THIL ṬHA THAW RAWH
THIL ṬHA THAW RAWH
*"...Thil ṭha chanchin intluntuhai ke,*
*Tlâng chunga inthawka hung chu a va mâwi de..."*
(Isai 52 : 7)
May ni 23 2020-a ka lekha ziek lo tiemtuhai chun ka chanchin kha ei la hre seng ka ring.
Kum 3 sûng deu thawa ka article (testimony/sermon) ziek sa ka sie ṭhat 500 chuong hiel vawi-le-khata thaw pal thil thua ka sukbo pal chu, Lalpa'n A mîhai hmangin keima kut ngêiah A hming ropuina dingin A mi lo inhlân kîr nâwk tah. Pathienin a mi lo ngâisakzie ka hriet chieng zuol pha a, nihlaw ka'n ti hle a, nasa takin A chunga lâwmthu ka hril a nih.
Ka sukhmang nia ka bei hei dawngzie tak el kha chu aw! Ka ṭawngbâu thiemna'n a hril fie thiem naw hi a ni tak. Ka hmêla ruok chu hawrawppuia nam kâi anga chienga hmu theiin a um. Ka hmêl hmu lo hai chun ka chan kha mi dâwnpui phâk naw ni hai a, ka hmêl hmutuhai ruok chun an chunga tlung ang tluk hielin mi hrethiempui si'ng an tih.
Khâ nia ka chunga thil tlung kha ka mang ni sien la ka tî rum rum kha a n'a, vawisûn nia thil tlung ruok hi chu ka mang ni pal râwi a tih tî ka'n lâu ve thung tah. A dân a dang ta ngêi el.
Mi pe kîrtu chu Pathien ni zing sî sien khawm, A hmangruo pawimawa a ihmang keima kut ngêia mi hung inhlân sâwngtu hming khawm hril hmai chî ni bîk naw nih. Mi lo hrethiem sien la, a chungah ka lâwm bêk leiin, hmâisana inpâk thû ni lovin, ka lâwmzie inentirna ding chauvin ni lem raw se.
Beiseina bo tak le beisei angreng tak sîin lungâwpinkâia ka um lâiin, ni 24 zân khan phone ka dawng nawl a. Mi hung phone-tu chu tû dang bêk bêk lo ni lovin, Christmas tûka Christmas gift mi pe dinga mi hung zawng dawk ngattu mi fel em em unâunu Darrokim (pu S.N. Ngurte naunu, ka group chanpui lâia mî, pî Dr. Dony a sangnu) ngêi el kha a lo ni a. Ka lekha ziek sukhmanghai po po chu mi zawng suokpui vawng a'n huom thû a mi hung hril ruol ruolin, chû zân mâ chun kum chenve sûng deu thawa ka ziekhai chu a mi hung thawn zui ta nghâl a. Châu hnêpa hun sâwt tak ka sâwl ka kham khawm ti lova a mi'n rimpui râ chu, keia hmêla hin a lo inlang suok pha ta hiel a nih. Ni 2 sûng chauvin ka thil sukhmang po po chu hmêl hem dêr lo le a bo a bâng um hlek lovin, ziek thar hlawk angin a kut mâwi tak el chun keima kut thlâkthlâi lo taka chun a hung inhlân fâi ta vawng el a nih. Nâupa tlân hmang hung inlâwi kîr a pa'n a lo lâwm lût ang el khan lungriem mitthli leh lungsie takin ka lo pawm vawng vawng a nih.
Unâunu Dârrokim chungah ṭawngbâua ka hril nêka nasa lemin ka lâwm a, hril thiem ruol lo khawpa nasain a chungah ka lâwm tak meu meu a nih. Malsâwmna chun a hlimthla angin mâksan ngâi naw sien la, hrisêlna le dam sâwtna chun tangka hmâi hni anga ṭhe thei lo khawpa nghetin tar kûnin ruolṭha angin chel zing raw se. Hmu kîr nâwk theia ka umna san hi mi tam takin in mi lo ṭawngṭâipuina zâr lieu lieu hi a ni a, ka lâwm satlie naw a, ka lâwm tak meu meu chêu a nih. Lalpa'n tam takin mal sâwm raw se chêu.
Unâunu Darrokima inthawkin inchûk dawk ṭha tak ka nei a; chu chû, mi pakhat lei chauvin mi tam takin an tuor pha thei a, mi pakhat zâr chau bawkin mi tam takin malsâwmna an dawng thei a nih tî hi. Unâunu Dârrokim zârin ka lungril hliempui tuor chu sukdamin a lo um ta a, chû zâr pei chun mi tam takin malsâwmna an la hung dawng pei ding a nih.
Chûleiin thil ṭha thaw hi nghawk nâwm ei nîu. Kei ka khât chauva ka thil ṭha thaw hin kawngro suk naw nih tî el ding an' naw a, mipui kut nghâk el ding a ni bîk nawh. Khawvêl hi mi pakhat chau leiin ṭawngse phurin a um a, mi pakhat zâr chau bawkin sandamin a um pha bawk a nih tî hi hriet tlat ding a nih.
Mosie zârin Israel-hai Aigupta sala inthawka ṭhuoi suokin an um a, Noa zârin khawvêl mihriem le a sûnga chênghai po po bo ral ding humin an um pha a, lal David zârin Goliatha le a râwihai hne chimitin an um bawk a, Lal Isu zârin chatuon hremhmun chang dinghai Vân khuo le tui nîna pêkin ei um ta a nih.
Chûleiin mi tam tak hai tâ dinga sietna intlun theitu le malsâwmna petu i ni thei zing a nih tî hi ngaituo la, i mawphurna rikzie hi inhmai ngâi bawk naw rawh. Mi pakhat leiin khawvêl hi se rup thei a nih tî hrein fîmkhur takin thil ṭha thaw tieng hin intlânsiek ei tîu. *"Sunhlu kûngah sunhlû bawk a râ"* tî angin, thil ṭha thawtu chun thil ṭha bawk a'n râ suoktir hlak si a.
*Lalpa'n a thû mal mi sâwmpêk raw se.*