KHAWVÊL LAWMNA A BO MÊK
KHAWVÊL LÂWMNA A BO MÊK
Ei chêngna khawvêl hi a vânglai hun a'n khêl ta a, a upat tâk em leiin a tar se zo ta a, a sûnga chênghai mamaw khawm a mi phuhrukpêk zo ta naw a, tar nene vuoi angin khawvêl a châwmna nene hi a vuoi se zo ta a, a tui a kangchat zo ta a nih. Tar nene chun nâute nene ne lâi châwm thei ta loa a suklâwm zo ta naw ang hin, ei khawvêl hi a tar tâk em leiin a nene tuiin a mi châwm khawp ta naw a, a mi suklâwm zo ta naw a nih. Khawvêl lâwmna a bo mêk.
Hnuoi ṭawngsephur a nîna hi a ni têlin a hung indik deu deu pei ding a nih. Lâwmna zawnga tlânhai khawmin ṭapna bâk an hmu ta nawh. Pawisa suma insuklâwm thei a ni ta naw deu deu a, hâusakna le thilthawtheina hmanga harsatna hi ching fel thei a ni ta bawk nawh. Khawvêl lâwmna a bo mêk.
Khawvêl hâusakna le ropuina ringawt hi lungawina le lâwmna ni sien la chu, khawvêla ram hâusa le ropui tak, America (USA) khu vawisûn nî hin ṭap inrûm naw ni hai. An hâusaknain an mitthli far khat khawm a dang chât zo naw a, an râlthuom nei ṭhatin Coronavirus (COVID- 19) a do hne bawk nawh. Khawvêl thilthawtheina a bo mêk.
Pawisa sumin thlamuongna a mi pêk thei sî naw chun ieng dinga pawisa sum zawnga Pathien tlânsan hlak am ei ni a? Ei beidawng hunah Pathien tho a ni sia ei zawng nâwk el hlak chu. Khawvêla hin taksa damna tak tak a um ta nawh, thlarâu mî zuk nî leia natna laka himna a ni chuong nawh. Amiruokchu thlarâu damna hi a nih mi tinin ei mamaw tak chu. Taksa damna le hrisêlna hi Pathienin ngai pawimaw sien la chu, natna hrî hi inlêngtir naw nih. A hmangruo pakhat ve a nih. Faraw lululna le a ropuina khawm kha natna hripui bawkin Pathienin vaw deiin a suktlâwm ruoi ruoi a ni kha. Âisân thiemhai a suong tawlawl a, amiruokchu âisân thiemhai thaw thei lo dinga nasain harsatna bel sapêkin a hrem nâwk pei a ni kha. Ei taksa tuor hi Lalpa'n a phal a, amiruokchu ei thlarâu nat ding ruok hi chu a phal ve tlat nawh. Ei thlarâu damna ding a ni phawt chun thîpui khawpa ei nat tuor ding khawm hi A mi phal a nih. Amiruokchu chu chu kher kher chu nghâk nâwm ei nîu. Natna khuma Pathien inhmûpui nêkin dam le hrisêla iengkim thaw thei le sawr theia ei um lai hin Pathien hi hmû tum lem ei tîu.
Mihriemhai hi ei chapoin thil thaw thei le ropui ei inti tâwk ta phât chu Pathienin iengma lo el ei nizie mi hril hriet le mi sie hnuoi a nuom leiin a mi vuok hnuoi hlak a nih. Chu chu thu dik chu vawisûn huna ei thil tawng mêk hin a hril a nih. Vawisûn huna khawvêl suortluon mêktu, COVID-19 damdâwi hi a zawngtuhaiin Pathien râwn pum zinga Ama hming châwimâwina ding le sukropuina dinga hmû suok tuma an bei a ni chun hmu suok an t'a, mihriem hming ṭhatna dinga an zawng suok tum a ni ruok chun hmû tik um kher naw nih. Chuong naw chun mihriem uong râwi ei t'a, manî theina sâwnin, Pathien theinghil râwi ei tih. Chu chu Pathienin a remtî ring a um nawh.
Mihriemhai suolna hi a'n sâng ta em leiin Pathien lungsenna hi ei tawng buok am an' tah tî hi ngaituo tham a tling. Ei suolnahai thupha châwi a, insîra sim hi a damdâwi um sun chu a la ni hrî.
1 Johan 1 : 9-na kha ei hei en chun, *"Ei suolhai thupha ei châwi chun, ei suolhai ngaidam ding le fel nawna po po sâwp fâi dingin Ama chu ring a umin a fel a nih."*
tî chieng takin ei hmu. Chûleiin suol sim lova nuom pâwng ṭawngṭâi taimâk le inhrât rikngawt khan umzie a la nei naw a, ei suolhai insîra sim zet phawt a, thupha ei châwi hmâ chu dawnin um ngai nâwm ei nih. Ei ṭawngṭâi hmâin, ei thil suol thawhai sima bân hmasak phawt a, chû zoa ṭawngṭâi chau ding ei nih. Simna um sî loa insîr hin umzie a nei naw a, ieng angin thupha châwi inla khawm ngaidam ni ngai nâwm ei nih. Simna ṭhang lo chun ngaidamna a um ngai si naw a.
*Lalpa'n a thû mal mi sâwmpêk raw se.*