PATHIEN HRIET LOIN THIL A TLUNG NGAI NAWH
PATHIEN HRIET LOIN THIL A TLUNG NGAI NAWH
Mihriemin siet ei tuok hunah, mi hung kan dinga ei lo beisei èm ém ei sûng-le-kuo le ruol ṭha ei lo tîhai hmêl hmû ding um loa makhât chaua mal ngâwi ngâwia ei um châng hin, ei thla dâm a se a, ei inngai se rawng rawng hlak.
Chuong ang ngîrhmunah ei um lâi khawmin Pathien chun a mi hriet zing a, ieng thil khawm hi Ama mi hrietpui lovin a tlung ngai nawh. Pathien chun iengtik lâi khawm a mi thlathlam ngai naw a, ei bulah a um zing a nih. Eini'n ei mâksan lem hlaka a nih. Ei bulah bu le hme fâk ding a um zing a, fâk nachâng ei hriet si naw chun ṭangkâina a nei chuong naw ang hin, ei bul hnâia Pathien um zing hi pan le râwn nachâng ei hriet si naw chun, makhâtin phur rik tak phur zing ei t'a, hâdam ngai naw'm ei nih. Sikul nâupang khawm an zirtirtuhai indawn nachâng hrie hrie chu lekha an hung thiem el. Indawn nachâng hre lo hai ruok chu a ni têlin bâksamna an hung hau deu deu a, exam-ah an fail pâr duoi el hlak. Zirtirtuhai lekha thiemna ringawt kha inchûklaihai tâ dinga mark hmû insângna an' naw a, zirtirtuhai râwn nachâng hrie hrie kha a ni lem. Chuong ang char chun Pathien thilthawtheina ringawt hi damna a ni chuong naw a, Ama pantuhai tâ ding chauin damna a nih.
Harsatna namên lo ei tuok a, beidawng êm émin ei indawm kûn a. Pathien kuoma ei ṭawngṭâi a, sienkhawm dawnna râwl ei hriet chuong nawh. A mi dawn naw tîna ni'ng a tî? Ni chuong lo ve, einiah thil tum Pathienin a neia tîna ni lem a tih. Harsatna hmangin Pathienin a mi ko a, a mi kona san hre bar si loa mi la kiengpêk dinga ei hei hni ringawt el chun a thil tum iengtin am hlenin um thei a t'a? Chuleiin harsatna hi ei tuok châng khawmin, mi la kiengpêk dingin Pathien hi kar el ding an' nawh. Ieng am Pathienin keia hin thil tum a nei a? Ieng am Pathien laka hin thil fel lo sukfel ding ka nei a? tî hi ngaituoa inen fel hmasak lem ding ei nih.
Pathienin ei ṭawngṭâina mi zuk dawn el loa a la to veng veng el dâm hi a san a lo um hlak a nih. Einî tiengpangah sukfel hmasak ding a la um lei dâm, mi harsahai ngîrhmun ei hrietthiem theina dingin hun tâwi te chau an ngîrhmun ang Pathienin a mi'n temtir vak lei dâm a lo ni thei. Ei thîna ding le mi sukretheitu dinga natna hi tuor kher khawm ei ni chuong nawh. Ei tuor muolsuo hunah nun dân ei thiem theina dinga a practical-a training Pathienin a mi pêkna dâm a lo ni hlak. Practical training hi Pathienin a mi pêk râwn el ta kei khawm. Ka ṭangkâipui nalâwm el. Mi rimsihai ngîrhmun khawm ka hrietthiempui pha a, ka u thî ngama khum beta a um lai khan kei bâka a ngîrhmun hrethiempuitu um kher naw ni hai. Ka tuok ta sa a nî leiin, a harsatna kha ka hrietpui a, a hril lo khawmin a ṭûl le a mamaw chu ka hriet hne hle. Pathienin practical training a mi pêk tlat annâwm. Ieng leiin am hre naw thei ka t'a?
Ei tî tâk ang khan, Pathien ihrietpui lovin ieng thil khawm a tlung ngai naw a; ruo tui mal khat le mitthli far khat chau khawm Ama hrietpui lovin a tla ngai naw a, ei ṭawngṭâina mal khat chau khawm hi Ama hrietpui lovin a tham ral ngai bawk nawh. Tiemtu dit tak, ieng am harsatna i nei a? Pathien ko rawh, i kona râwl kha Ama kuom tlung lovin khaw lâi thli sie khawmin lên hmang naw ni a, ieng rî khawmin lân hmang thei naw nih. Pathien hrietpui lovin ieng thil khawm a tlung ngai naw a, Ama ihrietpui lo chun ieng thil khawm hi a thlâwnin a liem hmang ngai si naw a.
*Inlang lo dinga thup hmang ieng khawm a um si nawh, hriet lo dinga ip ieng khawm a um bawk nawh.*
Luka 12 : 2
Lalpa'n a thu mal mi sawmpêk raw se.