LAWMMAN HMU NAW LANG KHAWM
LAWMMAN HMU NAW LANG KHAWM
*"...Kan Pathien a rawng kan bawl chun meipui chawk lai râpthlâk taka inthawk chun a mi sanhim thei a, aw Lalpa i kuta inthawk khawmin a mi sanhim thei a nih. Chuong chu lo ni naw sien khawm, nangin lo hre la, i Pathienhai chu an rawng bawl naw ni'ng ungah..."*
~ Daniel 3:17&18
Mihriem hi mak ve tak el ei ni a, lawmman bo khawmin thil suol râpthlâk tak tak ei tâ dinga ṭangkai lo khawm ei thaw rin naw laiin, thil ṭha ruok chu lawmman boa thaw pei hi ei tam nâwk si nawh. Lawmman um loa thil ṭha thaw chu kiemna chikhatah ei ngai tlat el.
Lawmman tî lêmah, hieng inpâk le hming ṭhat hlaw nuomna dâm, beisei dang dang nei le hlawk intêl nuomnahai hi ei zuk kâwktir deu tak a nih. Hienghai po po beiseia thil ṭha thaw hi ei ni tlângpui. Bible (Pathien thu) khawm hi malsawmna dawng inbeiseia zâwm ve mei mei hi ei ni tâwl. Dân chu dân a nî leia zui le zâwm ding ei ni a, beisei neia zâwm ding ringawt a ni nawh. Chu ang char chun, ei Pathien thu khawmin thlarâu dâna um dingin a mi'n fûi a, lawmman hmu tum phêt phêta zâwm tum ding an' nawh. Ei thil thaw ṭhat ang peia malsawmna hi hmu kher kher dingah inngai naw'm ei nîu. Hnuoia um ei ni a, lawmman chu Vânrama ding chau a nih. Hnuoia khawm ei hmuin ei hmu naw thei, amiruokchu lo hmu kher naw inla khawm nuor ding ei ni nawh; chân sawng chuong naw'm ei nih.
Mit rawngbâwla hnuoi lawmman beisei a, thil ṭha thawhai chu an lawmman hnuoia hin an hmu zo ta thu Mathai zieka khawm chieng takin ei hmu a. Chuonghai pawla ṭhang ding hi einî lai ngei khawm ei tam hle ding a nih. Thil ṭha tam tak ei thaw a, ei thaw ang huin ei hmu naw a, einî nêka suol lem hai dâmin malsawmna an dawng rawn lem anga a'n lang châng khawm tam a tih. Amiruokchu inhnar ding an ni nawh, Vânrama an lawmman ding hnuoiah an sîk zo ta khawm a ni thei. Hnuoi mî ei ni naw a, Vân mî ei ni leiin hnuoi lawmman chu beisei da'l ei tîu. Hnuoi lawmman hnawt nasa taluotna hi Vân lawmman chân dêr theina a nih tî hi hre thar ei tîu. Hnuoi kiemna hi Vân hlawkna dai a lo ni lem. Hnuoia hlawk tum bawk, Vâna hlawk tum bawk chu duâmna suola inchang thei a nih. Duâm chu chânna a nih.
Sadrak, Mesak le Abednego hai pathum khawm kha Lal Nebukadnezzar-in milim pathien an biek naw chun meipuiah dehâwn dingin vau sien khawm, Pathien an inphat nuom naw hrim hrim el. Pathienin meipuia inthawkin a sanhim ding leia milim pathien kha be lo an ni nawh; lo sanhim naw ding ni sien khawm Pathien an inphat naw dingzie thuin huoisen takin an dawn lêt ṭhuoi el a ni kha. Pathien lakah sanhim inbeisei kher kher chuong lovin an thaw ding an thaw a, Pathien kuomah ṭhangpuina an hnî khawm ei hriet nawh. Sienkhawm Pathienin a thaw ding chu hnî kher ngai lo khawmin a theinghil bîk nawh. Meipuia inthawkin an pathumin a sanhim el a ni kha. An sam zâi khat khawm a kâng inkin naw a, mei rim khawm an innam bawk nawh.
Pathien thu chu thû a ni leia zâwm el ding a nih, lawmman beisei ringawta zâwm tum ding a ni ngai nawh. Ei harsatna le ei thil mamaw chu einî nêkin Pathienin a hriet lem a, hnî, phût le beisei khawm a ṭûl nawh. A tî hun takah a hung thaw el ding a nih. Sadrak, Mesak le Abednego hai pathumin, *"Meia inthawkin Pathienin mi sanhim ding ni naw sien khawm..."* tia beiseina neia thil ṭha thaw an ni naw ang khan, einîhai khawmin *"Lawmman hmu kher naw lang khawm..."* tia hmu kîr inbeisei loa thil ṭha hi chân le tuor inhuoma ei hmasawn ngam a ni chun chân sawng kher naw'm ei ni a, tuor thlâwn ngai bawk naw'm ei nih.
Pathien rama hin ei chân lien po leh ei hmu lien el, ei tuor nasa ngam po leh damna ei hmu lem ting el. Ei chân ngam ang le inphu peia hmu ding ei nih. Pathien ram chu pêka a pung hmûna le kiema a hlâwk hmûna a ni si a.
*"Lawmman dang ka dit chuong nawh,*
*Ka rochan Kristaah ka lung a awi..."*
Lalpa'n a thu mal mi sawmpêk raw se.