HLIEMNA PÂNSER CHÂWIIN LAL HMAAH
HLIEMNA PÂNSER CHÂWIIN LAL HMAAH
*Krista an hmusitna chu Aigupta ram rohai nêk chun hâusakna ropui lemah a ruot a, lâwmman pêk ding chu a thlîr hlak leiin.*
(Hebrai 11 : 26)
Pasalṭhahai chu sa pui sa hrâng le thil ṭitum tam tak nasa taka lo inhmasawnpui ta dâm an nî leiin, an panga hai hin hliemna pânser tam tak tak hmû ding a um hlak. An taksa hmêl chu lo hem sien khawm, inzâpui ta nêkin pasalṭha zie hriltû a ni leiin, an insuong pha a, an mâwipui em em bawk a nih.
Chuong ang bawk chun, Krista Pasalṭhahai chu ieng ang hmêl lo put hai sien khawm, an inhmepuiin an mâwi êm êm vawng a nih. Retheina hi a hmêl se hle sien khawm, Krista leia mi retheihai hmêl chu a mâwi a, a en an inhawi a nih. Hliemna pânser chun taksa hmêl sukhem hlak sien khawm, Krista leia tuora hliemhai pânser chu a mâwi a nih.
Thlân chona hmuna thuomhnaw fâi vur nêkin, bal rût el khawm kha a mâwi lem a nih. An taimâkna le tlâwmngâina târ langtû a ni si a.
Krista leia hril sietna le elrelna pân ser, hmûsitna le endawngna pânser puthai hmêl chu a mâwi a, Pathienin chu hai hmêl chu mâwi tiin chung tienga inthawkin a hmangaina mitin a hung thlîr lawp lawp zing hlak a nih.
Krista leia chânhai hâusakna chu hnuoi hâusakna po poin a khan naw a, Vân hâusakna ṭâwmpui an nî leiin, mîhai tâ dingin an luong suok râwn po leh chung tienga an lâwmman ding a lo pung ve pei el. Hnuoi kiemna hi Vân hlâwkna a nî angin, Krista leia chân râwn râwn hai chun Lal ramah hlâwkna an intêl râwn ting ding a nih.
Mârtara thî le mi hrâng tam tak lo fe ta hai chu, Krista leia an hliemna pânserhai chu châwiin Pathien rorêlna hma bulah suong takin an la ngîrpui ding a nih. Einîhai hi teh Pathien hma bulah ieng hliemna pânser am châwiin ngîrpui ve'ng ei t'a?
Krista leia hril sietna pânser dâm, Krista leia rimsikna pânser dâm, Krista leia retheina pânser dâm, Krista leia hmusit le endawngna pânser dâm le Krista leia hliemna pânser dang danghai hi nakie phât chu Pathien rorêlna hma bulah thuom mâwi tak angin suong em emin ei la'n langpui ding a ni a, ei Lal lukhum sukmâwitû a la hung ni ding a nih.
Krista leia rimsik tuor le chân hi inlâu ding a ni nawh. Hliemna pânser boin Pathien hma bulah ieng khawm suong ding ei nei ve naw ding a nî leiin, Pathien hminga chânna, hril sietna le rimsikna ei tuor naw leia lâwm el ding a ni nawh. Ei hliemna pâserhai hi Pathien hma bula thiem mi'n changtirtu ding le châwimâwina Lal lukhum mi'n khumtirtu ding an la ni si a.
*Lalpa'n a thû mal mi sâwmpêk raw se.*