PATHIEN HMÊL INLANG DÂN
PATHIEN HMÊL INLANG DÂN
*Mikhuolhai chungah ṭhat insuo theinghil naw ro, chuongchun mi ṭhenkhatin hre lovin Vântirkohai an lo intlungtir si a.*
~ Hebrai 13 : 2
Pathien hi ieng ang hmêl putin am hmu ei lo tum hlak a? Ei Pathien hi hmêl pakhat chau putin a'n lâr ngai naw a, hmêl chi dang dangin a hung inlang hlak a nih.
Pathien hmêl hi a hmu lo um naw'm ei nih. Ei lo suongtuo dân angin a hung inlang ngai naw leia hmu lo anga inngai mei mei ei nih. Pathien hmêl hi a hranpa takin hung inlang naw ni a, mihriem hmêl mak tak tak putin a hung inlang hlak ding a nih. Chuong chu Pathien hmêl inlang dân a nî leiin ei hriet lovin vawi ieng zât tawp am Pathien hi ei lo hnâwl ta ding tî dâm hi ka ngaituo hlak.
Kum khat lâi khan putar pakhat hi kan inah a hung lût thut a, kei accident-a ka nat inrik deu lai a nî leiin nuom angin ka lo uo âu thei naw a, ka sûnghai hlak an lo buoi lâi tak a ni bawk leh. Ṭawngṭâi a nuom thu a hril a. Ka sûnghai chun mi ṭhenkhat thaw dân anga pawisa beisei nia ngaiin an lo engto rak naw khawm chu ni'ng a t'a, chuong ang mî chu kan tuok fûk râwn ta bawk leh. Ka sûnghaiin thil dang thawa an buoisan kâr chun a lo suok dai a. Ka sûnghai khawm ka hal pha nghe nghe a. Ei Bible-a inziek angin Vântirko hmêl danglam put niin ka ngai a, a thil thaw tum inthawtir hman loa ka'n inkîr kha vawisûn nî chen hin ka la'n thiem thei naw zing. Lalpa'n mi ngaidam mawl raw se.
Ei tî tâk ang khan, Pathien hi hmêl mak tak tak puta inlang hlak a nî leiin, ei ring phâk dêr lo hieng kutdaw, zu rui le nawchizawr hmêl dâm putin a hung inlang rawp hlak a nih.
Kum khat lai bawk khan zu rui pakhat hi lampui lai a lo zâl dêr a, tû khawmin an ûksak nuom naw a. Lama lâwn taphawtin an hêl hmang pei a; ka upa le chun chû zu rui bal bet but el chu inzâwnin an inah kan va thak a. A sûnghaiin lawmthu bâu khat khawm an lo hril nawh. Lawmthu hril beiseia va thak kan ni chuong naw a, ṭhangpui ngaihai ṭhangpui theia kan um leiin kan lawmna a bo chuong nawh. Chun zu rui pakhat a sûnghaiin an ina an inriektir phal lo kan lo inriektir ta bawk. An sûnghaiin ṭawng mal khat khawm an hung nei chuong rêk nawh. Amiruokchu Pathien ruok chu a to ṭawk ṭawk nawh. Chû ṭawng thangkhâwk rî chu kan naah re ngai naw nih. Mihriem chunga ei thil ṭha thawhai hi mihriem tâ dinga thaw ei ni naw leiin, a lawmman mihriem laka inthawkin hmu kher naw inla khawm, ei thawpêk-pa ( Pathien)-a inthawk ruok chun lawmman hmu lovin ei um ngai nawh.
Einîhai chun Pathien mî deu hai hi Pathien hmêl angin ei hmu a, an chunga ṭhat insuo khawm ei inhâwk bîk deu hlak. Tîsa mî deu hai chu setan hmêl put hlie hliein ei hmu a, an hmêl ei hmu charin setan anga zuk hnâwl el nuomna lungril ei put a, an laka ṭhat insuo khawm ei inhâwk naw a, ṭhangpuina kut rawl khawm ei suktîm pha hlak a nih. Sienkhawm lal Herod angin Isu hung insiengna ding sâwna suolna nei lo nâute tam tak a that chimit ang khan suolna nei lo Vântirko ei lo hnâwl rawp hlak a nih tî rêng ei inhriet si nawh.
*"A tle taphawt chu rângkachak an' nawh"* tî angin, mi suol tirdakum taka inlang taphawt hai chu setan rawihai an ni vawng chuong nawh. Mi suol khawm Pathienin a hmangai a, a nuom chun a hmang el hlak a nih. Mi ṭha chau a thlang bîk nawh. Kristien-hai suknawmnatu tîrko Paula khawm Lalpa'n a thlang tlat. Isu kha hnuoia a hung ṭumna san kha mi suolhai lam dinga hung a nih. Chûleiin mi suol taphawt chu hnâwl ding an ni chuong nawh. Pathien âng sûnga ṭhuoi lût dân ding hi ngaituo lem ding ei nih. Mi hrisêlhaiin doctor an mamaw naw a, mi hrivawisiehai chauin an mamaw ang hin, mi ṭhahai nêkin mi suolin Pathien an mamaw lem a, Pathien kuom tienga ṭhuoi lût ding hi ei nih. Thlarâua dam naw an ni a, thlarâu doctor (Pathien) panpui hi ei mawphurna a nih.
*Lalpa'n a thu mawl tea ei suklanghai chu ṭûl le ṭha a tî ang takin mal mi sawmpêk raw se.*