TU AM I HMÊLMA
"TU AM I HMÊLMA?
*A mi hrilsetu chu hmêlma a ni si naw a, ni sien la chu ka tuor thei lem ding bah."*
~ Sam 55 : 12
Mihriem hi tû khawm hmêlma nei naw hi ei um ring a um nawh. Amiruokchu mani hmêlma indik tak ruok chu hriet a harsa hle.
Ei Bible-in *"Ruol ṭha sukhliemnahai chu ring a um a, hmêlma fâwpnahai ruok chu ringhla a um."* a lo ti a (Thuvarhai 27:6). Hi hin thupui a fûn muk hle el. Mihriem hi ei var tâwk hle taa chu, hmêlma le ruol ṭha khawm ṭheṭhâwp thei lo khawpin ei sûngmit a la'n thim a, a suol le a ṭha khawm thlier hran thei lovin ei la'n mai buoi zing chu a ni hi. Mi hril setu amanî annâwleh mi kâwktu taphawt hi ei hmêlma chai vawng a, ei nîna bâk bâka mi'n pâkdertuhai taphawt hlak hi mi hawihâwm le mi ṭhaah ei ruot a. Sienkhawm, ei hriet lovin ruol ṭhaa ei ngaihai kha a rûka mi hmêlmatu dâm an lo ni lem zing hlak si.
Thu khêl hin thil ṭha a hring suok ngai naw a, amiruokchu mihriem suklawmna dinga ei ṭawng chelek râwn tak ni si a nih. *"Thu dik hril le sa zâng kâp a na"* tî ṭawngka suok hi ei nunin a sukdik hlein ka hriet. Mîhaiin ei tlin nawna le ei tlâk nawna an mi hril met leh, *"E, a ni ie maw!"* tî tum loa theidaa zuk lâk el hi ei chîng rieu. Mani nîna hi manî nêkin mi dangin an hriet lem a, an mi hril naw lem chun mania inhmu suok hi a harsa hrim a nih.
Ka la hriet zing pakhat chu, Pastor Fîmṭhasâng a ṭawngbâu suok kha a nih (a hming hei lam ngat ka tih, hmâisana inpâk thu ni lovin). Thucha ropui tak a tling a nih. A sûnghai kuomah, *"Ka fel nawna le ka tlâk nawna, ka tlin nawna le ka bâksamna in hriethai po po chu ip dêr lovin mi hril ro, theida naw'ng ka tih. In mi hril naw chun manî bâksamna inhriet suok hi a harsa em el..."* ti'n chuong ang hrilna hun a hawng hlak niin ama ngeiin a hril a. Inpâkum ka tî ruol ruolin tluk naw hi ka'n ti nasa. Mi ropui tak chu a va ni ngei. Tluk naw lang khawm, chuong ang lungril chu put ve tumin ka'n chûk mêk a nih.
*"Inpâkna hi ka ta di'n hlêmtu,*
*Hrilsietna ruok chu ka ruol ṭha..."*
tî kha a umzie a man fûk hle ni dingin ka ring. Pa ṭhenkhat nu ṭhenkhat chu mi'n an bâksamna an hei hril kek a, zâwlroa biek ang hlawlin an theida vieu hlak. Insiemṭhat le kâr chu a hla. Mîhaiin an mi hrilsietna hi theidaa lâk el lo a, insiemṭhatnaa hmang chun hlâwkna nasa taka inchangtir thei a nih. Mi'n pâktuhai nêkin mi hril setuhai hi mi siem ṭhatu an ni lem. Inpâkna hin mihriem bâksamna a'n hlietir a, mani nun hluia chêng zingna le chapona dâm a hring suok lem hlak.
Mi'n pâktu tam tak hai hi chu beisei nei lei dâm an ni hlak a, mi fa hektu le mî mit tlung nuom lei mei mei dâma lemchang an ni nuom vieu. Ei hnungah an mi la dem zui hun a la um hlak. Chun mi'n an mi dem amanî annâwleh mi erin an mi do ta chun, an mi tluk naw lei le an mi thîk lei dâm a lo ni hlak a, lawm lem ding ei nih. Ei hnuoia lênghai chu ei rêl ngai naw a, dem khawpa khawm ei ruot nawh.
Hmêlma inthup ni si, sienkhawm langsâr tak hai chu hieng hâusakna dâm, thiemna le varna dâm, inpâkna dâm, chawimawina dâm, hlawtlingna dâm, thilthawtheina dâm, ruol ṭha hau dâm, le a dang dang. Hienghai hi mihriem inkhî dâna chu malsawmna chikhat chu a ni ngei, amiruokchu hienghai hin Pathien hmêl an hliekhu a, thlarâu tâ dinga hmêlma lien takah an inchang rawp hlak. Hâusakna chun Pathien mamaw nawna dâm a mi'n neitir a, thiemna le varna chun chapona a hring suok nâwk a, taksa hrisêlna le hrâtna chun khawvêl thila intlânsiekna tiengah a mi ṭhuoi a, Pathien le kâr inhlatna a nih. Ruol ṭha hau chu suol tienga mi thlêmtu/zâwrtu hauna a nih. Mi siem ṭha theitu le sukse theitu chu ruol ṭha ei tîhai bawk hi an lo ni hlak. Pathien chau ruol ṭhaa nei hi a him tak a, a hlawk tak bawk a nih.
*"Hmêlma le ruol ṭha thlier thiem thei dingin Lalpa'n a thu hmang hin mal mi sawm mawl raw se.*