PATHIEN HMAA INPUONG
PATHIEN HMAA INPUONG
*"Mi tinrêng ka hmaah kûn an t'a, lei tinrêng khawm ka kuomah inpuong an tih."*
(Rom 14 : 11)
Khawvêla ei um sûnga ei khawsak dânhai po po hi nakie chu Pathien hma bulah ei la'n puong ding a n'a, khêl hlak hril thei ni dêr lo ding. A va rinum âwm de aw.
Ei Bible-in *"Thup sawng thei lo ding thil a um nawh..."* a lo ti a; chûleiin thil suol le thil ṭha a rûka ei thawhai po po hi nakie chu pholangin a la um vawng ding a nih. Thil suol thawtu chu hrem lovin um naw ni a, chuong ang bawk chun thil ṭha thawtu khawm lâwmman hmu lovin um bawk naw nih. Chuleichun ei thil ṭha thawhai hi mî hriet kher kher dinga thaw ni ngai naw sien la, thil ṭha naw a rûka ei thaw ang bawkin thil ṭha khawm hi tû hmu naw lai khawmin thaw rin bîk ding a ni nawh. Mihriemin mi hmu naw hai sien khawm, Pathien chun a mi hmu zing hlak a nih.
Mihriem chun ei thil thaw ṭhathai hi mi theinghilpêk hun dâm an la nei hlak a, lungril taka ei thawhai le ei thei tâwk tâwka ei thaw ve hai dâm hi an mi pawmpêk naw châng khawm a um hlak a nih. Mihriem chu a tlâwm a tam thua dâm ei la buoi a, ei Pathien ruok chu a tam a tlâwma a buoi ve naw a, hmû khawp lo lungrila thaw nuomna ei hei nei ringawt khawm hi thilthawah a mi pawmpêk hlak a nih.
Ei thil thawhai hi Pathienin a hriet khawmin a topui ṭawk ṭawk tho ei tî chu ni hlak ding a n'a; to chu hril lo, nakie phâ chu einî ngêiin khawvêl hmaa le Pathien hmaah ei la'n puong fâi vawng ding a nih. Inzak khawm um cham cham hle'ng a tih. Chû huna chun vawisûn huna thil ṭha thaw inti deua ei um hai dâm hi pawm tlâk a ni chie di'm? tî dâm hi ngaituo tham a tling. Zân thim hnuoia thil ṭha thaw ngâi lo, sûn var lâia mîhai mit hmu chaua thil ṭha thaw hlakhai hi nakie chu Farisai-hai leh dawkân ei la kîl tlâng ding a n'a, ieng thil tak am ei kîl ding ruok chu ei ngaituo zawm dingah la khêk hrî phawt el ei tih. Hril pei khawm a um naw a, ngai châk khawm a um hran nawh.
Chûleiin Pathien hma bulah iengkim ei la phawr fâi vawng ding an' leiin, chu phâta insitum lo le insuong taka ei thil thawhai kha ei khêk suokpui ngam ngêi theina dingin vawisûn huna hin fîmkhur le uluk taka nun ei khal hi a ṭûl tak zet el. Mihriemin ei thil thaw ṭhathai hi mi theinghilpêk hun dâm la nei an t'a, Pathien ruok chun a hriet zingna lekhabu phêkah rê thei ta lo dingin a'n chik dap zing a nih. A rûka ei thil thawhai po po khawm khawvêl hmaah tiem langpêkin ei la um ding a nih. Chû tiem langna thû chu, ngâithlâkna ropui a la um ngêi ding a nih.
Chûleiin, mîhai ngâi tlâk khawpa tiem langa a la um theina dingin, mâwi taka ei nuna ei ziek hi a ṭûl tak zet a nih.
*Lalpa'n a thû mal mi sâwmpêk raw se.*
June 4, 2020