THILTHAWA HMANGAINA SUKLANG
THILTHAWA HMANGAINA SUKLANG
*Nangni'n in mi hmangai chun, ka thupêkhai chu zâwm in tih.*
~ Johan 14 : 15
Pathien hi a thû chun ka hmangai ti seng ei t'a, amiruokchu thil thawa hmangaitu ruok chu ni seng naw'm ei nih. A thupêk ei zâwm hi Ama ei hmangaina chu a nih. A tâwi zâwngin, thil thawa suklang a nih.
Mihriem le mihriem inhmangaina le Pathien le mihriem inhmangaina hi a'n ang naw deu a nih. Ngaizâwng le ngaizâwng kâra inhmangaina chu thil thawa suklang kher lo khawmin ei inhmangai êm êm thei a nih. Pathien hmangaina ruok chu thil thaw ṭhang loa a thû ringawta hmang thei a ni ve tlat nawh.
Hmangaina hi ei hmang suol nasa khawp el a, Pathien laka hin hmangaina hi thil thawa suklang tum lovin, mani ngaizâwnghai laka dâm thil thawa suklang kher kher ei tum a. *"Hmangaina chun iengkim a huom"* tî hi a ṭha naw zâwnga changchâwiin, mi tam takin an ngaizâwnghai laka iengkim an inhuom a. An thienghlimna chen dâm an inhlân fâi rît a. An ngaizâwnghai laka phal chin neia inro tâwk nei chu hmangaina tluontling a tling zo nawa ngâiin an iengkim el chu, an saruokna chen khawm an inhlân fâi ta ṭhak ṭhak el hlak a nih. Râpthlâk tak chu ei nih.
Hmangaina umzie hi tulâi ṭhang tharhaiin an man phâk ta naw a. Inhmangaina suola dâm an tlu lût ṭuk ṭuk a. A ṭhenin sâwn an thlâk, a ṭhen nâupang tê chauin an inṭhuoi, a ṭhenin an thîpui. Hmangaina hi hmêlma nunrâwngah ei inchangtir hi a ni tak tah. Ei nun a sukkhawhlo zo a, kohran le khawtlângah bawsietna a kei pung a, thîna chen khawm a kei ṭuong sa ta pei a nih.
Mihriem chunga thil ṭha ei thawhai hi a taka Pathien ei hmangaizie suklangna a ni a, thil suol thaw naw inla khawm, thil ṭha thaw nachâng ei hriet sî naw chun hmangaina inthupin Pathien ei hmangai tîna ni'ng a t'a, hmû thei lo hmangaina chu hmangainaa pawm thei ni naw nih. Ei Pathien hi iengkim thaw thei ni sien la khawm, hmangainaa phîngṭâm le dangchâr thei ve a ni a, lungril na ve thei khawm a ni bawk. Chûleiin ei Pathien hi phîngṭâm, dangchâr le lungril na ngâwi ngâwia ei siem châng khawm a lo tam ding a nih.
Pathien hi iengkim neitû ni de sien khawm, nei lo hi a lo nei ve tho a nih. Chu chu ei lungril hi a nih. *"Ka nâu i lungril mi pe rawh,"* ti'n ei lungril thienghlim tak hi pe dingin a mi phût ve ngâwi ngâwi a nih. Pêk ding hi ieng dang khawm ei nei naw leiin, inro loa pe ding hi ei nih. Amîruokchu pêk tlâka thienghlim a ni am? tî ruok chu ngâituo hmasak a ṭûl.
Tûta i lungril puthmang kha mîhai hrieta phawr lang vawng ding ni sien la i ngam chie di'm? I ngam sî naw chun i lungril a la thienghlim tâwk nawh tîna ni'ng a t'a, Pathien tâ dinga inhlân tlâk ni bawk naw nih.
Lungril thienghlim tak putin thil ṭha thaw'ng ei tîu va, chuongchun Pathien ei hmangaina a taka ei suklangna a hung ni ding a nih. Ringna chu thil thaw ṭhang lo chun thil thî a nî ang hin, hmangaina khawm thil thaw ṭhang lo chun thil thî a nih.
*Lalpa'n a thû mal mi sâwmpêk raw se.*