TU RAWNG AM I BÂWL A?

TÛ RAWNG AM I BÂWL A?

*"...Kei le ka sûnghai ruok chun Lalpa rawng a ni kan bâwl ding..."*

(Joshua 24 : 15)

Rawngbâwl dân hi chi thuma ṭhe theiin a um a. Manî rawngbâwl, mi dang rawngbâwl le Pathien rawngbâwlhai hi an nih. 

Thaw inang le inzât seng seng khawm, a ṭhen chungah Pathien a lâwm a, a ṭhen chunga ruok chu a lâwm ve tlat nawh. Ieng lei am ni'ng a t'a? ei ti chun, Ama rawngbâwl ei ni naw a, manî le mi dang rawngbâwl ei nî lei a nih.

Manî hlâwkna ding chaua rawngbâwl ei ni chun, ieng anga thil ṭha thaw khawm ni inla, Pathien rawng bâwl ei ni thei naw leiin Pathien suklâwm ngai nâwm ei nih. Hming ṭhat nuom lei le mî laka beisei neia thil ṭha thaw ei ni chun, Pathien rawng bâwl ei ni thei naw a, mihriem rawng bâwl ei ni lem. 

Chûleiin thil ṭha thaw nazawng chu Pathien rawng bâwlna a ni vawng chuong nawh. Mîhaiin thil ṭha an thaw a, malsâwmna tam tak an dawng pha a, nangin i thawa malsâwmna i dawng thei sî naw chun inngâituo rawh. Tu am mihriem rawng bâwla Pathien suklâwm thei le malsâwmna dawng ṭeu ṭeu hlak? Mîhai nêka thaw tam le thaw ṭhat lem nî ringawt kha thil ṭha thawna kawngah mîhai va khûmna a ni ngawt nawh. Malsâwmna dawng râwnna khawm a ni bawk nawh. Chu nêkin mihriem rawng ei bâwl râwn po leh Pathien theida ei tâwk râwn ting lem a nih.

Vawisûn nia kohran le khawtlâng tâ dinga nasa taka rawng i bâwl lei khan Pathien lâwm vieu dingin i lo ngâi el thei. Amiruokchu hi hi i ngâituo hlak am? Pathien dit zâwng le lâwm tlâka rawngbâwl i ni am tî hi.

Hlaw chau beiseia rawngbâwltu i ni am? Hming ṭhat le fel hlaw nuoma rawngbâwltu i ni am? Beisei le phût lêt neia rawngbâwltu i ni am? I mizie thupna ding le hmâi fâina ding chaua rawngbâwltu i ni am? Hienghai ang mize puta rawngbâwltu i lo ni hlau chun, i rawngbâwlna kha hlawtling ngâi naw ni a, i'n rim thlâwn el ding a nih. 

Mihriem rawng bâwl chun lukhâwng a nei tlâwm a, a hlâwk nawh. Ei Bible-in *"Sin thawtu chu hmu tlâk a nih"* a lo tî leiin, mihriem rawng bâwltu khawmin lâwmman chu a hmu ve ngêi el, amiruokchu hnuoi lâwmman chu a tlo ngâi naw a, dam sûng tâwi te khawm a dai nawh. Hnuoi lâwmman chu thîna tûr dâma la'n chang thei a nih. Pawisa tam tak ei hlaw a, chû hlaw chu ei thîna ding mana dâm a la'n chang hlak a nih. Nâuhai sietna dinga hmang hun dâm a la hung tlung thei a, khawvêl inhawi chênnaa hmang dâm a hung ni a, Pathien pawi tâwk râwnna mei mei chau dâm a la hung ni hlak hnuoi lâwmman chu.

Pathien rawngbâwl chu lukhâwng a nei ṭha bîk a, malsâwmna tam tak sukhmang thei lo le mîhai mi'n rûkpêk thei lo dawngna a ni a, Vân chena sawm thei a nih. Hieng chan tâwka lungâwi theina dâm, thlamuongna dâm, lâwmna thurûk dâm, hrietthiemna dâm, Pathiena ringna le beiseina nei dâm le malsâwmna dang danghai hi Pathiena inthawka lâwmman se thei lo ei dawnghai chu an nih.

Chûleiin ei thaw ang peia lâwmman hmu ding ei ni a, khawvêl dânin rawng ei bâwl chun khawvêl lâwmman se thei dawng ei t'a, Pathien dâna rawng ei bâwl a ni ruok chun, lâwmman se thei lo, chatuon dai ei la dawng ding a nih. Chuleichun, nang le i sûnghaiin tû rawng am a n'a in bâwl? Inngâituo rawh. Ei thaw ang peia lâwmman hmu ding hi ei la ni si a.

*Lalpa'n a thû mal mi sâwmpêk raw se.*