SUKHMANG THEI LO

SUKHMANG THEI LO

*"Bu bo hmang nâwk el ding zawngin inlap rak rak naw ro, chatuon hringna chena um zing ding bu, Mihriem Nâupa'n a pêk ding chêu chu zawng lem ro..."* 

(Johan 6 : 27)

Ei damlai khuolzin lawng intâwl mêka hin, khawvêl buoina tuipui infâwn vêl kârah, pil vâng vângin Coronavirus thli siein nasa takin a mi nawt buoi ve mêk zing a. Chu lâi kâra chun, *"Mâni tum tâwk vân zêmah"* tî ang deuin, keima tâwka buoina ka lo tuok ve sên a.

Zâni (May 22, 2020) lâi el khan vângduoithlâk takin kum 3 sûnga ka sermon/testimony ziek ta sa hai po po whatsApp-a ka lo sie ṭhat, lockdown zo chara pen drive-a thun dinga ka tî chu, vawi-le-khatin thaw pal thil thuin ka sukbo fâi vawng el chu a hril haithlâk el chau khawm ni lovin a mangangthlâk ngêi el.

Ka mang ni sien la ka ti rum rum el. Dik taka hril ding chun, manga mangphan ding ringawt khawma ka idit lo thil kha a n'a. Mihriemin ei thil dit nêkin ei dit lo thilhai hi ei hmu râwn lem hman hman hlak a nîzie dâm chu ka ngâituo suok a. Chûleichun ka thil tuok hi mak ka zuk ti chuong lêm naw a, amiruokchu ka pawitîna a sukbo pha chuong si nawh.

Mîhai thaw dân angin nakie tienga a bû dâma siem tlâk a la ni ngâi chun a ṭha âwm ema tia lo sie ṭhat ka ni a. Mîhai phâkin a bua siem tlâk ni naw sien khawm, keima kutsuok hi nakie tieng dama khawvêl ei la hmang pei a ni chun, hmû nuom hun le mamaw hun dâm ka nei ding a nih tî ka ring leiin sie ṭhat hi ka tum hrim hrim kha a n'a. Sienkhawm kum 3 sûnga ka kutsuok ka tî thei ve sun chu, mit khap kâr chauvin iengma loah a'n chang ta vawng el a nih. Hieng ang tho hin mihriem hringnun khawm hi mit khap kâr chauva bo el thei ngîrhmuna um zing ei nih tî dâm chu ka thil tuoka inthawk chun ka hung hmu fie deu deu a. Khawvêl ngâi nêpna le Vân ram ngâi hlutna a ruolin ka nei pha hiel a nih.

Ka thil sukhmang ka zuk inpâm bêk bêkna san chu, kei ka mihriem thiemna ringawt hmanga ka ziek suok khawm ni lo, Pathienin a mi pêk lieu lieu, damnaw khuma natna inrik takin a mi tlâk buok lâia ka ziek dâm an ni tâwl a. Uong thû loah, mi tam takin nun danglam phana dâmin an lo hmang hiel kha a n'a, Thlarâu thienghlim mi'n ziektir nia ka ngâi leiin ka'n ro ngâwi ngâwi el a nih.

Natna inrik tak tuora ka hlaw dawkhai po po kha mit khap kâr chauvin kîr ta lo dingin romei angin an inzâm ral ta a nih. Ṭapa ko kîr thei ni sien la, ka thisen po po hi mittuia inchangtir thei ni bawk sien, sûm lo chat lovin sûn zân ti lovin ṭapin râwl tâwp insuoin ko ngêi ka tih. Sienkhawm mi thi ta hnung ko har tum ang lek hi ka ni ta sî, kîr zâi rêl ta naw ni a, a beidawngthlâk a nih. 

Hringna nei khawm ni lo chu, chû nî chun khawsâwt takin ka sûn a, thil dang khawm ngâituo mumal thei lovin a mi siem a, a mi sukrimsi thlâwt el. 

Chanchin hi keima tâwkah hril ding ka hau ve em em el a, chanchin mak le narân, lâwmum le lungngâium, ropui le râpthlâk tak tak hi tuok naw mang ka nei ta naw a, thîna chen khawm lo intem phâk ve hiela inngâi ka ni tah. Chûleiin Pathien zârin tuorselna kawnga khawm sel tak ni tain ka'n hriet a, hrietthiemna khawm hi ka hau ta hlein ka hriet bawk. Vângduoinaa ka lo ngâihai khawm kha Pathienin training a mi lo pêkna a nih tî ka chieng deu deu tah. Malsâwmna danglam an lo va ni ngêi.

Ka thil sukhmanga bawk khan hei lût nâwk inla; mak takin Lalpa'n hrietthiemna a mi pêk a. Ka hrietna, ka thiemna, ka kut ka ke le ka taksa bung pakhat khawm inhmang loa kim taka ka la nei hi lâwm ding ka nîzie dâm a mi'n hriettir pha a, nuor thei ding zie zâng hi ka ni ta nawh. Lâwmthu hril sêng lo bat ka lo neizie dâm ka'n hriet suok thar a, piengtharna chi khata piengthar ka nih.

Khawvêl thilhai hrim hrim hi a se thei naw le sukhmang thei naw pakhat khawm an lo um nawh. Mihriemin an sukbuoiin an inrûk hmang thei bawk. Krista nun neituhai ruok chu ieng thil khawmin a sukbuoi thei ta naw a, suksiet le inrûk hmangpêk thei an ni bawk nawh. Thlamuongna, chân tâwka lungâwi theina, hrietthiemna, tuorselna, hlimna le lâwmna, inngâitlâwmna, taimâkna, lunginsietna le hmangaina, ringna le beiseinahai po po hi Krista nun, se thei lo, sukhmang thei lo le inrûk hmang thei lo, Vân ram chena ei la sawm ding thilhai chu an nih.

Mi tam takin Pathien nêka tangka sum hi ei ngâi ropui lem a ni a, sienkhawm hringna a'n châwk thei naw a, thlamuongna le hâdamna khawm a'n châwk thei bawk nawh. Damdâwi taphawt inchaw thei sien khawm, damna ruok chu a'n châwk thei tlat nawh. Hi lei hin inhnêmna tlâk an' nawh tî hrein mi tam takin lekha ṭha lo ang elin hmun ṭhenkhatah an pei dar uoi uoi tî khawm ei hriet.

Khawvêl hâusakna le thilthawtheina chu hmang tlâk lo hun dâm a la hung um hlak a, suksiet hun le sukhmang hun dâm a la um ngêi hlak bawk a nih. Chûleiin ei Bible khawmin bo hmang nâwk el ding zawnga inlap rak rak lo dingin a mi'n fûi hrim a nih. 

Chuleiin ro se thei le bo hmang nâwk el ding thilhai hi hnawt hnawt lovin, ro se thei lo ding thilhaia hin lungkham lem ei tîu. Vân ram chena ei la sawm ding an la ni si a.

*Lalpa'n a thû mal mi sâwmpêk raw se.*