PE RO CHUONGCHUN PÊKIN UM IN TIH
PE RO CHUONGCHUN PÊKIN UM IN TIH
*"Thu dik ka hril chêu hi, hieng mi chîn tak laia mi tu khawm ka zirtir a ni leia tuisik no khat lo petu chun a lawmman ding chu chân naw tawp a tih," a t'a.*
~ Mathai 10 : 42
Tûlai hin *"Thil thawa rawng bâwl"* tî hin ka lungril a hluo sip nasa khawp el a. Mîhai nêka pe le thaw râwn nuom lem bîk ang zie zângin. Kei a ziektû hin khêkpui khêkpui lang khawm, to ṭawka ka nêka thil ṭha thaw râwn le inphal lem vawng khawm ni tâwl in tih. Amiruokchu, chu lei ringawta thil ṭha thawna tieng thû hi hril insûm ka tum chuong nawh. Thaw râwn inti tâwk vieu ta inla khawm, Pathien ngaia chu ieng tham khawm a lo ni naw thei tî hi theinghil el ding chun ka phal nawh.
Aw leh, rawngbâwl dân hi chi hni a um a, chu hai chû, a thua rawng bâwl le thil thawa rawng bâwl. Ei Bible-in ringna chu thil thaw ṭhang lo chun thil thî a nizie a mi hril a; sienkhawm nâ ringawtin ei hriet a, ei kutin a hriet ve tlat nawh. Nâ le bâu ringawtin Pathien thu ei zâwm a, ei kut le kein a hmêl hriet ve sî nawh. Kut le ke ṭhang lovin nâ le bâu ringawtin pên khat khawm ei intâwl thei naw a, dangchâr le phîngṭâm a hnêm thei bawk nawh. Nâ le bâu a châng ruolin kut le kein a zui ve nghâl naw chun thil thî el a nih. Thil thaw ṭhang sî lova rawngbâwlna chu thil thî a ni si chun, thil thî mei meia rawngbâwltu hi ei va tam nasa âwm de.
Ei Pathien thu zâwm dânhai hin Vân ram a mi ṭhuoi lût a ni vei chun, Vân ram khi piengsuol ruol lêng khâwmna hmunah ei inchangtir hiel el naw di'm a nih. Hmûr le nakâwr khât el, kut le ke bawng hmu ding tam nasa hle'ng ei tih. Kut le kein thil ṭha thaw ngang lo chun Vân ram kai tlâk a ni si naw a, chûleiin kut le ke bo ei tam ding tîna a ni chu. Tû pa tî dânin am a nih, hienga Vân ram ei la kai a ni chun Vân rama khawm a rinumna hmun tak bâk chu chan nei kher naw'm ei nih.
Ṭawngbâu ṭha le ṭawng malsâwmnahai hi a ṭhain a ropui hle lai zingin, thil thaw ṭhang sî lo chun umzie a nei tam lêm nawh. Thilthaw hi a practical-a mîhai ta dinga malsâwmna indik tak a nih. Ṭawngbâu ringawta inmalsâwmna hi a ṭhat hle tho lai zingin, malsâwmna famkim a tling zo tak tak ngai nawh.
Ṭawngṭainaa inṭhangpui dâm chu thil ṭha le hlu tâwp el a nih, amiruokchu mi tam takin awlsam zawngin, thilthaw bânsanin a thu ringawta inṭhangpui hi ei uor ta em em a, ṭhangpuina kut rawl nêkin a awlsam lem ṭawngṭainaa insan dâm hi ei insukhmu a, thil thaw nêkin a thû tiengah ei ramṭang lem tah. Chuleichun thil thawa rawng bâwltu hi ei vâng pha deu deu a, ṭawngṭai le bâua rawng bâwltu ei tam deu deu pei bawk. A awlsam zâwnga rawngbâwltu hi ei pung nuom sâwt hle.
Hmeithâinu thawlâwm dere chau kha Pathien ngaia chu tam tak a nîna kha changchâwiin, thaw râwn nêkin a thaw tlâwm ei inchu a, Pathien ngaia tlâwm te khawm tam tak ang a ni a, hmeithâinu thil pêk a lâwm lei el khan a tlâwm taphawt chu Pathienin a lâwm vawng dingah ei zuk ngai a, sienkhawm chu chu a lo ni chuong vawng sî nawh. Pathien hi a tam a tlâwm thuah a buoi ve naw a, manî nei le theina le inphua lungril taka petu le thawtuhai chunga a ni a lâwm tak chu.
