HUN CHAWHNUNG HRILTU COVID-19

HUN CHAWHNUNG HRILTU COVID-19

*Sim ro Vân ram chu a hnâi tah.*

(Mathai 4 : 17)

Tulaia ei hriet lâr em em el Coronavirus (COVID-19) hin indawina le lunginsietna ṭhang dêr lovin nasa takin khawvêl a la rûn zing a. A huoisârin a nun a râwng a, thil a thaw thei a; khawvêlin an do hrawn khawmin ṭit le zâm siet a tum naw a, tlâwm le hnung tawl a tum hrim hrim nawh. Khawvêl sawrkâr a sukluhâi zo a, a hmaa ngîr ngam ding ei um ta naw a, ṭi le inthin pumin a hmaah ei kûn a, ei dawl zawr zo tah. 

Khawvêl ke innghatna râbi a suktlêu a, che hlei thei lovin a ke chêt a khak buoi a, a âi-inkhuop zo tah. Khawvêl bariksamah ṭhâmin a nuoi vir a, hma tieng pan thei lovin luhâiin a petek a, chel ding hre lovin âr khaw thim dâi thawin a'n mai buoi a, tlûk siet rup hmabâkin, lîrhnîng laia  râwlkhoa ngîr angin a'n sâwi dur dur a, chim chau a hmabâk ta a nih. 

Silâi le râlthuom tha hrâtna hmanga do chî a ni naw a, tlawn lungawi thei chî khawm a ni bawk nawh. Tû khawm hi hmêl hriet a nei naw a, a hmû taphawt chu hmêlma angin a en vawng a, him dama insuo hi a tum hrim hrim nawh. Sakei phîngṭâm lai angin a hmû taphawt chu a chil sukpûttu an ni pei vawng. Mi ṭîṭâmum tak a nih.

 

Mihriem anga tlawn lungawi thei ni sien la lem chu, Pathiena ei ringna po po chu inphatin, a hmaa kûnin chibai bûk ngei ei tih. Sandamna le inthleng tuo thei ni sien chu, Isu zawr nuom ding hi tam nasa hle'ng ei tih. Juda Isakariot nêka zuol kâi ding hi tam ngawt ei tih. 

A mik a mak la hre lo nâupang khawmin ei ṭiṭâm a, a ṭhenin nâupang inṭhîna taka ei hmang tah. Nâupang ṭap lai khawm "Coronavirus-in a man ding che, ṭap ta naw rawh," ei hei ti chu, an tlâi ṭâwt el. Ṭha ve tak a nih a ṭhatna nghâla chu. 

Hî natna hin sâp ṭawng takin, "Divide and rule policy" a hmang a, tû khawm um bûm a phal naw a, sûngkhat hnâivâi le manî lainahai le khawm inhnîmhnâi phal lovin hmêlma angin a mi kâr ṭhe zo ta a nih. Hmêl hriet le hmêl hriet khawm lampuiah in mel ṭha ngam lo deu thawin ei inhêl deu duok duok el  chu a ni ta hi. Hî natnain a man hai chu, bâwisâwm nêkin ṭit le ensan an hlaw pei tah. Ei inṭhangpui dân um sun chu inṭawngṭâipui le mitthli puma râl thlîr el chau kha a ni el tah. Hmangaina le lunginsietna leia zuk inṭhangpui el khawm a thieng ta naw a, manî âwkna/thîna ding châng manî vêka kam ang hi a lo ni tah. Hringna le hringna inthleng ang tluk a nih. Chuong ang tawpa chêngna tlâk lo le ram nêlum lo khawvêla chêng ei ni ta mieu leiin, thil ṭha thaw khawm thil thieng lo thaw ang ela thil remchâng loah a hung inchang pei tah. Manî sê sê muol hrangah tî angin, mithî khawm manî le manî ei la'n vûi hun a la tlung vak ding a nih. A va râpthlâk âwm de aw! 

Sawrkârin lock down a puong ṭan nî khan, khaw râusan ang elin khuo a rê dup a. Mihriem a suok invâk ka hmu sun hai khawm chu thlaphâng hmêl putin ka hmu vawng a, khawvêl hi inhmaw vut vuta lâwnin ka hmu a, mi thienghlim lâwr huna thil tlung ding hai chen dâm chu a mi'n ngaituotir a; chû huna chun sûngkaw kimin chung tieng kan inlâwi ngut di'm tî chen dâm chu ka ngaituo kâi ta pei a, lung a'n lêng lâwk a, thawpik a sukumin a mi sukmangang hle. Sienkhawm chu chû thil chu pumpel ruol lova mi tinin ei la hmasawn ding chu a ni si a. A beidawngthlâk a nih.

Mi thienghlim lâwr hun la hmasawn lova, a nêka ṭitum lo lem Covid-19 hripui ringawtin a mi la rûn a, a lâwmumah ngai el ding a nih. Vân ram ticket la nei nawhai tâ dinga hun ṭha le lâwmum tâwpkhâwk kawt mi la hawngpêktua ka ngai a, ka lâwm kawngkhat.

Khawvêl hi hung tâwp thut el ta sien la, a la'n zo zâp lo ding hi a tam lem ei la nih. Nuom khawhri ṭita ṭî ding ni lovin, Pathien mi kona râwla ngaia insiem ṭhatnaa hmang lem ding ei nih. Muongchâng hun a ni ta naw a, nakie tî hun a ni ta bawk nawh. I dam chen ding i hriet sî naw a, vawisûn hi i hun tâwp nî khawm a lo ni ta zing thei. Chûleiin tû hi i tâ dingin hun lâwmum chu a nih. Inpei rawh. Lalpa rorêlna nî chu a hnâi ta si a.

*Hun lâwmumah ka ngaithlâk che a,* 

*Sandamna nia ka ṭhangpui che," a ti si a.*

*Ngai ta u, tu hi hun lâwmum chu a n'a,*

*Ngai ta u, tu hi sandamna nî chu a nih.*

(2Korinth 6 : 2)

LALPA'N A THÛ MAL MI SÂWMPÊK RAW SE.