IENG KRAWS AM I PUT VE A?
IENG KRAWS AM I PUT VE A?
*"Tûkhawmin mi zui a nuom chun, manî inngâisak dêr lovin, nî tin a Kraws putin mi zui raw se."*
(Luka 9 : 23)
Mi tinin phurrik ei nei seng a, chu chû phurrik chu ei Kraws put chu a nih. Ei phurrik phurhai ruok chu inang naw seng a tih. A ṭhen chu taksa tienga phurrik nei dâm um ei t'a, a ṭhen ruok chu sûngril tienga phurrik nei dâm um bawk ei tih.
Kei, a ziektû ngêi khawm hi taksa le sûngrilah a kawp a thûin phurrik zâng bêk lovin a mi del zing a. Iemani châng hin chun ka nghawk puot puot a, phur pei ta loa zâmsan hi ka nuom vâng vâng châng a um hlak. A mi del rik zuol deu châng lem hin chu mihriem mizie hung suokin, ruolhai thaw dân angin khawvêl thila hlimhlawp bâwlna tienga phur sukzâng dâm hi ka châk rum rum hlak. Amiruokchu chu chu setan thil tum lien tak a ni tî ka hriet leiin, ka sukpuitling ngam ngâi mang sî nawh.
Phîngṭâm lâi chu ei vir bîk a, thil khâ khawm thlum ngâwi ngâwia ei hriet châng khawm a um hlak a, fâk thei dâwn thei taphawt deu thaw kha chu ei zuk beisei em em vawng el hlak a nih. Chuong ang deu chun, kawng dang dangah phîngṭâmna le dangchârna ei nei seng a, ei thil beisei zâwnghai chu ei hmû theina ding a ni phawt chun thil mâwi lo khawm ei hmu mâwi a, thil âwm lo khawm âwm hlie hliein ei hriet a, thaw âwm le a mâwi china ei ngâihai chu suol bâwma inthawkin ei inthla zalên a. Ramrî ei nuom chen chena inzauin ei khangpêk a, chuong chun manî inthiem chawp peiin, thil suol lien tak khawm chu manî mihriem ngaidân inkhîna bûklungin ei bûk a, a tling lo khawm ei inkhî tling a, a tling khawm ei intlingtir naw a. Chuong ang phahla hmang chun iengkim el hi ei inkhi a, suol lien tak khawm sêr bo anga zângin ei inbûk kângtir vur vur el hlak.
Leh, ei thu zâi tienga hei lût nâwk inla. Kraws chu a rik a, ei Lalpa Isu Krista ngêi khawm khan rik ti em emin a phur a, a châng le châuin a tlûkpui dêr hlak a ni kha. A tlûk kha thopui ta naw sien chu setan lakah a tlâwm tîna ni'ng a tih. Chuong ang chun, mi tinin Kraws rik tak tak ei phurhai hi châuin ei tlûkpui châng um a tih. Amiruokchu tlûkpui sawng ding hi ei ni nawh. Setan laka tlâwmna a ni si a.
A ṭhen chu nupa kâra phurrik phur dâm, a ṭhen chu in sûng phurrik phur dâm, a ṭhen chu taksa bawrsawmna phurrik phur dâm, a ṭhen chu fâk le dâwn tienga phurrik phur dâm, a ṭhen chu taksa khawsakna tienga phurrik phur dâm um bawk ei tih. Ei phurrik (Kraws) phurhai hi Kalvari tlâng tlungpui zo loa ei tlûkpui sawng a ni vei chun, setanin hremhmun tieng ei ruong a mi'n hlawm ding a nih.
Chû ruol chun ei Pathien chu lungna ngâwi ngâwi le chanhai takin ei siem ve thung ding a nih.
Kraws put na ná nà chu rik tiin ei châupui châng a um ding rêng a nih. Chuong sa khawma a hnung zui dingin ei Lalpa Isu'n a mi tî a nih. Ei phurrik phurhai hi suonlama hmang lovin kat ṭâwng ṭâwng khawmin ei Lal Isu hnung hi zui ding ei nih. Kraws chu rik hle sien khawm, ei Lal Isu'n a tlûkpui khan a del hlum chuong naw a, khawvêl a hne theina dinga a râlthuom pakhat a nî ang khan, ei Kraws puthai hi lo rik hle sien khawm, setan ei hne theina dinga hmangruo pakhat a ni a, Kalvari tlâng chena ei tuor muolsuopui a ṭûl a nih. Hâdamna zawngin tlânsan tum ngâi nâwm ei nîu. Hmu chuong naw'm ei nih.
Mîhai mi hril sietna le mi suknawmnatnahai dâm, khêla an mi hêknahai dâm, sûng le kuohai laka inensanna dâm, mîhai hmûsitna le diriemna dâm, mîhai hnâwla umna dâm, ûksak hlaw nawna dâm le harsatna chi dang danghai hi phurrik chi khat, mi tinin ei Kraws put chu a nih.
Na thei le châu theia siem ei ni ang hrimin, nat châng châu châng nei nalâwm ei tih. Sienkhawm, hienghai hi mi tinin ei phurrik phur tam tak laia pakhat, ei Kraws put chu a nih. Ieng ang harsatna khawm lo tuok inla, manî Kraws put anga ngâia sel tak le lungâwi taka put ṭâng ṭâng ding hi ei nih.
Ei Lalpa Isu Krista chun *"Tûkhawm a Kraws puta mi zui naw chu ka mî ni tlâk an' nawh"* (Mathai 10:38) a lo ti a, chûleiin phurrik phur ngam sî loa Isû zuituhai chu a mî ni tlâk an ni nawh. Chân ngam sî lo, tuor ngam bawk lo, awlsam taka Isu hnung zui tumtuhai chu a mî ni tlâk an ni naw leiin Isu hnung an zui thlâwn mei mei ding tîna a nih.
Tiemtu dit tak, Ieng ang Kraws putin am Isû hnung i zui ve a?
*Lalpa'n a thû mal mi sâwmpêk raw se.*