KRISTA SIPAI ṬHA
KRISTA SIPAI ṬHA
Sipai chu ieng am a n'a an mawphurna? ei ti chun, râl do le mi suol vêng hi a ni'l a tâwi zâwngin. An sin hi a rik a, indona field-a dâm an hringna thâpin tir lûtin an um a, hliempui nasa tak dâm chu va tuorin, an suolna lei khawm ni lovin an va thî pha ṭeu hlak a nih ram tâ dingin.
Chuong ang chun, khawvêl sipaihai angin râl do dinga Pathienin a Sipai dinga a mi thlanghai ei nî leiin, tîsa ram le thlarâu ramah hmêlma do ding tam tak ei nei kawp a nih. Khawvêl sipai lêt tamin ei mawphurna a rik lem a, ei lâwmman khawm a ropui lem dai bawk a nih.
Sipaiin mi suol chu an râlthuomhai le dâm an hung man chun châwimâwina insâng tak tak le lâwmman hlu tak an dawng hlak ang hin, Kristâ Sipaihai khawmin thlarâu inhmanghai mana Pathien kuomah ei ṭhuoi lût a ni chun, mi lo lâwm a t'a, nakie hunah Vân ramah ropui takin Vân mipuihaiin mi lo hmuokin, châwimâwina insâng tak le lâwmman Lal Lukhum se thei lo an mi la'n hlân ding a nih.
Sipai chu hmêlma nei an nî leiin inring zinga um a ṭûl a, hmu zing sîin, sienkhawm hre dêr lovin an hmêlmahai le dâm chun an insun pel zut zut châng khawm tam a tih. Sipai form an hâk naw a, silai le râlthuom an châwi naw chun mi narân angin an inlang hlak a, hriet hran thei an ni ngâi nawh. Chuong ang tho chun, Krista Sipaihai khawmin hriet lovin hmêlma vêhlêmtû an nei zing a, sienkhawm var takin an inthup a, hmêl le chêt ziea hmêlma an nîna an suklang ngai naw a. Chuongchun sûn var lâi khawm awlsam takin inring hman lovin rûnin an um thut thut hlak.
Hmangaitu ei sâwnhai dâm kha hmêlma ṭîum dâm an lo ni a, mi lâwmpuitua ei ngâihai dâm kha a rûka mi thîktû dâm an lo ni hlak. Mi ṭhangpuitû ni âwma inlanghai dâm kha mi suksetû dâm an lo ni a, mi ditsaktua ei lo ngâihai dâm kha mi hnâwltû dâm an lo ni zing lem hlak.
Râl rama chêng ei nî leiin sipai anga fîmkhur tak, huoisen tak le hrât taka ei um zing hi a ṭûl a nih. Dotû (hmêlma) lienin hrâng hai sien khawm, ṭi le zâm ding hi ei ni nawh. Châu le lunghnûr ding hi ei ni bawk nawh.
Ei Lalpa Isu Krista khawmin, *"Inremna siem dinga hung ka ni naw a, indona inlêngtir dinga hung ka ni lem,"* a lo tî kha taksa indona tieng kher a kâwk naw a, thlarâu indona tieng a kâwk deu tak. Tû theida va hrilin va tâwk kher naw inla khawm, Kristâ Sipai ei nîna ringawta khawm hin mi tam tak theida ei kâi nghâl a, chûleiin indopui ding hi ei hau hrim a nih.
Sipai ei nîna angin hmêlma mi dotu tam tak ei nei ding hrim a nih. Sipai ding chun dâwizep a thei naw a, thabo khawm a thei bawk nawh. Huoisen taka um ding hi ei nih.
Thlarâu huoisenna chu hieng zâinêmna dâm, tlâwm ngamna dâm, zâidâwtheina dâm, mîhai chan ṭha lem inchangtir a, a ṭha naw lem inchû ngamna dâm, a thiem lem nêkin a thiem naw lem inchû ngamna dâm, thil ṭha leia tuor ngamna dâm, indik nawna leia hlâwkna nasa tak nêka indikna leia chân vawng ngamna dâm, tlân siet nêka Pathien hminga muolpho ngamnahai dâm hi an nih. Hienghai po po hi Krista Sipai ṭha mizie vawng an nih.
Manî thiemna a nih tî leia tlâwm nuom dêr loa inhrosa pum pum hai hi mi huoisen an ni nawh. Tlâwm ngamna hi mi huoisen nîna indik tak lem a nih. Khawlvêl ngâia dâwizepna dâm hi, Pathien ngâia chu huoisen nîna dâm a lo ni dai lem hlak. Chûleiin Lal Sipaihai ei nî leiin Pathien dit zâwngin huoisen takin râl do ei tîu, hnê ngêi dingin. Indona chu Lalpa indona a n'a, hnêna khawm A tâ a nih.
*Lalpa'n a thû mal mi sâwmpêk raw se.*