THÛ LE THILTHAWA RAWNGBÂWL
THÛ LE THILTHAWA RAWNGBÂWL
*Taksa hi thlarâu ṭhang naw chun mithi a nî angin, ringna khawm thilthaw ṭhang lo chun thil thî a nih.*
(Jacob 2 : 26)
Ringna chu thilthaw ṭhang lo chun thil thî a nî ang bawkin, thilthaw khawm ringnaa inthawk naw chun thil thî ve tho a nih.
Rawngbâwl dân hi chi tam tak a um a nih. Thilthawa rawngbâwl taphawt chu Pathien ngâiah thilthawa pawm a ni vawng naw thei tlat. Mit rawngbâwl ei tîhai hi a hming chun thilthawa rawngbâwl chu an ni ve tho. Amiruokchu Pathiena inthawka suok ni lo, hming ṭhat nuomna lei dâm a ni hlak. Farisaihai rawngbâwl dân khawm kha mihriem inkhî dâna chu thilthaw a tling te meu el. Amiruokchu Pathien ngâia chu thilthaw a tling tlat nawh. Chûleiin thilthawa rawngbâwl ei tî tak hi mihriemin a'n khî dân le Pathien inkhî dân hi a'n ang nawh.
A thûin thlarâu inhmanghai hi ei ṭhuoi suok naw chun a takin iengtin am thilpêkin ṭhuoi suok chuong ei t'a? Thilthawa inṭhangpui ding hi ei ni nalâwm el, amiruokchu ringna ṭhang lo, thilthawa inṭhangpui ringawt khan mihriem phîngpui bâk a sukkhawp chuong lêm nawh. Fâk ding nei lo an fâk ding ei va pêk kha Pathien thû a nî lâi zingin, thlarâu khawpna a tling chuong nawh. Chû umzie chu, thilthaw ringawt khawm thû ṭhang lo chun a pangking a, a khingbâi tlat a nih.
Thû le thilthaw hi a ṭhienga inthlawn ding an nih. *"Thû chu tîsain a hung inchang a"* tî angin, a thû khawma rawngbâwl ei t'a, tîsaa inchangtirtû chu Pathien a nî leiin, a thua ei rawngbâwlna khawm ni sien, hmû thei taksa putin a'n changtir ding a nih.
Tîrko, rawngbâwltû a tam lem dai hai hi mi hâusa nêkin mi rethei vawng an ni a, chûleiin an lakah thilthaw (thilpêk) kher kher ei phût a ni chun, anniah fâk ding hmu ngai nâwm ei nih. Thlarâu thil chu taksa hmêl puta hmû thei thil a ni sî naw a, hmû kher ei tum chun hlawsam rawp ei tih.
Thlarâu râ chu thilthawah a'n lang ding a nih. Amiruokchu chû râ chu taksa hmêl puta hmû thei ni kher naw nih. Mîhai sermon-a inthawkin nun hâdamna dâm, chan tâwka lungâwi theina dâm, thlamuongna dâm, chatuon hringna dâm, inremna dâm, inhmangaina dâm, inngaitlâwmna dâm, hrietna le varna dâm, lâwmna dâm le thil ṭha tam tak hril sêng lo ei dawng thei a nih. Chuonghai po po chu thua inthawka hung râ suok vawng an nih. Thilthaw (thilpêk)-a inthawk a ni kher nawh.
Pawisaa inṭhangpui amani annâwleh luong suok dân chi dang danga rawngbâwlna khawm a um a. Amiruokchu chuong khera rawngbâwl chu mi tam lemin ei thei nawh. A thaw theihai khawmin a zo a zâiin an thaw sêng bîk nawh. Hek thei le bo thei thil a ni a, hieng chaua rawngbâwlna hi a tlo nawh. An nei ta naw huna le an phal ta naw hunah an tâwp vak el. Pathien thua rawngbâwlna ruok chu a hek ve thei naw a, ei pêk suok râwn po leh a luong lût ding a tam ting el.
Thû le thilthaw hi mi tam takin ei hriet kâr naw a, thilthaw taphawt hi rawngbâwlnaah ei bel vawng a, a thû chu Pathien thû khawm ni sien, phîngpui khawpna ding ei hmu naw chun thilthawah ei pawm thei tlat nawh. Thuhriltu le rawngbâwltuhai hi a thû chaua rawngbâwl an nî leia zuk hmûsit el ding an ni nawh. Tîrko Pâwla, Peter, Luka etc. hai kha thû (chanchinṭha hril) ngawta rawngbâwl an nih. Amiruokchu thilthawa rawngbâwl Farisaihai lêt tamin Pathien mit hmua chu thil a thaw nasa lem a nih.
Ring nawtuhai khawmin thil ṭha chu an thaw ve tho. Amiruokchu thlarâu le inzawm thil a nî naw leiin Vân ram rim a'n nam phâk chuong nawh. Chung tieng (Vân) thil le inzawmna nei lo chu thilthaw khawm ni sien, thil thî el a nih.
Tûta ṭum chu thû khawm Pathien ngâia chu thilthaw a lo tlingzie ei hei hril uor deu hlek a nih. Hî thû ka hril lei hin, a thawna tieng inthla dul a, thû tieng chaua lo ramṭang tumna lungril nei phâ naw hrâm inla ka nuom.
Ka hril nuom tak chu, ieng rawngbâwlna khawm hi a chîn a lien a um naw a, thû le thilthaw hi thlier hran ding bîk an um bawk nawh tî hi a nih. Mihriemhaiin ei inkhî dân le hmû dân inang naw lei mei mei hi a lo ni lem hlak. Pathien ngâia chu angkhat vawng a nih. Amiruokchu lungril bûkna phahlaa bûk le inkhî tling phawt a ngâi.
Nuom êk tum rik ringawt khawm hi thil um thei ngâi a nih. Thil ṭha thaw râwn vieu taa inngâi inla khawm, Lalpa mit hmua chu ei bûk a zâng vieu el thei a ni aw.
A tam a tlâwm thuah buoi nâwm ei nîu va, Pathien mit hmua a bûk rik zâwng le a hlut zâwnga hin lungkham lem ei tîu. Pathien chun mihriem inkhî dânin a'n khî ve si naw a.
*Lalpa'n a thû mal mi sâwmpêk raw se.*