IENGKIMA LAWMTHU HRIL
IENGKIMA LÂWMTHU HRIL
*Ṭawngṭâi fan fan unla, chu taka chun lâwmthû hril pumin ngaiven ro...*
~ Kolossa 4 : 2
Ei Bible-a hin lâwmthu hril dinga infûina thucha hi tam tak el a um a. Ei Pathien hin lâwmthu hril hi a lo lâk run hle chu ni ngêi a tih.
Ei Pathien thu (Bible châng) suklang khi ei hei en a, a ieng ieng hmaa lâwmthu hril dingin a mi zuk phût hmasa nghâl el a nih. Ei ṭawngṭâi lâi zingin, Pathienin a mi dawn le dawn naw thu khawm thlu lova lâwmthu hi hril nghâl ding ei nîzie a mi'n hriettir a nih. Ei thil hnîhai chu hmu saâ inngai a, lâwmthu hril puma ngaiven nghâl ding ei nih tî a mi hril a. Einîhai ruok chun ei ṭawngṭâina râ hi ei hmû hnunga lâwmthu hi hril ding chauva ei ruot a, hlawsama ei inngai a ni chun lâwmthû ei hril naw sawng el hlak. Sienkhawm chu chu ei thaw dân ding an' naw a, ei Pathien thuin a mi zirtir dân khawm a ni bawk nawh.
Lâwmthu hrilna ding hi tiem sêng lo ei nei a nih. Einîhaiin ei hriet naw meia tî thu a nih. Khuo hmu theia mit dâm meng ker kura ei la um lei dâm hin lâwmthu hril ding ei nih. Mitdel hieng zo zâi lai hin i lo ṭhang ve naw hi vângnei inti rawh. Hnâr pângngâia inthuok theia i la um leiin lâwm hle rawh. Khawvêla hin mihriem nuoi tam ventilator hmanga inthuoka la dam hrâm hrâm hi an um khep khup zing a nih. Kea lâwn theia i la um leiin Pathien kuoma lâwmthu hril nasa rawh, tuol suok thei ta loa in le khum nghâk el ta hi sâng tam ei um a nih.
Fâk ding nei loa phîngṭâma i lo um a ni chun lâwm tho el rawh. Bû khawm fa thei ta lo le hnuk khawm sukhnik thei ta lo bu fâk sêng lo nei sî, mihriem a nuoi têl tak meu thî nghâk ringawta zâl an um zing a nih. Fâk ding i lo insam a ni khawmin Pathien zârin phîngṭâmin thi em chuong naw ti nih. Fâk ding i hmû hunah i la fâk ṭeu ding annâwm.
Covid-19 leiin khawvêl a ṭap inrûm a. Mi tam tak el chu an sûng le kuohai le khawm chêng hmunkhat thei ta lovin khum hranin an um a. An harsatnahai khawm an sûnghai kuoma inzâwt thei lovin mâkhât tein mitthli leh an sepui raw tuor tlawk tlawk a. A thihai khawm chu an sûng le kuohaiin ṭâ phâk lovin, lâinatna khawm an chunga suklang thieng lo khawpin hmunhnawk ang elin hre hmangin an um a. Mitthli far khat chau khawm hlaw zo ta lovin, ṭâtu ding boin vân lâia thla ang ela inriengin, santu ding bo ang elin thîna kawtsuo nî tinin mi sâng tamin an pan mêk a. A châng hin chu beidawngin, *"Lalpa i va châng intak ta de aw, i mî hieng zo zâi thîna'n a ṭhuoi hi i lâina naw maw?"* ei ti nuom vawng vawng el. Sienkhawm Pathien hin mihriem dit dân le ngaidân hi a ṭâwmpui ve sî nawh. A mangangthlâk a nih.
Chuong ang chun mi sang tam tak thîna'n a ṭhuoi mêk lâiin, einîhai ruok chu ei ṭhat lei le ei fel lei khawm ni dêr lovin hi natna hripui (Covid-19) laka hin ei la him piel a. Natna dangin mi lo tlâkbuok sien la khawm, hmangaitû sûng le kuohai mi enkawl thei dâmin ei la hei um a. Thîna tuok inla khawm, ruong kîl thei le dit tâwka inṭâ khum thei dâmin ei la um a, chu chu khawvêl fe dân kalphung narân el a ni a. Ei mitthli chu hul hun a la nei vat hlak. Amiruokchu Covid-19 hripuiin a ṭhuoi hmanghai ruok chu an sûnghai ṭâ phâkin an um ta naw a. An sûnghai tâ dingin mitthli hun nî um thei ta ngai naw nih. Einîhai chu nat pângngâi na le thî pângngâia thia inṭâ khum theia ei la um leiin Pathien kuomah nasa taka lâwmthu hril ding hi ei ni ringawt el.
Ieng po tuok inla khawm, ei thlarâu insiem ṭhatna dinga hun ṭha pêka ei la um sûng hin chu lâwm hle ding ei nih. Lungngâi thei, ṭap thei, na thei, ṭâm theia ei la um sûng hin lâwmthu hi bâng loa hril hril ding ei nih. Chuong po po chu hre thei ta lovin hun ṭha'n a mi liempui huna chu, lâwmthu hril ieng ang tum inla khawm, a sâwtna hrim um ta naw nih.
*Lalpaa chun lâwm rawp ro, ti nâwk hlak ka ti lâwm ro!*
(Fillipi 4 : 4)
Lalpa'n a thû mal mi sâwmpêk raw se.