PATHIEN RAWL HRIETNA
PATHIEN RÂWL HRIETNA
*Ṭawngṭâi fan fan unla, chu taka chun lawmthu hril pumin ngaiven ro...*
~ Kolossa 4 : 2
Thaw râwn chu hmu râwnna a n'a, fâk râwn chu khawpna a nî ang hin ṭawngṭâi râwn le Bible tiem râwn chu thlarâua khawpna a nih.
Thil iengkim hi a thlâwna zuk hmu el thei a um naw a, hlaw suok naw chun a khâtin ieng khawm a hung luong lût ngai nawh. Malsawmna khawm hi a awlsam takah ringna vêka hlaw dawk dâm a ngai a, tuornaa hlaw dawk dâm a ṭûl a, nungchanga hlaw dawk dâm a ṭûl hlak. Kei a ziektu ngei khawm hi sermon vawisûn ni chena tâwptâi nei loa ka la hung ziek suok thei zingna san khawm hi accident râpthlâk tak tuora ka hlaw dawk ngat a nih. Ka accident tuok hin malsawmna tiem sêng lo, hmu thei le hmu thei lo khawm tam tak a hlaw dawk ta a, a la hlaw dawk mêk zing a nih. Mi ngaia chu ka sermon fahra te te hai hi iengmalo el ni sien khawm, natna inrik tak tuora ka hlaw suok a ni mieu leiin, keia tâ ding chun a hluin a ropui tak zet a nih. Sakawr ang hiela ka tlân hrât lai nêk hmanin Jakob anga ka êlpui inbâi hnung hin thlarâu khawvêl intlânsieknaah ka dâi inthûkin ka khawvêl pal ram a lien lem dai a nih.
Uong thu hla lo chang naw sien, mîhai angin ni 40 le zân 40 bu nghei ṭawngṭâi thaw thei ve naw lang khawm, Pathienni tûk zâta bu nghei ṭawngṭâi hi kum 2 vêl ka lo thaw ta a, Pathien zârin ka thei chen chen sunzawm pei ka la tum a, chun kum tin Bible vawi khat bêk tiem suok ka tum bawk. Vawi hni chu Lalpa hrâtna ringin ka lo tiem suok ta ngei bawk a nih. Thlarâu tieng le thu ziek tieng khawm nasa takin a mi ṭhangpui pha a nih. Ka thil thaw ṭhat mîhaiin lo hre ve hai sien tia ka hung pho langna a ni naw a, sermon ziek ding Lalpa'n a mi pêk thei zingna san hi hril a ṭûlin ka hriet a, chu ding chun ka sermon hung luong suokna hnârpui hi ka hril sa a ṭûl hrim a nih. A thlâwna ka hmu a ni naw a, accident ka tuok kha a bulpui tak a ni a, bu nghei ṭawngṭâi le ka Bible tiemin a hung sunzawm ta pei a nih. Keima inhâwk leia ka âwmthua inthawka hung inir suok mei mei a ni ngawt nawh. Ka'n hril ṭhatna a ni dêr nawh; tu pa tî dânin am a nih, manî inhril ṭhat nuom ni inla chu hi nêka suongum le hril ding dang a tam êm el.
Pathien râwl hi tienlai angin a hran a hraia hriet thei a ni ta naw a, Bible tiem chau hi a nih a râwl ei hriet theina chu. Chun ṭawngṭâina chau hi Pathien le ei inbiek theina um sun a nih. Hienghai pahni hi ei inthlada a ni chun Pathien râwl hre ngai naw'm ei ni a, ei râwl khawm hre ngai bawk naw nih, biek ngai lo na ná nà chu. Mihriem khawm ei inthlawppui ngun deu hai le chu ei inngaina bîk a, kawng iengkimah ei inhriet paw hlak. Chuong ang char chun ṭawngṭâi ngun le Bible tiem râwn hai chu Pathien leh an inpâwl râwn a, inpawna khawm a ṭha bîk a, Pathien leh inzawmna khawm an nei ṭha bîk tâwng hlak.
Ei taksa inṭhang lienna dingin fâk le dâwn ṭha ei mamaw ang hin, thlarâua ei inṭhang lienna ding chun ṭawngṭâi le Bible tiem hi bua nei a ṭûl a nih. Ei thlarâu khawmin châwmtu ding bu ṭha a mamaw ve a nih, chû bu ṭha chu ṭawngṭâina le Bible tiem hi a nih.
Ei ṭawngṭâi ringawt a, Bible ei tiem si naw chun Pathien râwl hriet khawm harsa'ng a tih. Bible thu hriet râwn hi a ngai a nih. Ei Bible thu hriethai hin nakie tieng a ṭûl ang peiin a hun le a hmun izir peiin Pathien râwl angin ei naah a la hung inri hlak a nih. Chun inpâkna hla hriet râwn khawm a ṭha bawk. Bible tiem thei lo le tiem pei lo hai tâ dingin sermon ngaithlâk râwn khawm ṭha bawk a tih. Ei Pathien thu hriethai hi Pathien râwla inchang thei vawng an la nih. Kei ngei khawm Lalpa'n hla hmangin a mi biek hlak. Thu khawm hla, hla khawm thu tî angin hla hriet râwn khawm Pathien thu hriet râwnna a ni ve tho.
Ṭawngṭâi uor ei tîu a, Bible tiem, hla sak le sermon ngâithla râwn bawk ei tîu. Chu chu Pathien râwl hrietna a ni si a.
*Lalpa'n a thu tlâwm tea ei zuk hrilhai chu ṭûl le ṭha a tî ang takin mal mi sâwmpêk raw se.*