HUOISENNAA HIN THILTHAWTHEINA A UM

 HUOISENNAA HIN THILTHAWTHEINA A UM

*"...Hrât tak le huoi takin um rawh; ṭi naw la, zâm bawk naw rawh, Lalpa i Pathien chu i fêna taphawtah, i kuomah a um pei ding annâwm..."*

~ Joshua 1 : 9

Huoisennaa hin hrâtna a um ang bawkin, dâwizepnaa hin hrât nawna a um bawk a nih. 

Huoisenna hi hrâtna thahrui nasa tak mi petu a ni a, manî lêt tama pum lien le hrât lem khawm intlâwm theitu, mi hrâng sa hrâng khawm mei khupa intlân siettir duoi duoi theitu a nih. Tha pui sêng loa thing pui lung pui intâwl sawntir theitu a nih.

Huoisennaa hin thilthawtheina a um hei tî tâka chun, kum iemani zât liem ta lâia ka thil tawng hei hril lang. Vawi khat chu ka nunghâk lêngnaa hin tlangvâl pakhat hi chû nunghâknu lêng ve tho leh kan insukbuoi ta a. Kan insukbuoina san chu ieng dang lei ni lovin, inngâizâwng hi an lo ni a. Chû zân tak chun ka nunghâk lêngnu chun ka hei lût charin a ieng a ieng hmain, *"A'n hnu ta êm inlâwi ta rawh,"* a mi lo ti nghâl el a. Dâr 8 vêl chau a la ni sî, nî dang chu dâr 9 hnung khawmin la lêng dinga mi la thlo ṭâwk ṭâwk hlak kha a ni si a, thil indik lo chu a um a ni phawt el ka ti lungril a. *"Ieng thu'm an' taa vawizân taka chu lungril dang i put?"* tia kan inhniel lâi tak chun, a ngâizâwngpa chu room sûnga inthawkin a hung suok hlut el ta a. Chu ngêi chu a lo ni âwma chû zâna ka mi lêngnuin lungril dang a lo putna san chu. 

A ngâizâwngpa chun  *"Mi'n inlâwi ta rawh an ti che leh inlâwi la n'el annâwm, i tuor nuom a nî?"* a mi ti el tah. Kei hlak ka zâm se naw nasa, *"Mi tâwk rawh i ngam phawt leh, ie'm suksuol ka nei a?"* tia huoisen taka ka hei hmasawn zet chun, a tuoldâwi lema a ṭhang ta a. Tharum ṭûl lovin ka huoisenna chun a hnawt zâm ta a nih. A mi tâwk ngam naw phing chun, a ruolhai a phone ta nghâl a. Chawmkhat lovin an hung tlung ve ta rup nghâl a. A ruolhai mi pathum chu an hung ta ngêi a, mi pakhatin thîr tluon sei rak lo hi a hung châwi bawk a, mi râpna dinga an hung châwi ve bawk chu ni ngêi a tih. *"Mi indik chu sakei angin a huoi a"* tî angin, ka'n dikna a ni mieu leiin zâm siet ka tum naw a. *"Mi vaw dinga hung in ni chun in ngam leh mi vaw ta ro leh"* ka hei ti chun, an kuthai a âiinkhuop zo am an' tah tî ding khawpin chechâng an tum naw hrim hrim a. Chu lâi chun a ngâizâwngpa chun innui hieuin a mi hung pan hnâi a. Kut a mi thlâk tum am a ni ka tî lâiin, ka ruongzâng a mi hung benpêk thek thek a. *"Ṭha deuin inbie'ng ei tih bâi..."* tîin thil ramtin a mi hohlimpui ta a. 

Inhril muolpho ta laklaw, hei hril zawm pei lang. Chû nunghâknu le chun lo inngâizâwng ve tho kan ni a. A rûka a mi lo kawp hi a lo ni zing a. A ngâizâwngpa le chun chû nu chun a mi lo kawp ve ve a nih tî kan hriet suok ta a. A tâwpah a tû tieng tieng khawmin lungsena la lovin inhrietthiemna leh kan inṭhat ṭhen ta a nih.

Sei dên dûnin thiem lo takin ka hei hril ni sien la ka chanchin. Ka hril tum tak chu, huoisennaa hin thilthawtheina a um tî hi a nih. Dâwizepin lo tlân se el lang chu mi hnawt ngêi an t'a, kut khawm ka tuor lem el thei. Chun thu dik hre suok naw bawk ka tih. Ka huoisen lei khan mî iemani tak, thil thaw thei deu el ni dingin an mi ring chu ni ngêi a tih. Tha pui sêng ngâi lovin ka cho dawl ta ringawt el a ni chu. Ho mei mei!

A huoi hin ei hei huoi phawt phawt a, insuol invuok bawr bawr hi a lo um chuong nawh. Mi tam lem hi chu ṭawngbâu ringawta hnawt zâm thei chî vawng hi an lo nih. Dawizep taluo ding hi a lo ni nawh. Invêt huoi ding ei tîna lem chu a ni dêr nawh. Mihriem hi an hmêl inlang dân ang hi an lo ni vawng chuong lê. Mi hrohrâng na tak tak anga inlanghai hi, a sa sê hun meua chu, a zâm se hrât hrâta ṭhang dâm hi an ni nuom vieu. Vâi rama lem chu a dâwi dâwi hi an zuomin an hmusit bîk niin a'n lang. Vâi ramah vâi mizie hre khawpa lo va chêng ve ta ka nî leiin ka hmû dân ka zuk hril a nih.

Dâwizepna hi hlêm hmang le lemchang nuna mi ṭhuoi lûttu a nih. Mi dâwizep chun thu sie thu ṭha a hriethai khawm puong suok ngam lovin a um a, mî theida hril inlâuin, mî suklâwm tum ngawtin a derin a khawsa a, khêl muhlûma rawngbâwl chu a sin ropui a nih.

Dâwizepna hi mâwlna chi khat a ni a, mi thiem mi var khawmin thu dik a hril suok ngam sî naw chun hrietna tlasam, mi mâwlhai leh angkhat an nih. Thu dik puong suokna kawnga bâu phawng ngam nawtu chu ṭawng thei lo ang a ni a, mithi le khawm danglamna an nei nawh. *"Mi dâwizep chu vawi tam tak a thî hma khawmin a thî"* tî a nî angin, mithi na ná nà chu Pathien khawmin a hmang nuom tak tak ring a um nawh. Hla siemtu pakhatin,

*Mi dâwizep ṭhang an phal nawh, fix rate a nih*

ti'n a lo khêk suokpui hiel a ni kha.

Tiena Mosie le Joshua khawm kha, huoisen takin Pathien ringsanin  thil an thaw pei a. An huoisenna hmang khan Pathienin an râlhai a hnepêk pei el. Annî theina a um chuong nawh. Chûleiin huoisen takin um ei tîu a, huoisennaa hin thilthawtheina mak tak a um a ni tî hrein, zâm lovin suol râl lien chu do tlat ei tîu. 

Indona chu Lalpa indona a n'a, hnena khawm Lalpa tâ a ni si a.

*Lalpa'n a thû mal mi sâwmpêk raw se.*

13-6-2020