NUN DÂN THIEM MI'N CHÛKTIRTU ISU
NUN DÂN THIEM MI'N CHÛKTIRTU ISU
*"...kei chu ieng angin um lang khawm, lungawi pei ka chîng ta si a."*
~ Filippi 4 : 11
Tîrko Pawla chu ieng ang ngîrhmuna khawm um sien la, lungawi taka um dân a thiem a. Hâusak dân, rethei dân, khawpa um dân, ṭâma um dân, lawm huna le lungngai huna um dân le iengkima um dân po po a hmu suok ta a nih. Nun dân thiem inchûktirtu Isu a nei tâk leiin, Ama'n iengkima um dân a lo inchûk thiemtir ta si a.
Isu (Pathien) nei inti seng seng ieng am ei inchûk bîk am a nih, hâusak dân ei thiem khawmin rethei le tlâksama um dân ei thiem naw a, retheia um dân ei thiem le hlak hâusaka um dân ei thiem nâwk naw a. Hlawtling huna um dân thiem sîin, hlawsam huna um dân thiem lo dâm, hrisêl huna um dân thiem si, sienkhawm nat-le-sat huna um dân thiem dêr lo dâm, hlim le lawm huna um dân thiem êm êm si, lungngai nia um dân thiem ta lo dâm, lungawi laia um dân thiem, sienkhawm lungsen huna um dân nasa taka inhmang dâm hi einî ringtu intihai nun dân a lo ni tah. A mak ngei, Isu Krista ka nei ti zing sîin nun dân thiem thei dêr loa ei la um zing el hi einiah a fel lo chu a la um ni ngei a tih.
Thil po po laia thiem intak tak chu thî nikhuoa um dân a nih. Thlarâu mi inti ngiel ngiel hai khawm tîsa mihai leh danglamna khawm ei nei thei ta ngai nawh a tam lem hi chu. Thî nikhuoa hin Isu'n nun dân thiem a mi'n chûktirhai kha ei theinghil a, inhmu nâwk ta lo ding ang hielin mawi lo baksakin ei sûn a. Hieng tik huna hin ei Lal Isu'n nun dân thiem a mi'n chûktir kha a hmang ṭangkâi hun a ni vei leh. Ieng tik huna'm hmang ei tum am a nih? Isu hi Vânram kâina ding chaua ei nei a ni naw a, ei lawmnahai mi lawmpui ding le ei lungngaina le beidawngnahai mi hnêmtu dinga ei nei a ni lem.
Isu Krista le chu hnuoi ram khawm hi Vân rama inchang thei a ni a, amiruokchu tîrko Pawla angin iengkima um dân ei thiem ve si naw leiin, chu chû thil chu einî tâ ding chun mang ram chaua um ang a la nih. Tîrko Pawla khawm kha mihriem pângngâi ve el a ni a, Bible-ah a hming a chuong lei elin Pathien nâu bîk anga ngai ding a ni nawh. Pathien a ring zo a, iengkim Pathienah a'n nghat ngam a, ieng anga phurrik khawm Pathien leh hâdam takin a phur thei a nih. Einîhai ruok chu ei phurrikhai Pathienah ei innghat zo ngam tak tak ngai naw a, mani'n rikti êm êmin ei phur ta hlak a nih. Ei phurhai hi zâng ding ziezâng a ni nawh.
*"Nangni sin inrim le phurrik phur po po hai, ka kuomah hung ro, keiin chawlna pe'ng ka ti chêu,"*(Mathai 11:28) mi titu kuomah ei phurhai chu innghatin ei la châwl tak tak ngam naw leiin, mania phur vawng ei tum a, ei zo ta ngai naw a, ei tlûkpui ta hlak a nih. Tho ta loa thlu sawng ta khawm ei bo mathlâwn nawh.
Nun dân thiem mi'n chûktir dingin nî tin elin Isu'n a mi ko zing a, pan nachâng ei hriet ngai naw leiin tlâksama um dân dâm ei thiem naw a, hâusaka um dân dâm ei thiem naw a, natna khuma um dân dâm ei thiem naw a, thî nia um dân tak tak hi thiem intak ei ti zuol. Ka ngaituo rawp hlak, thî nia dâm hin um dân thiem thei inla chu, ring nawtu tam takin ei Pathien hi bêl tlâk Pathien tak a nih tî hung ring an t'a, Pathien thu ṭawngbâua hril kher ngai lovin ei nunin hril ta'ng a t'a, Kristien-ah hung inpe ṭuk ṭuk el an tih. Thîna hi khawvêlin a'n khâwkpui tak le a tuorhla tak khawm a ni a; thî thlamuongna le tuor nêp theina hi ieng po nêka thlangum a nî leiin, ei Kristien nîna hin chu nun chu khawvêl mit hmuah hring suokpui thei sien la chu, ring nawtuhaiin chu nun chu inhnarin ei Pathien hi hung zui ve naw thei naw ni hai huoi takin ka ti ngam a nih.
Ringtu ei nîna hin mîhai mit hmuah danglamna mi'n neitir sien chu ei Pathien hi hung ring ve ngei an tih. Amiruokchu harsatna le thîna ei hmasawn dâna hin ring nawtuhai leh danglamna ei nei lêm naw leiin ei Pathien hi a thilthawtheina kut ei khuoppêk a, a hmêl ṭhatna hi ei hlie hmang hlak leiin ring nawtuhaiin ei Pathien biek hi ieng ang khieua thilthawtheina nei am, annâwleh ieng ang hmel hmang put am a nih tî hi an hmu thei ngai naw a nih.
Nun dân thiem mi'n chûktirtu Isu pan ei tîu, Ama chun ei phurrikhai mi lo sâwng a t'a, hâusak dân, rethei dân, nat-le-sat huna um dân, khawsawt huna um dân, lungngai beidang huna um dân, thi le mangang huna um dân le iengkima um dân a mi lo inchûktir ding a nih. Ring ngam ei tîu a, Ama chu pan ei tîu. Tu khawm Ama beisei le ring ngama pantuhai chu a thlâwnin a'n kîrtir ngai si naw a.
*Lalpa'n a thu ei suklanghai chu ṭûl le ṭha a tî ang takin mal mi sawmpêk raw se.*