PENTIKOS DAY THUCHA

PENTIKOS DAY SERMON

*Chun Pentikos nî a hung tlungin, an rêngin lungril hmunkhat putin, hmunkhatah an um khâwm vawng a.*

(Thilthawhai 2 : 1)

Pentikos nî hi Isu Krista'n a ṭhuoihruoihai Vân tienga a kâisan nia inthawka tiemin a ni 50-na char a nih. Isu Vân tienga a kâi hma khan, a zirtirhai kuoma a lo hril lâwk angin, hî nî hin Vâna inthawkin thlipui nasa tak angin a hung tlung ta phut a. Chuongchun mipui um khâwmhai lu chunga chun fuin, chawplechilin thlarâu thienghlimin an sip ta vawng a.

Chuongchun mak takin hnam tin chi tin um khâwmhai chu hnam khat angin an ṭawng an inhriet paw ta vawng a. Thlarâu thienghlimin a'n ṭawngtir dân dânin an ṭhawng a. Chuonga inzi nêi nuoia an um lâi chu mi ṭhenkhatin lo hmuin uoiin inrui dâm an lo sâwn a. Thlarâu thil chu khawvêl mîhai hriet phâk lo thil a ni si a.

Isu'n Peter kuomah *"Nga man ta naw ti ni a, mihriem mantua ka siem lem ta ding che a nih,"* a lo tî ta angin, chû nî chun Peter-in mî 3000 lâi zet ring thar-ah a man a. Isû bawkin *"In chungah thlarâu thienghlim a hung tlung pha, thilthawtheina la nei in tih,"* a tî kha Peter chungah a hung tlung indik nâwk ta pei a. Kebâi lâwn thei lo chu Isu hmingin a sukdam nghâl a. Chuongchun a thil mak thaw chu mîhaiin hmuin a thuhrilhai khawm chu an hung ring pha ta pei a. A ni têlin ring thar an pung pei bawk a. Isu Krista ringtu pâwlah an inpêk ta ṭuk ṭuk a.

Chuong ti taka ring thar an pung hrât em lei chun Juda-hai le thiempu lalhai ngâimaw a tling ta hiel a. Chuongchun, Juda-hai rorêlna inpui (Sanhedrin) hmaah Peter le a sangâwi zâwnpui Johan chu an ngîr pha ta hiel a. Lung inah zân khat an khum hnungin Isu Krista chanchin hril ta lo dingin thû an pêk a. Nisienkhawm Peter le Johan chun, *" Keini chun thil kan hmû le kan hriethai chu hril lo thei kan ni nawh,"* tîin huoisen takin an dawn a. Isu Krista chanchin chu hril ta lo dinga an vau hnung chun an insuo nâwk ta a. Sienkhawm a hma nêka nasa lemin thî ngam lu putin Isu Krista chanchin chu ṭhahnemngai takin an puong dar ta sau sau lem a nih.

Thlarâu thienghlim hi a huoisen a, martyr khawm a ngam. Chûleiin thlarâu thienghlimin a chên chil ta hai hrim hrim chu mi zâwizep an um ngâi nawh. Peter khawm kha thlarâu thienghlimin a kan hma khan chu a dâwizep a, an zirtirtupa Isu khawm vawi thum lâi a'n phatsan a ni kha. Pentikos nia thlarâu thienghlim a changa inthawk khan a huoisen ta em em a. Dâwizepna thlarâuin a mâksan ta a, *"Isu Krista thî dâna thi tlâk khawm kan' nawh,"* tia Kraws-a a letlinga khâi hlum thlanga martyr chang ngat a ni kha.

Tlân siet puma *"Isu hnung ka zui"* tîhai hin ieng ang thlarâu am a ni ding chu an chang hi. Martyr chu hril lo, thil chîte chân le zuk tuor met khawm inlâu dawr dawr hi ei ni tâwl an' naw? Thlarâu chang inti sî thlarâu râ manî nuna hmû ding um dêr sî lo hi ei va tam ta de. Ei thlarâu kawlhai hi Vânin a  inhmêlhrietpui lo dâm an lo ni miel chun a pawi nasa hle ding a nih. Thlarâu râ ei Bible-in a hrilhai kha manî nun leh en mila inenfie hi a hun ta tak zet el. Nakie Peterin thlarâu thienghlim a chang hmaa zâm siet puma Isu hnung a zui ang kha ei ni hlau chun, Peter let tama nasa le muolphothlâk lemin Isu hi ei la'n phatsan ve ngêi ding a nih. 

Ieng ang thlarâu am a n'a ei chang? tî hi inenfel a hun ta tak zet zet el. 

*Lalpa'n a thû mal mi sâwmpêk raw se.*