KUT LE KE BAWNGA HRINGNA RAMA LÛT
KUT LE KE BAWNGA HRINGNA RAMA LÛT
*I kut chang tiengin a sukthlûk che chun, tan la, pei dai rawh; i taksa a puma hremhmuna peia a um nêk chun, i taksa pêng khat a bo chu i tâ dingin a ṭha lem a nih.*
~ Mathai 5 : 30
Vân ram hi ka ngâituo a, a kâi ding hai chu mi hrisêl pângngâi nêkin khawvêl rama natna khir takin a lo tlâk buok hai dâm hi hmû ding tam lem an t'a, mi hâusa nêkin mi rethei an tam lem ka zuk ring lem chu tie.
Ei Bible-a ngêi khawm *"Mi hâusa Pathien Lal rama a lût nêkin, sanghâwngsei ṭhimna kuoa a lût thleng a awlsam lem"* tî ziek ei hmu kha. Chuonga ei Bible-in a zuk tî lei chun mi hâusa a hnâwl a, mi rethei ruok chu a thlang lem ei tîna tieng an' naw a, mi hâusa chun mi rethei nêkin mamaw an nei tlâwm lem a, chuleichun Pathien ngâina le mamawna khawm an nei tlâwm bîk châwk hlak ei zuk tîna tieng lem a nih.
Mihriem hi lûlul deu el ei n'a, nawt har thei lo vawng, a bena ben har chî vawng hi ei ni tah. Natna le harsatna dâmin a mi nuoi êu sawk hma chu har suok hi ei tum hrim hrim nawh. Ei Pathien thu hril dânhai khawm ku hi a la'n nêm taluo deu hlek a, ngâithlatuhaiin an mi inlusûksan zo chu a ni tak ta hi. An harna khawpin vau an ṭûl le khawm vau puok ṭhuoi ṭhuoi el ding an nih. Ei Pathien khawmin *"I berâmhai inlusûk an har suokna tâwkin i la nawt le'm"* a mi ti thei a nih.
Taksa inlusuhai hman a nawt ṭhang an intak chun, thlarâua inlusuhai lem chu a lêt tama nasain nawt har an intak lem ding tî chu a chieng sa a nih. Zâi nêmna hi ei Pathien mizie chi hrang hrang lâia pakhat ni ve sien khawm, hrohrâng na hi Pathien thû leh a'n kalna a um bîk bawk nawh. Isu khawvêla a hung ṭum lâi khawm khan hal ṭûl chu a hal a, ṭawng vîn a hmang ve ṭhuoi ṭhuoi tho a nih. Biek In sûnga lo sumdâwnghai dawkân chen dâm a num thlûkpêk ṭhuoi ṭhuoi tî khawm ei hriet kha. A hun le hmun izir le a ṭûl dân ang peiin a mizie a'n thlâkthleng hlak a nih. To huna ruok chu, thi dinga khêla an hêk lâi khawmin a bâu vawi khat khawm a ka sin nawh. Nâwk dai si a.
Ei berâmpuhai hi an innêm tâwl taluo deu hlek a, an berâm inlusuhai khawm ku hi an nawt ṭhang zo ta nâwm a ni aw! dâm hi ka ti vawng vawng hlak. Pathien ṭhatna ku hi ei hril uor taluo lei ku hi'm a ni ta ding chu, hieng lâwma Pathien ei pal zût el tâk hi. A ṭitumna tieng hril hi uor hle lem ding ei nih.
Natna khir tak annâwleh harsatna namên lo ei tuok hunah, *"Pathienin a mi ko an' ta hi"* ei ti chau hlak a n'a. Pathien chun iengtik lâi khawma a mi ko zing a nih. Harsatna le siet tuok kher kher hi Pathien kona râwlah ruot bîk ding an' nawh.
Ei hriet ta nawh, harsatna le vangduoina kher kher hi Pathien kona râwlah ei pawm tâk sî leiin, hi hi hmang hin a mi koin a mi nawt har rawp el tâk hi. Ei pawm thiem dân takin a mi ko el ta'm a ni khawm hriet phâk an' ta lê.
Kut le ke kima ei um dâm hi suol rawngbâwlna dinga dâm ei hmang ṭangkâi a, ei mithai dâm hi thil suol melkâina dâmin ei hmang a, ei ngâituona thluok ṭha tak el hi thil ṭha tieng nêkin thil suol ngâituona dâmin ei sawr ṭangkâi lem a. Chuleiin ei taksa bung kim ṭhap le hrisêl taka ei um hin, um dân ei thiem ta ngâi naw a, suol thawna dingin ei kêhai ei pên hrât a. Chuong tienga dingin nasa takin ei inhmang ta hlak a nih. Ei mitin châk le nuom zâwng a hmu râwn deu deu a, lungril ngâituona thluokin thil suol a ngâituo zui naw thei ta ngâi nawh. Chu chun suol rawng chu bâwl dingin taksa a'n chêttir ta hlak a nih.
Chuleichun suol rawngbâwl thei ta lo dingâ kut le ke kim loa um hi ei tâ dingin a ṭhat lem thû ei Bible-in a mi hril hrim a nih. Natna dam thei dêr lo kawl khawm ni'ng ei tih. Harsatna inkieng thei dêr loin a mi chênchil khawm a ni thei. Amiruokchu lungngâi nâwm ei nîu; chatuon hringna rama ei lût theina ding le suol rawng ei bâwl thei nawna dinga Pathien mi khuopna khawm a lo ni zing thei. Nuor ngâi nâwm ei nîu a, inngâi se bawk nâwm ei nîu.
Khawvêla tâwi te rinum tuora Vân ram dâm ei kâi pha thei a ni chun, chu bâka ṭha chu a um nawh. Dam sûng tâwi te inhawi chên a, thî hnunga hremhmun fe nêkin chu chu thlang a um lem a nih. Vawisûna ei ṭap inrûmnahai hi nakie huna ei lâwmna ding dâm la ni'ng an tih. Hremhmun ei pumpel theina dinga Lalpa'n ei tlân suokna ding lampui a mi sât hawngpêkna khawm a lo ni zing thei. Tuor fan fan ei tîu.
*Lungngâihai chu an ham a ṭha, thlamuongin an la um ding a ni si a.*
(Mathai 5 : 4)
*Lalpa'n a thû mal mi sâwmpêk raw se.*