IENG ANG RINGNA AM I NEI A?
IENG ANG RINGNA AM I NEI A?
*Lunginsietna zâra ringnaa sandam in nih, chu chu nangni thaw suok a ni naw a, Pathien thilthlâwnpêk a nih.*
~ Efesi 2 : 8
Pathiena ringna hi ka nei chu ei ti seng a, amiruokchu dampuina khawp a tling chie am tî ruok chu ei infie ngai lêm nawh.
Mihriem taphawtin hrâtna thahrui ei nei seng a, chû hrâtna hmang chun ṭhenkhatin sin hlâwk tak tak thawin sûngpui khat an châwm zo laiin, ṭhenkhat hrâtna ruok chun manî tak ngiel khawm an indam zo naw ve thung. Piengphunga ruol ban lo dâm, chun taksa bawrsâwmna leia hrât naw tak el dâm le kut sin thaw mî lo hrim hrim dâm ei um bawk a nih. Chuong mîhai chun hrâtna an nei seng a, amiruokchu ṭhenkhat hrâtna chun manî indamna khawp khawm a huot dawk zo naw a nih. Chuong ang char chun, ringna nei inti seng seng khawm ṭhenkhat ringna chu damna khawp tling lo, taksa awngrawp le châu ngâwi ngâwi, ei hrilhai anga hrâtna tlâwm, fâk tling lo khawm tam tak ei um a nih.
Peter-in Isu kuomah tui chunga lâwnna thû pe dingin a ngên a, Isu'n chuong anga thû a hei pêk chun Peter chu tui chunga chun a lâwn ta a. Amiruokchu Isu en loa thlipui le tui infâwn a hei en chun a ṭi ta a, tuia chun a pil tla ṭan ta a nih. Isu'n a kutah chelin *"Nang ringna tlâwm, ieng dinga i ringhla am a n'a?"* tîin tuia inthawk chun a kei kâi nâwk a ni kha. Chuong ang chun Pathien hi ka ring ei ti khawmin, Peter angin Pathien tieng en loa khawvêl harsatna le beidawngna tieng ngawt ei en phât phât leh, ṭiin ei thla dâm a phâng hlak.
Natna le thîna leia beidawng mangangna dâm ei tuok a, mi ṭhangpuitu ding Pathien ei ko a, mi'n hawipêk loa a mi tosan ta vung vung phât Pathien chen dâm hi um dinga ei ringhlel châng dâm a um rum rum hlak. Chuong ang huna chun a nih ringna nei inti seng seng hai laia khawm kâr (gap) a hung um ta hlak chu. Harsat mangang hunah ieng ang ringna am ei neia tî fiein ei um ta hlak a nih. Mi hnêm hrât le thiem êm êm el si, sienkhawm harsat mangangna'n a tlâk buok phâta a beidawng awl awla ṭhang dâm ei ni si chun einia inthawka thil suok hrim hrim chu mîhaiin fâk tlâka khawm an mi ruotpêk ta ngai naw ding a nih. Mitdelin mî a ṭhuoi thei naw ang hin, mi beidawng awl chu beidawng le lungngaihai hnêmtu a tling zo ngai naw a nih.
Pathien ei ringna hi Vânram kâina ding chau a ni naw a, zân thim hnuoia mi elvartu ding dâm, lungsen huna inkei dei theina ding dâm, beidawng mangang huna mi hnêmtu ding le lampui indik naw mi kâwk hmutu ding dâma hmang ṭangkâi ding hi ei nih. Lu sûn huna mitthli mi hru fâipêktu ding tak takin a pawimaw zuol.
Covid-19 hripui a hung hrâng ṭan tîr lai khan ieng ang ringna am ei nei tâwl a? tî chieng takin a mi pho langpêk a; mi tam tak, Pastor le kohran upa ngiel ngiel khawm ei tlâwm let dêr a ni kha. Chanchin ṭha khêk suokpui dinga ke pên dawk ngam loa tap kila intawm chawt el kha mi tam takin sinpuia ei nei a ni kha. Thlarâu mî fêt fêta ei lo ngaihai khawm kha hun meua khan chu Pathien khawm an muongpui zo bîk ta nawh. Pathien ringa huoisen tak le muong taka um hai kha chu mi invêta dâm an mi bel lem a ni kha tie. Biek Ina inkhâwm rawt lem kha chu *"Pathien inphatsan ei tîu"* tî ang hlawlin an ngai thei nawh. *"Biek In sûnga chau Pathien a um bîk nawh"* tî kha ei thupui hlapui tak a ni kha. Biek In sûng nêka jail bang zût thlang lem vawng ei ni kha. Tuol suok kha chu silai mu sûr hnuoia va rût dinga tlân dawk ang hiela him loah ei ruot. Khâng hun laia ei Pathien kha Covid-19 laka mi sanhim theitu ding khawma ei ring zo naw a ni tak. Khâng hlawla ringna derdêp hai kha vawisûna la danglam lo vawng chu ni tâwl ding ei n'a; ngaituo ei um ngei. Vânram hi ei inring kâi zo tâwl ngut di'm tî mawl hi an' tah ka thil ngaituo le phur rika ka inei ta chu.
Ei nâupang hun lâia sikul kâi ei rin ang el khan Biek Ina inkhâwm hi ei rin a, ei Biek Inhai khawm a la rê ma ding chu a ni hi. Siksikrieuin hla an mi remsan zo tah. Inzak nachâng hriet a hun tah.
A tâwp taka dingin; Pathien hi ei ring tiet tiet a nih an ti a, ei ring chîn le a chîn a, ei ring lien leh a lien ve el a nih tâwp chin nei lovin. Chuleiin Pathien hi ring ngam ei tîu a, muongpui ngam ei tîu a, iengkimah innghat ngam ei tîu. Ieng ang ringna am i nei a? I thlarâu damna khawp a tling am? Inngaituo rawh.
*Lalpa'n a thu ei suklanghai chu ṭûl le ṭha a tî ang takin mal mi sawmpêk raw se.*