PATHIEN TÎ ZÂWNG HNÎ HI HLAWTLINGNA A NIH

 PATHIEN TÎ ZÂWNG HNÎ CHU HLAWTLINGNA A NIH

*Hni ro, pêk ni'ng in tih; zawng ro hmu'ng in tih; kik ro, kawt chu hawngpêk ni'ng in tih.*

- Mathai 7 : 7

Ei Pathien hi suol deu ṭha deu, tiktlai deu tik se deu, nun nêm deu nun râwng deu, ṭitum deu nêlum deu ni bawk si a nih. 

Pathien ni sien khawm, mihriem ang mize put ve tho a ni a, inang nawna tam tak nei inla khawm, inangna khawm tam tak ei nei ve bawk a nih. Mihriem angin a lungawi lai chu a biek khawm a'n hawi a, a lungsen huna ruok chu ṭîṭâmum tak ni nâwk si a nih. Mihriem chu mî chungah ei lung a âwi hle chun an sietpui ding chen an mi hni khawmin ei inro ta ngai nawh. Zu man ding le damdawi inruithei man ding khawmin ei inro nawh. Pathien ruok chu ei chungah a lawm lai tak khawmin ei sietpui ding thil chu a mi thawpêk nuom naw hrim hrim. Chu chu eini'n hrethiem thei lovin Pathienin nâ a mi suksêtsan niah ei ngai a, ei vûivâi pha hlak. Nâupangin chem an mi ngên a, an sietpui ding ngaituo loa an lungawi naw inlâu lei rîkngawta ei pêk el chun insukhliem phana dâmin an hmang hlak a nih. Chuong ang chun Pathien chun ei lungawi naw a'n lâu ve naw a, a nâu duot lâi ni inla khawm, ei natpui ding le ei sietpui ding thil chu a mi pêk phal naw bur el a nih.

Pathien lungni zâwng ka lo hni fûk chu ni ding a n'a, mak takin ka thil dit dit le ka ngên ngên chu ieng anga vâng khawm ni sien, a umna hmuna hmû ta sa va lâk ang elin ka va zawng hmu chawt chawt el hlak a nih. A man ding khawm ka nei lai tak leh a lo intuok ve pei bawk. Ei sietpui ding thil ni lo chu hnî dawk a lo inhawi nasa a nih ei Pathien hi. Tlân hrâtna tî lo phawt chu Pathienin ka thil hnîhai hi a mi la remtipêk pei niin ka hriet. Ka hmu pei bawk.Taksa hrâtna hi fâk zawngna ding le Pathien hming sukropuina ding khera induong a lo ni naw khawm chu ni naw ni'm, ka accident tuok leia ka hrât thei naw hi mi sukhrât el khawm a tum chuong lê. *" A hrât lai nêk khan hienga taksa châu taka a um hin ka tâ dingin a ṭangkâi lem"* Pathienin a mi tî khawm chu ni râwi naw ni'm. Ka hrât leh Ama ka'n vâk hmangsan hrât ve pei leiin, natna le hrât nawna hruihruolin a mi khuop de ta hlawl el a ni âwm hi ka ti a, ka hrât nawna chunga hin ka lung a âwi êm êm hlak.

Ei Bible-in *"In hni indik naw leiin in hmu naw a nih..."* a tî angin, manî ropuina ding le inhawitîna ding ringawt dâmin ei lo hni hlak a, chûleiin ei ṭawngṭâina hi hlawsamin a um hlak a nih. Pathien lung thlu zâwnga ei hnî a ni chun, *"In dit dit hni ro*" a mi tî sa a nî leiin mi hlêm naw tawp a nih. Ring zo tak le lungril thienghlim tak puta ei hnî a ni chun ei tâ dingin Lalpa'n ieng khawm inro naw nih. A nâu nei sun hman inro lo chun thil dang lem chu ieng am in ro a t'a? 

Einî sietpui ding thil el khêlah, Ama hming sukpâwina ding thil khawm mi pe ngai naw nih. Pathienin Ama hmêl hlietu ding thil chu mi pe nuom naw ni a, Ama hming ropuina ding a ni phawt chun ei thî khawm a pawisa nawh. Ei rimsik tuor lem chu pawiti nâwk naw zuol a tih. Mihriem taksa hi pil el a ni a, chûleiin ei Pathienin mihriemhai angin a ngai pawimaw ve naw a, amiruokchu ei thlarâu kher hi chu a ngai pawimaw nasa a nih. Mihriem taksa thî hi Pathien chun thînaa khawm a ruot naw a, ininnghil ang mei meia a ngai a nih. A ni ngei luo a, ei la tho nâwk ngei ding leiin a in chu ei ni te meu el. Amiruokchu hremhmun fe ding dâmin tho nâwk pal ei tih inlâu a um.

Ei tî tâk ang khan, Pathien dit zâwnga ei ṭawngṭâi a ni chun hlawtling ngei hlak ei t'a, a ni naw ruok chun Elija Vâna inthawka hung ṭumin, mi ṭawngṭâipêk sien la khawm, dawnin um chuong naw nih. Pathien dit zâwnga ṭawngṭâi dân chu, mani sietpui ding le Pathien hmêl sukhem thei ding naw zâwnga ṭawngṭâi kha a ni'l. A tâwi zâwngin, manî ropuina ding le inhawitîna ding ringawt ni lo a, Pathien chawimawina ding le sukropuina ding zâwnga inchang thei thil hnî kha a nih. Ei thil dithai chu hni'ng ei tîu a, Pathien dit zâwng leh a lo inkal naw a ni chun pêkin ei um ngei ding a nih. Chu ding chun lungril thienghlim tak put le ringhlel lovin hni hlak ei tîu. 

*"Vaâkhai hi ngaituo ro, bu an tû ngai nawh, an sîk ngai nawh, bupanghai, bu inhai khawm an nei nawh; nisienlakhawm Pathienin a châwm si a. Nangni chu vatehai nêk chun in hlu lem naw di'm a nih?"*

Luka 12 : 24

Lalpa'n a thu mal mi sawmpêk raw se.