INNGAITLAWMNA

INNGAITLÂWMNA

*Tû khawm inngaihlu phawt chu tlâwm a t'a, tû khawm inngaitlâwm phawt chu châwimâwiin um a tih.*

~ Mathai 23 : 12

Ei tûlai khawvêl hun tawng mêk le hin ei Pathien thu suklang hi a'n hme khawp elin ka hriet a. Ei hei sui chet chet a, Coronavirus hrîin a hluor zuolna ramhai rêng rêng chu ram changkângna hmun a ni deu zat zat pei. A san tam tak laia pakhat ni ding âwma inlang chu hi hi a nih: 

Khawvêl ramah an ropuiin an lien tâwk ta em a. Manî an inngai hlu taluo ta a, thiemna, varna le thilthawtheina nei an inti tâwkin an chapo ta bêk bêk a. Pathien nêkin hnuoi hâusakna le ropuina an sie sâng ta lem a, iengkim inumtir theitu chu Pathien a nih tî hre fu ta lovin annia inthawka suok vawngah an ngai a, Pathien châwimâwi lovin annî le annî chu an inchâwimâwi ta lem a. Lien an inti tâwk ta bêk bêk leiin Coronavirus lêt tama chîn an lo nî lem daizie hril hrietna dinga thil chîn tak hmanga ringhla ruol lova Pathien sin thaw chu ni ngei a tih.

Khawvêl pumpui tî thei ding deu thaw chu hî hripui hin a sâwi hnîng mêk a, chim siet rup chau ei hmabâk a nih. Kristien tamna ram ramin an tuor nasa bîk khawm a hawi. Mi suol seng seng khawm ni inla, Pathien hi a mîhai chunga hin a thîkthu a se bîk a, ring nawtuhai suolna nêkin an suolna khawm chun A mit a sukkham zuol bîk niin a'n lang. Chûleiin vawisûn huna hripui ṭîbaium tak el hi Kristien tamna rama hin chêt a thaw nasa bîk khawm ni sien a hawi ta hiel el.

Ei Pathien thû bawkin *"Chapona hi sietna hmaah a fe hlak..."* a lo tî angin, mihriemhai hi ropui le lien ei inti tâwk ta em a, ei chapona hin sietna lampui a hraw fûk ta a, chû lampui khawkrawk le inṭên veng vung el chu khawvêlin a hraw mêk a, petekin lam sak lam thlang a dêng thla rawk rawk a, lu haiin tlûk siet el thei ding ngîrhmunah a um ta zing a nih.

Jerusalema Isu châwimâwia a um nî khan a chuongna dingin sakawr hrât tak le Sazuk mâwi tak khawm a thlang thei a, chuong nêka ropui lem khawm a nuom chun a thlang thei bawk. Amiruokchu, Sabengtungte, ran laia inhnuoi tak le tlâwm tak el chu a thlang ta tlat el a nih. Ieng lei am? ei ti chun, khawvêl mit hmuah  a nîna indik tak pho lang a nuom lei le khawvêl ropuina chu mihriemhai angin a ngai ropui ve nawzie a suklangna a ni bawk. Inngaitlâwm ding ei nîzie a practical-a a mi'n chûktirna khawm ni thei bawk a tih. 

Amiruokchu khawvêl mihriemhai chu Pathien mi dit dân letling charin ei khawsak tâk leiin, A lungâwi nawna mei ling chu ei tawng buok ta a, chû râ chu khawvêlin ei sîk mêk chu a ni ta hi. A lungsenna meipui ei tawng buok huna lem chu tuor ruol ni ta naw nih. Khawvêl tâwpnain zui thei hiel el ta'ng a tih. A lungawi nawna boruok ringawt hman tuor lovin thuok insamin ei hranghrui a chat tum el hi a ni a. Mi lien mi lalhai nâk nâkin an thawhla zuol am a nih tî dingin a um. Mi retheihai tâ ding chun fâk insam chu thil thar a ni ta lêm nawh. Chun fâk le dâwn thil ringawt hi einî ringtuhaiin ei damsan tak khawm a ni bawk nawh.

Pathienin mi lien mi lal  nêkin mi chîn le mi hnuoihnunghai a thlang lem rawpna san hi ieng dang lei a ni nawh. Mi lien le mi neinung na ná nà chun mi retheihai nêkin chapona ding an nei râwn lem a, chûleiin mi rethei le mi hnuoihnunghai nêkin Pathien pawi khawm an tâwk râwn lem châwk hlak. Chu chu Pathien theida zâwng tak a lo nî leiin, mi hnuoihnung le chapo ngai lo hai chu a hmang lem rawp hlak a nih. 

Mi hâusa phawt hnâwlin, mi rethei taphawt a thlang hlak ei tîna lem chu a ni chuong nawh. Mi hâusa inngaitlâwm em em el khawm an lo tam ve ang bawk hin, mi rethei chapo ve tak tak khawm ei lo tam ve nalâwm el. A tlângpui thûin mi retheihai nêk chun mi hâusahai chu an chapoin an inlâk lien nuom bîk deu, mani ngîrhmunin lo zir na na na chun. Tîtak ema chu America ram khu, an ropuina sawn chapona tlângah a'n lâwn sângtir nasa taluo tâk leiin, a sîp a tlung ta a, hnûk thlâkin a um mêk zing a nih tî chu khawvêl hmû dân a nih. Chu chu ei Bible thû le khawm a'n persan chuong nawh. 

Thiem le var intîna, hâusak le ropui intînahai ei nei lien taluo ta a, ei suolna a'n sâng taluo chun Vân a tawng thei hiel el ta ding a nî leiin, vawisûn huna khawvêlin a hun tawng mêk khawm hi Pathienin chapona tlâng sîpa inthawka a mi ṭhum hnuoina khawm ni ta ve'ng a tih. 

Chûleiin Pathien hi ṭit a um a, ei chapona tlânga inthawk hin ṭum hnuoi ei tîu a, ei suolhai chu simin insukhnuoi ei tîu. Ei Pathien chu ngaidamnaa sip, insîra suol sim hai chunga lunginsietna inlangtir hlak mî, Pathien ṭha le ringum a ni si a.

*Lalpa'n a thû mal mi sâwmpêk raw se.*