LOCKDOWN THEOLOGY
LOCKDOWN THEOLOGY
Tûlai boruok le inzawmin ṭawng thar tam tak ei hriet bel sa pha ṭeu a. Chuong ṭawng thar tam tak ei hriet laia a'n lâr zuol deu tak chu *LOCKDOWN* hi a ni el âwm. A umzie hre lo hai khawm hî khuokhirna hnuoia hin ei um seng a nih.
Tlâng suok rak lo hai tâ ding chun thil thar lâwm lâwm ni naw sien khawm, nî tin tina suok loa um thei lo hai tâ ding ma ma hin ningtel a sukumin a thawpik-um zuol. Manî in hotel ang ela fâk le dâwn zawngna le riekna ding chauva lo hmang hlak hai tâ dingin jail bang zût ang hi a ni ringawt. Inrui thei thawhai ma ma lungsiet an umin ngaituo an um.
Biek In kâi ngai lêm lo hai khawmin, ei hei khâr meu chu Biek In ngaiin an kûr inkuk a, khuongpuhai khawmin khuong vuok ding hre ta lovin an nuhmei an nâuhai dâm an vuok khêk nuom zâk el ta a nih. Sikul nâupanghai khawm a sikul châwl chau khawm dit tâwk lovin, lekha tiem chena châwl la dâm an um a. Châwl la nuom rau rau sî chun thabona dâm hi châwl hei la lem inla chu hlâwkpui ngawt ei ti ka ring.
Hieng dâm hin ka lo ngaituo neu neu a; ei nuhmei ei nâuhai uop lum hman ta lovin, khawlai dungah sin pawimaw suonlama hmanga va'n tâp ralin, mani in luma khawm sûng le kuo hai le a ruola thlâithlêng awt tlâng thei ta lo le, thu sie thu ṭha khawm hrilpuina hun khawm nei ta lovin ei um zo ta a, chu hai tâ dinga Pathienin ei invâk darna hmuna inthawkin a mi ko khâwmna am a ni ta ding aw! ka ti a. Chun nâu tam tak chu mani nu le pa thu khawm ngai lo a, nî tin tina khawlai dunga invâk suok a, pawisa châwi dawka hâwn lût chu nei mang sî lova kut bentheka hung inlâwi dâm an um a, chuonga hun hmang zing zing hai tâ dinga inkhuokhirna ni ding dâmin ka zuk ring a. Chuong ang chun Pathienin ei ṭhatna dinga a remruotna khawm ni thei a tih.
Chuong sâ khawm chun, mi tam tak el chu thu âwi nuom lovin a ngâiin hun an la hmang zing a. An thu âwi lo râ chu annî chau ni lovin pawi tâwk lo mi tam takin an tuor pha a, a pawi sei hle a nih. Thil suol thawah inngai naw hai sien khawm, suol lien tak tuolthat tluka thil suol thaw an ni zing si a.
Tûlai chu driver ang vawng ei nih ka ti hlak. A san chu pakhat fîmkhur naw leiin rêng a rama tuor sâ theina a ni si a. Chu chu ngaituo lovin ram tin ram tangah ei tlân lâwr a, ei thu âwi naw leiin thu âwi em em ina inkhum ṭawk ṭawk hai dâmin an tuor pha a, a pawi em em el. Sûng khatah mi pakhat thu âwi naw leiin khawlaiah hî natna hrî hi va kâi sien la, a sûnghai po poin an tuor vawng el ding a nih.
Ei sawrkârpa hi ring nawtu a nî leiin ama thû chu Pathien thû loa ngai el ding khawm a ni bîk nawh. Ei Bible-a khawm rorêltuhai thû thua um ding ei nîzie le rorêltu kal chu Pathien kalna a nîzie thû ei hmu kha. *"Inthâwina nêkin thu âwi a ṭha lem..."* tî ziek ei hmu bawk. Thu âwina hi malsâwmna a ni a, Pathien thu zâwmna khawm a ni bawk. Ṭhat nuom dêr lo ei tîhai dâm hi thu âwi lo hai leh suor khata tla vawng an nih. Ei Bible thû po po khawm hi thuâwina le inṭingmat vawng an nih.
Ei Lalpa Isu Krista khawm kha thi khawp raua thu âwi a ni kha. Chû zâra chun nang le keiin Vân khuo le tui nîna pêkin ei lo um ta hiel a nih.
*Lalpa'n a thû mâwl tea ei zuk suklanghai chu ṭûl le ṭha a tî ang takin mal mi sâwmpêk raw se.*