LAWM RAWP DING EI NIH
LÂWM RAWP DING HI EI NIH
*Filippi 4 : 4*
*Lalpaa chun lâwm rawp ro, ti nâwk hlak ka ti lâwm ro!*
(Ka birthday thucha)
Covid-19 thlipui nunrâwngin nasa taka a mi nawt buoi vêl kârah, ka birthday nî ding chu ṭi le inthin dawr dawr pumin tû dang ruol lovin nî chun a hung inher suokpui a.
Zîng khuo a hung var chun kan in kâwla vatehai chu ka birthday mi lâwmpui ni âwm hrimin an hung inhrâm chiel chiel a. Chû ruol chun kan ârhai khawm chun an hung zâwm ve nghâl a. Kan ui chen khawm a bâng bîk nawh. Ka khum bul banga ka sanapui târ khawm chu a lo inkhâwng ri ve chek chek a, amiruokchu ka birthday mi lâwmpui a nî lem chu ka ring chuong naw a. Ka thoa tuol ka hei suok chun, thli'n thing le ruohai a mût sâwi del del chu ka birthday mi lâwmpuia lâm insâwiin ka hei hmu a. Mi lâwmpui tak tak ni naw hai khawm, theidana thû an pâi naw hle a. Mihriemhai anga a der mei meia mi lâwmpui le lemchang thiem an ni ve nawna chun a mi suklâwm a, hringna nei ni naw hai sien khawm ka ngâinat pha hle a. Chû kawnga chun einî mihriem hringna neihaiin ei tluk naw hle a nih tî ka hrietin ka'n zak ta ngâwi ngâwi a.
Hringna nei ni naw hai sien khawm, thing le ruohaiin an zâr hnuoia chun châwlna dei hlim inhawi tak an mi siempêk a. Mihriem tâ dinga damdâwi ṭha tak tak le fâk ding inhnik tak tak râ an mi'n suopêk a. An thî hnung chenin mei sêmna ding le furniture (in sûng hmangruo) pawimaw tak takah an la'n chang ta fan a nih. Siemtu Pathienin a siem san hi an va sukpuitling chieng ngêi. Hringna nei lo ê tî lo chun, mihriemhaiin ei tluk naw nasa hle a nih.
Ka birthday tûk chu khawmuol siet leiin nisa hmu ding um lovin chawhma po chu ka laka nuorna nei ni âwm fahranin a mi'n rel rûksan dai a. Amîruokchu boruok a suklum talaw ding a ni tî hrein a'n phalam a, chû leia inbîk hmang ni dingin ka zuk ring a. Chu chun a laka hrietthiemna ka nei ta deu a, ka lung a âwi a, ka dem bawk nawh.
Mîhai nêkin ka thaw ṭha ka tîna ni lovin, Pathienin ka birthday chen chen a mi ṭhuoi tlung ta sî sî hin chu, A chunga lâwmthu hrilna dingin hî nî hin sermon/article pakhat bêk ziek hi ka thil tum a ni a, tûta ṭum khawm sukpuitling theia ka um leiin ka lâwm hle a nih.
Zuk hril kâi pei inla, kei hi kan urênga an mi lâi tak ka ni a, kum lâilung taka pieng khawm ka ni bawk. A mak ve angreng khawp el. Sâp ṭawng takin, a COINCIDENCE ngêi el ie. Pathien hin a mi ser hrang bîk am a ni aw! hi ka ti rum rum. Ka unâuhai nêk taka ka danglamna khawm hi a tam rêng bawk a nih. Chu tieng chu ei hril tum tak an' naw leiin hun el sien la. Ieng po khawm chu ni sien, Pathien hin a mi ser hrang bîk hi ni phawt dingin ka ringhla nawh. Pathien mi ser hrang bîk nî hi a hming chun mâwiin inhnarum tak ni sien khawm, hringnun lamtluong hi a khawkrawkin a'n kho bîk a, a'n ṭên veng vung el a nih tî thei dingin a um. Chuong ang thil chu ka nunin nasa takin ka lo palin ka lo hraw tlang ta a, thîna ko tlânga chen khawm lo dâp fân uor uor khawpa hringnun hi pal chikim ve kan' tah.
Sermon/testimony hieng zo zâi kang inchat thei dêr loa a hung pût suokna hnâr chu ieng danga inthawk khawm ni lovin, thî ngama ka accident tuokna hmuna inthawkin a nih. Châwl hâdamna lampui hi a sâwlum a, hlawtlingna lampuia hin hlawsamna tam tak hraw thleng ding a um a, hlimna le lâwmna lamtluongpuiah lungngâina le beidawngna pal tlang ding a tam a, châwisângna tlâng sîp lâwn kâi ding chun hmusit le hril sietna ruom hraw tlang hmasak dâm a ṭûl a, chatuon hringna rama lût ding lem chun thîna kawtsuo hiel hraw thleng a ṭûl a nih.
Mihriem hringnun hi hrietthiem a'n tak a, chûleiin mi tam takin hlawtlingna lampui an hraw mêk lâiin, vângduoina lampui hrawa inngâiin hrethiem lovin lampui dangah an pêt hmangsan dai hlak hrim a nih. Chûleiin hringnun hi hrietthiemna le tuorselna intlawn pum zinga tawn tlang hlak ding a nih. Chu nun nei thei ding chun ieng dang nêkin Pathien nei hi a ṭha tak a nih.
Ka birthday mi lâwmpuituhai po po chungah ka lâwm satlie naw a, lâwm namên lovin ka lâwm tak meu meu chêu a nih.
Malsâwmna chun hlimthla angin zui pei sien la chêu, lungngâina chu hniek hnung anga hnung sawnin um sien la, lâwmna chun zîng khawvar ding anga chiengin lo hmuok zing raw se chêu.