Ei Pathien biek hi ei thil thaw ang peia mi thungrultu a nî leiin ṭit hi a um em em. Mi suol ta dingin a ṭit-um a, mi ṭha ta ding ruok chun nêl a um em em thung. Mî chunga thil chikte ei thawhai khawm hi lo inchik dap pei mî a nih. Mihriemin mi hmu naw hai sien khawm a mi hmu a, mihriemin ei thil ṭha thaw a theinghil ta hnung khawmin Ama chun a theinghil ve ngai nawh. Mihriem chun ei chunga thil ṭha thawtu khawm thil suolin ei thung lêt hlak a, an' naw leh a nêka tlâwm lem dâmin ei thung hlak. Pathien ruok chun ei thil thaw le inphû nêka tam lem hmanin a mi thung hlak.
A thu ringawta rawngbâwlna hi bânsan a hun tah. Ṭawngbâu ringawta inmalsâwmna khawm hi a dawngsawngtuhai ta ding khawmin na kham a um zo zâi tah. A thû ringawta inṭhangpui hi tâwpsan ei tîu. A dawngsawngtu ta dingin ri sie le nasêtumah a'n chang hlak. Thû hi thil thawin a zui naw chun a rî a rê ruolin a bo zui ve hmak el hlak.
Pathien ram hi pêk pung a ni a, tuitekêm le well tui angin a luong suok râwn po leh a thar a luong lût râwn ve ting el. Hekna ding a um nawh. Mî ta dinga inro ngâwi ngâwia ei sik dawp dawp hai khawm hi nakie chu manî sietna ding vêka sie khâwl dâm ei la hung ni thei a nih. Doctor-hai phîng sukbêlna ding le an in le lo sukburipna ding mei mei dâm a lo ni thei a nih. Pathien hi phuba la hmang a ni a, ṭhangpui ngaihai ei ṭhangpui nuom sî naw chun ṭhangpui ngai lohai ṭhangpuitua dâm a mi la ruot thei a nih, ei Bible-in a neihai pêk bel a ti ang khan a hâusahai sukhâusak nâwk zuolna ding dâma insêng ral thei a lo nih.
Keini khawm hi zuk ti ta mei mei inla ( manî insukmuolphona ni lovin Pathien ropui nâwk zuolna ding lemin), kum khat lai khan kan sûnghai pakhat kan mikhuol a, kan âr vai lai fiemthaw titakin a beisei thu a hril a. Keini chun kan hau bêk naw em leiin bâwng sa kan lo hmepui ta lem a. Ni tawite hnungah kan ârhai chu an hung pûl fai ta ṭhak el. Inzak a um char char. Mi'n hre pal an tih. Mani thaw ra sîk kan ni mieu si a, ieng am hril ta'ng ei t'a? Mî ta dinga ei inro ngâwi ngâwihai dâm hi nakie chu hmunhnawk bâwm sukmawitua dâm an la hung inchang thei a nih. Mi va ṭhangpuina dinga pawisa ei sik dawp dawp hai dâm hi nakie chu ei nâuhai inruithei chîngna ding mana dâm la hung inchang thei ngai a nih. Pathien Ram lienna dinga ei pawisa sik ngâwi ngâwi hai dâm hi nakie chu mî luong man ding dâma la'n chang thei a ni a, lei tam tak chawina dâma la hung inchang thei a ni bawk.
Ei thil neihai hi mani tâ an ni si naw leiin, a mi petu lâwm zâwnga hmang hi a ṭhain a lo him tak a nih. *"Pe ro chuongchun pêkin um in tih,"* mi titu chu a thutiemah a ringum a, a hming ringawt ni lova, phal taka a neitu-pa hming sukropui thei ding khawpa hmu kîr beisei lova phal taka ei pêk a ni chun a lêt tamin ei hmu kîr nâwk ngei ding a nih. Pathien ram chu pêka a pung hmuna a ni si a.
*Lalpa'n a thu mal mi sâwmpêk raw se.*