiin a remruotnaa hin ei ngaidân ding a vêng naw a, a mi râwn ngai bawk nawh.
Pathien hin mihriemhai hi mi râwn pei el ta sien la chu, rêl suol ngiel ngiel khawm hau a tih. A mi râwn ngai naw lei taka rêl suol hi nei ngai lo hrim a nih. Thil ṭûl lo chen chena mî râwn tum vawng el khawm hi suksuolna a nih. Thil ṭha thawna dinga mi suol râwn chu thil kawng lam a ni ngai nawh, mi remtipui ngai bawk naw ni hai. Chuong ang bawk chun, Pathienin a rem ruotnaa hin mihriemhai hi râwn pei sien la chu thil suol khawm tam tak Pathien ei inthawtir hlak ding a nih. Chu chu Pathienin a hriet a, a mi râwn ngai naw a nih. Nâupang chu an nu le pahaiin an ṭhatna ding annî nêkin an hriet lem a, an râwn ngai naw a, an thil du zâwng a thlum nazawng chu an pêk ngai nawh; a châng leh damdâwi kha dâm an pêk a, a châng leh suol lampuiah an pêt nawna dingin hmangaina kut hmangin thununna (inchûktirna) dâm an pêk hlak.
Nâupangin nu le pa thununna an hrietthiem ngai naw ang hin, mihriemin Pathien thununna le remruot dân hi ei hrietthiem ngai naw a nih. Pathien remruot dân hi a makin hrietthiem a'n tak a, sienkhawm a'n dikin a fel a, a san hriet suok kher tum lo a, mâwl tak le lungawi taka pawm el hi ei thaw ding um sun a nih. A san um lovin thil hi a umin a tlung ngai naw a, Pathien hrietpui lovin ieng thil khawm hi a liem hmang ngai bawk nawh. Pathien mi hrietpui lovin mit vawi khat khawm inkhapin thuok vawi khat khawm ei la lâk ngai naw a, Pathien thu lovin nisa sain ruo a sûr ngai bawk nawh. Khawvêl hi Pathien rorêlna hnuoia um le a remruot dân ang peia tlung a ni si a.
*Aw Lalpa nangin ngun takin i mi en suok a, i mi hriet tah.*
*Nangin ka ṭhung le ka ngîr hi i hriet a;*
*Ka ngaituona hi hla taka inthawk khawmin i hriet thiem hlak.*
*Ka lampui le ka zâl hi i hriet chieng a,*
*Ka um dân po po i hriet vawng a.*
~ Sam 139:1, 2 & 3
*Lalpa'n a thu ei suklanghai chu ṭûl le ṭha a tî ang takin mal mi sawmpêk raw se.*