NUN CHÂWLNA KRISTA
NUN CHÂWLNA KRISTA
*Nangni sin inrim le phurrik phur po po hai, ka kuoma hung ro, keiin châwlna pe'ng ka ti chêu.*
~ Mathai 11 : 28
Mihriem hi phurrik nei naw pakhat khawm ei um ring a um nawh. Ka nei nawh tî hai chun an hriet naw lei mei mei ni'ng a tih. Hmêl sie'n a hmêl siet a hriet naw ang mei mei hi ni'ng a tih.
Phurrik po po lâia rik zuol tak chu thîna hi a ni el âwm. Thlarâu mî inti fêt fêt hai khawmin thîna phurrik kher hi chu tawk harsa an ti a, mi puitlinghai puitling thei nawna hmun chu thîna hmaa tho hin a nih. Tuor thiem a'n tak a, thiem leia mitthli hi dang chât thei hlak ni chuong lo. A tuor thiemtu le thiem nawtuhai tâ dingin thîna hin danglamna a nei tak tak chuong naw a, mitthli tho hi a nih an chan chu.
Thîna hi chu a siemtu (Pathien) meu khawmin ama tâ dingin a lo siem nêp bîk chuong naw a, a nâupa (Isu) khawmin thîna a hei tuok meu khan chu a hmu ngam ta bîk naw a, a sûn ve tlawk tlawk a nih tî ei hriet kha. Khawvêl khawmin hmu ngam lovin a'n thin se hâwp a, nisa khawmin en ngam lovin a'n rel bosan dai a ni kha. Chuong tawp chun thîna phur hi a rik a, mihriem phur zo thei dinga siem hi a nî khawm ring a um naw hiel. Ran chen khawm hi an lo bâng ve bîk nawh.
Chuong chu thil um dân a nî lâi zing ah, ei Lalpa Isu chun *"Nangni sin inrim le phurrik phur po po hai, ka kuoma hung ro, keiin châwlna pe'ng ka ti chêu,"* a mi tî leiin, thîna hmuna khawm châwl hâdamna a lo um tak zet a nih tî a sukchieng a, chû hâdamna chu a kuoma fe taphawt hai kuoma pêk dingin thû a mi tiem a nih. Natna a um chun a damdâwi khawm a lo ve pei ang hin, lungngâina le harsatna khawm hi a damdâwi um lo a ni bîk nawh. A damdâwi fâk nachâng ei hriet naw lei mei mei leia dam tak tak thei lo hi ei lo ni lem hlak. A damdâwi chu Isu Krista'n a nei a, a beiseituhai chun Ama pan el ding a nih.
Taksa nat huna doctor pan nachâng hre sî, thlarâu nat huna ruok chu Isu pan nachâng hre nâwk sî lo dâm hi ei ni a, Pathien ka nei ti zing sîin hâdamna tak tak hi ei hmu ngâi naw a nih. Mihriemah hâdamna dâm ei zawng lem hlak a, hmû ta nêkin ei natpui deu deu lem hlak a nih. Natna khawm hi a damdâwi fâk fûk lo chun tûr ṭium taka inchang thei a nî ang hin, nun beidawnga ei um huna hai hin khawvêl thila dâm damna ei zawng a, sienkhawm beidawngna a mi bel sapêk zuol sau lem hlak sî a nih.
Mihriema nun châwlna zawngtuhai chun an beisei angin an hmu naw phât, an mi beiseihai le dâm hmêlmaah an insiem pha lem a, chuongchun hâdamna nêkin phurrik sukzuolna chau a hung ni lem ta hlak a nih.
Ei harsatnahai hi ei Lalpa Isu Krista kuomah intlun hlak ei tîu a, *"Hni ro pêkin um in tih,"* mi titu kha Ama hi a ni a, beisei taka pantuhai chu a thlâwnin inkîr ngâi naw nih. Doctor-haiin damnaw taphawt chu anni hung pan nawtuhai chu an va buoipui kher naw ang hin, ei Pathien khawmin ṭhangpui ṭûl taphawt chu an kuomah va pan naw ni a, Ama beiseia va pantuhai chau hi a nih a ngâivenin a ngâisak bîk chu.
Chu lei chu ni ngêi a tih, ei Lalpa Isu khawmin *"Nangnî sin inrim le phurrik phur po po hai, hung ro, keiin châwlna pe'ng ka ti chêu,"* tia Ama va pan kher kher dinga a mi ko lawm lawm hi.
Chuleiin, ei Pathienin Ama va pan dingin iengtik lâi khawm a mi ko zing a nih. Doctor-hai doctor a ni a, dam nuom chun nghâk el lovin Ama pan el ding a nih. *"Hni ro pêkin um in tih, kik ro hawngpêk ni'ng in tih,"* mi titu kha ei Pathien hi a ni si a. A danglam ngai nawh.
Lalpa'n a thû mal mi sâwmpêk raw se.
24-06-2020