LUNGAWINA A KIM THEI NAWH

LUNGÂWINA A KIM THEI NAWH

Mihriem hi duâmnaa sip ei ni a, manî chan tâwka lungâwi hi intak ei ti em em el a nih. Khawp tah, nei tâwk tah, lien tâwk tah tî hi ei nei naw hrim hrim. 

A nei nawhaiin nei tumin ṭhang an lâk a, a nei ta sa haiin nei sâ nâwk tumin ui phîngṭâm angin an invir buoi zing tho a. Chuong ang chun dit tâwk nei lovin, dam sûngin lungâwina ding zawngin châwl lovin, ei thî chenin thil um lo chu hmû le chang tumin, sienkhawm hmû tik um sî lovin thlân khurah ei liempui zung zung el chu a ni hi.

Khawvêl ro thilhai hi Pathienin mihriem lungâwina sukfamkimtû dinga a remruot a lo ni naw chu ni ngêi a t'a, manî dûthusâm ang nei kim ta hai khawmin lungâwina'n an hmang phâ chuong nawh. Khawvêl thilhai hin lungâwina kim mi pe thei hai sien la chu, Pathien hi ei theinghil el ding a nî leiin, chu chu Pathienin a remti naw chu ni ngêi ding a n'a, chuleichun tû khawm hi hâusak leia lungâwina famkim nei ta hi ei um naw hrim a nih.

Sikul nâupang ei nî lai sawrkâr sin hmû beiseiin lekha nasa takin ei inchûk a, sin ṭha ei hei hmu tik le hlak chu nuhmei/pasal neia sûngkuo indin ei nuom nâwk a. Nâu le tê ei hei nei le hlak dit tâwk chu hril lo, hmabâk le beisei ding dang ei hung hau nâwk ting a. Mawphurna le beiseina a hung insâng nâwk zuol a. Manî thil tum ei hlen ta maw ei ti zo leh, nâuhai chungah mawphurna rik tak elin a mi hei del sâ nâwk a, a rik luotin mi tam tak chun thopui zo ta lovin dam sûngin phur rikah an nei sawng phâ ta hlak a nih.

Chuong ang chun, khawvêla hin hâdamna le zalênna tak tak a um thei nawh. Tak chang hmaa beiseina rama ei chêng hun lâi vêl hi a lo inhawi tak lem a nih. Sawrkâr sin khawm hi a nei lo haiin an inhnar a, an hei nei ve hlak chun *"Ka sâwl ka kham, nî tin tina office kâi ngawt el"* ti'n an phunchier a, thaw ding nei loa um âwl ṭawk ṭawk hai dâm kha an zuk inhnar nâwk lem ta mei mei a. Mîhaiin nuhmei pasal neiin nâu le tê le inkei kâwi dala an um dâm chu inhnarin ei hei nei ve sin a. Ei hei thaw ve le hlak chun, *"Nuhmei pasal boa zalên deua ei um lai hun ma ma kha a lo inhawi tak ie"* ti'n ei inhnar nâwk vawng vawng a. Thil um lo zawng le beisei chu ei va ni ngêi.

Fâk le dâwn kawnga khawm ei bobâng bîk nawh. Hme dawng ei hme le hlak hmarcha a'n thak deu ei melkâi nâwk a, hmarcha ei hei hme nâwk le hlak chu inthak tiin chini (a thlum) ei ti nâwk a. A thlum ei fâk zo le hlak, bâu thlum bona ding ti'n talab po uo kuva po uo ei ti nâwk. Ei fâk le dâwn thunna ding leh, mî ei rêl sietna ding leh, ei Pathien thu hrilna ding leh, bâu pakhat chau chun a mi dai ta naw hi a ni tak tah. 

Ei bâu hi zu dâwnna ding dâmin mi keng ta naw sien, thil ṭûl lo thunna ding mei mei hin mi keng ta naw hrim hrim el sien chu, Pathien pawi khawm ei tâwk inkhât phâ deu ding bah. Nuoma a lût thei tî leia a keng taphawt thun lût ei hei tum vawng el ta khawm hi a nih thil buoithlâk chu. Sacrament chu zu noa dâwn hlak a ni ngai nawh. Chuong ang tho chun, Pathien thu thienghlim ei bun suokna ei bâu ngêi khawm hi thil  dangin a sukpawrche ding hi a ni ngawt nawh.

A tâwp taka dingin, khawvêl ro thilhai hi lungâwina kim mi pe theitu pakhat khawm an um naw a, chûleiin ei thil beisei tawphawthai hi hei nei kim vawng ta inla khawm, lungâwina le lâwmna famkim hmu chuong nâwm ei nih. Khawvêl thila ei beiseina a bo vawng hunah, ei lo invâk hmangsan Pathien tho a nih a tâwpah ei la beisei nâwk hlak. Chu phâ chun a nêka beisei ding dang a lo um nawzie ei hung hriet suok tak tak chau hlak. Chuleiin beiseina hring mi petu le lâwmna famkim neitu Pathiena chau hin innghat ei tîu, Ama chu inhnêmna tlâk Pathien hring, iengkim thaw thei, lungâwina famkim neitu a ni si a.

*Lalpa'n a thû mal mi sâwmpêk raw se.*