THIL ṬHA CHUN THIL ṬHA BAWK A HRING SUOK HLAK
THIL ṬHA CHUN THIL ṬHA BAWK A HRING SUOK HLAK
*Thil ṭha ngun taka zawngtu chun ditsakna a hmu a,*
*Amiruokchu pawi tâwkna zawngtu chunga chun sietna a tlung hlak.*
~ Thuvarhai 11 : 27
Thil ṭha chu mi tinin ei dit seng a, mi suol tak hai khawmin mi lakah thil ṭha an beisei ve seng.
Mi suol khawmin mi ṭha ei dit a, mi ringum lo khawmin mi ringum ei dit a, khêl hril hmang le hlêp ru hmang khawmin mi indik tho a ni ei dit le ei zawng tak chu.
Pasal zu dâwn mî chun nuhmei dingin zu dâwn mî a dit chuong naw a, nâu dukdak lo neitu khawmin mo ṭha le fel tho a ni an nih. Mi hrângsie khawmin mi zâidam le nunnêm ei dit a, tîsa mî deu khawmin thlarâu mî tho a ni ei thlang chu.
Chuong ang chun mi tinin thil ṭha hi ei dit seng a nih. Thil ṭha ei dawnghai hi Pathiena inthawka malsâwmna a nî lâi zingin a ni vawng chuong nawh. Indik lo taka thil ṭha hmutuhai tâ ding chun malsâwmna a tling nawh. Amiruokchu chu chu hre lovin, kut thieng loa ei lam suokhai chen khawm malsâwmnaa tiemin, Pathien kuomah inhlânna le lâwmthu hrilna dâm ei hei nei hlak hi chu Pathien ngâia chu tirdak a va um nasa âwm ngêi de aw.
Ei thupui le inpelsawl metin ram tin ram tang ei pet lâwr ding a nih. Sienkhawm pêt hmang chuong lêm sî lovin, hme bâwlhlo angin annî chitah rim inhnikna an pâi a, ei ṭâmna mi hnêmtu dinga vitamin ṭha vawng tho an nih.
Aw leh, thil ṭha hi mi tinin ei dit seng ei ti ta kha. Amiruokchu, thîr hîpna chun ama angpui bawk a hîp hlak hlak ang hin, thil ṭha chu thil ṭha chau bawkin a hring suok hlak. Chûleiin thil ṭha thawtu chun thil ṭha a hmu hlak a, thil suol thawtu ruok chun thil ṭha lo a sîk hlak. Thlâi chî chu ei tû ang char ei sîk hlak ang hin, mihriemhai khawmin ei thil tû râ bawk a nih ei sîk hlak chu.
Thil ṭha hi ei damna ding le Pathien châwimâwina dinga thaw ei ni a; inpâk le hming ṭhat hlawna ding chauva thaw ding hi ei ni nawh. Mîhai hmu hawia chau thaw ding ei ni bawk nawh. Mî hmû naw lâi khawma thaw ding a ni a, hlâwkna ding chauva thaw ding a ni bawk nawh. Hmû kîr lo ding le mîhai hriet lo khawmin a rûkin mî chungah thil ṭha thaw hlak ei tîu. Beisei le ngiet neia thil ṭha thawtu chun Pathien a châwimâwi naw a, setan rawngbâwltu a nih.
Nuomin nuom naw inla khawm, mi tinin ei thil thaw ang pei hi ei hmu kîr ding a ni sî leiin, thil ṭha ei beisei a ni chun thil ṭha hi thaw el ding a nih. Pathiena inthawka suok lo ni kher naw sien khawm, thil ṭha thawtu chu malsâwmin a um ngêi ngêi hlak, Vân kâina êm ni naw sien khawm, hnuoi malsâwmna a nih.
Ei Pathien thû khawmin hieng ang hin a lo ti a: *"Chuongchun thil tinrêng mi'n in chungah an thaw dinga in dit ang peiin, mî chunga khawm thaw ve ro..."* (Mathai 7 : 12)
I chungah thil ṭha lo dâm a lo tlung a ni chun, mî chunga i thil thaw râ i sîk ta tîna khawm a lo zing thei. Mânî inen nawn hi ei ṭûl ta tak zet a nih. Ei chunga thil ṭha naw tlung taphawthai hi ei thil thaw râ vawng a nih lem chu ei ti nawh. Amiruokchu malsâwmna dawng tlâka khawsa hlaktu chu malsâwmnain hlimthla angin a zui ve naw thei nawh. Mî malsâwmna dawnghai hi an vângnei zuk tî el ding khawm an' lê, an thil thaw ṭhat râ a ni chêk hlak, mî thaw râ a ni bîk nawh. Nâu ṭhenkhat chu lo suol dê hai sien khawm, an nu an pâhai malsâwmna dâm an ṭâwmpui ve châwk hlak. Vân manna anga chung tienga inthawka hung tla thla el a ni bîk naw a, mi pakhat thil thaw ṭhat râ kha a la ni tho tho.
Pâhai/nuhai malsâwmna kha nâuhaiin ei lo tlân ve phâk ang bawkin, an vângduoina khawm ṭâwmpui naw thei a ni bîk nawh. Chûleiin nâuhaiin malsâwmna an dawng theina ding chun, nu le pâhaiin an zir a ngâi a nih.
Thil ṭha thaw hi nghawk nâwm ei nîu, ei nghawk a ni chun malsâwmna ei nghawk tîna ni'ng a tih. Chuleichun malsâwmna ei beisei sî chun thil ṭha thaw hi nghawk ding ei ni nawh. Malsâwmna chu thil ṭhaa inthawka suok a ni si a.
*Chuongchun thil ṭha thaw chu nghawk nâwm ei nîu, ei inthlada naw chun a hun taka chun ei la sîk ngêi ding a nih.*
~ Galati 6 : 9
*LALPA'N A THU MÂWL TEA EI SUKLANGHAI CHU THAR TAKIN MAL MI SÂWMPÊK RAW SE.*
June 10, 2020