KRISTA RETHEINA ṬAWMPUI NGAM
ISU KRISTA RETHEINA ṬÂWMPUI NGAM
*Ka hming leiin mi po po theida ni'ng in tih. Nisienlakhawm, a tâwp chena tuor pei chu, chu ngei chu sandamin um a tih.*
~ Marka 13:13
Tienlai ang khan tulai khawvêla chu zâwlnei an um ta naw a, ei Lalpa Isu Krista khawm khawvêla mi'n tlan dinga tiena tlânga a hung bâk kha chu a mithienghlimhai lawr hma chu hung ta ngai naw nih. Ama hnung zuituhai ei nî leiin, a palaihai ei ni a, chûleiin hne taka chu palaina sin thaw chu mi tinin ei mawphurna, hlen ngei dinga ei liengkoa innghat chu a nih.
Thing kâu chu a kûngpui zawm a nî leiin a kûng ngîrna hmun hmuna khan a zawm ve el a nih. A kûng chu hnuoi ṭhatna hmunah a mâwng chun a kâu khawmin a lo ṭhatpui ve a, hnuoi ṭhat nawna hmunah mâwnga a'n ṭhang thei naw chun, a kâu khawm a khâtin a'n ṭhang thei bîk nawh. A kûng le inzawm an ni tlat leiin a kûng um dân dânin a nuom thu khawm ni lovin a um el a nih. A kûng le a kâu a ṭha naw chun matheiloin a ra chenin a tuor pha hlak. Chuong ang char chun, Isu Krista hi a kûngpui a ni a, einîhai hi a kâuhai ei nih; a kûng (Isu) a ṭha leiin a kâuhai (eini) khawm hi ei ṭhat ve a ṭûl a nih. A kûng ṭha sia a kâu le a râ ṭha lo chu a'n nge dâm a ni hlak a, sât thlâk an ni hlak. Chuong ang chun eini khawm ei râ ding anga ei râ ṭha naw a ni chun, ni khat chu sât thlâkin ei la um ding a nih.
Isu Krista nîna ṭâwmpuituhai ei ni leiin, khawvêla a hung um sûnga a thil tuokhai po po kha ei ṭâwmpui ve ngam a ngai a nih. Hmusitna le hril sietna dâm, muolphona le sukdudâna dâm, phîngṭâm le dangchâr dâm, lungngaina le beidawngna dâm le thîna chen khawm ei ṭâwmpui ve ngam ding a nih. A malsawmna chau hi beisei naw'ng ei tîu.
Isu Krista hi inhumhimna le phaw ringawta hmang bîk ding a ni ngai nawh. Pathien nâuhai ei nî tâk lei ela malsawmna hi zuk dawng dêk duok ding tîna a um chuong nawh. Pathien nâu nîna hi fâk ding dâwn ding hnienghnârna le hrisêlna a ni kher naw a, dam sâwtna khawm a ni bawk nawh. Amiruokchu ei tlâksam le ei vângduoi leia Pathienin a mi thlathlam tîna lem chu a ni dêr nawh. Mi tam takin vângduoina an tuok chângin, Pathien an ko a, a dawnna an hmu naw leh Pathienin a ensan ta anga ngaiin an inngai siet pha dêr a, thlarâu rama khawm an châu sietpui pha dêr hlak a nih. Chuong ding chu ni lo tawp a nih.
Isu Krista hnuoia a hung ṭum lai khawm khan, Gethsemani huonah nasa takin a thlan chu thisen anga far hielin a ṭawngṭâi a; sienkhawm hnâwlpêkin a um a ni kha. Rom sipai-haiin an sawisak lai khawmin a Pa Pathienin a tosan dai a, Kraws lêrah dangchâra a khêk khawmin tui dâwn ding a petu ding a nei naw a, thi dinga a Pa Pathien a ko khêk ruoi ruoi khawmin a Pa'n naw tieng a nghatsan dai a ni kha. Amiruokchu a phatsan tîna an' naw a, Isu Krista khât chau tuorna le thîna kha khawvêl mihriem po po tâ dinga damna a ni tlat si leiin a Pa Pathienin chu leia a tosan a nih.
Chuong ang chun, einihai khawm hi natna khir tak tak le harsatna tam tak khawm tuok ei tih; amiruokchu ei Lalpa Isu Krista tuor anga mîhai tâ dinga malsawmna ei nî theina ding khawm a lo ni zing thei. Mîhai tâ dinga malsawmna nî ding chun fâk ding dâwn ding hnienghnâr taka um le hâusak el ul dinga inngaina dâm hi ei nei hlak. A lo ni kher lê chuong chu; kei ngei khawm hi mîhai tâ dinga malsawmna ni thei dingin ka nâupang têta inthawkin Pathien kuomah ka lo hni hlak a, a dawnna chu ka accident tuok kha a lo ni dai. Ka natnaa inthawkin testimony/sermon tui hnâr angin kang chat lovin Lalpa'n a mi pêk a, chu tui chun mi tam tak dangchârna khawm a sukre pha bawk a nih Lalpa zârin.
Hâusak kher khera mî tâ dinga malsawmna nî hi tum naw'm ei nîu a, vângduoinaa ei ngai, hieng natna, retheina, muolphona le rinumna tam tak le thîna hai chen hi mîhai tâ dinga malsawmnaa inchang thei vawng an lo nih. Isu tuorna le thîna kha khawvêl damna a ni ang khan, ei tuornahai hi mîhai damna dinga Pathien remruot khawm a lo ni thei. Vawisûn nia i natna tuor le i rimsikna kha lunginzîngpui el naw rawh; Lalpa'n mîhai damna dinga a hmangruo pawimawa a hmangna che khawm a lo ni thei. Chuleiin ieng ang harsatna tuok inla khawm, inngai sietnaa hmanga vângduoi thila ruot lovin, *"Lalpa ka natna/harsatna chunga hin ieng am hril nuom i nei a?"* hi ti lem hlak ei tîu. Thil iengkim hi Pathienin san neia a siem le a'n tlungtir hi a lo ni vawng hlak si a.
*"Lalpa'n a thu mal mi sawmpêk raw se.*