FATHER'S DAY THUCHA

 FATHER'S DAY THUCHA

*Pahai hi hi hre ro; ni khat chu in nâuhaiin ṭawngbâua in thu inchûktirna kha ni lovin, in nungchang a ni an la hung entawn lem ding chu.*

~ Charles Kettering

Kum tina Father's day (Pâhai nî) ei lo inser hlak angin, târik 21 june 2020 hi a lo ni nâwk el ta a. Sienkhawm kum dang angin ei hmang thei ta naw leiin pawi ei hei ti bêk bêk a nih.

Pa nei ta lo tam tak hai tâ dingin, Father's day nî hi lungngâina nî a lo ni hlak a. Tûta ṭum ruok chu ei khawvêl buoina leiin ni pângngâi angin ei inliemtir el ding chu ni âwm a nih. Sienkhawm thil ṭha loa ei ngâi hai khawm hi ki khat ki khata chu a ṭhatna a lo um miel hlak angin, ei khawvêl buoina leia Father's day hmang thei loa ei um hin mitthli tam tak tlâk ding a chel kîr a nih. Pâhai châwimâwina nia hin pa nei lo haiin mî pâhai  thilpêk dawng inhnarin, mittui kârah lung sie takin an lo thlîr tlawk tlawk a, hî nî hi an tâ ding chun lusûn nî a ni naw thei nawh. 

Ieng po khawm chu ni sien la, pa nei lo hai khawm ni hai sien, khawvêl var hmu a, vawisûn ang ngîrhmuna an um theina hi an pahai zâr lieu lieu a nî leiin, Father's day nî hi an ngâithâpêk ding chî a ni ngawt nawh. An thî hnung khawmin, an (Pâhai) nî hi chu ei inzâpêk ding hi a ni ringawt el. Chun nakie ela pâ ding dâm ei la hung ni pei ding leiin, Father's day hi ei nî (day) a la hung ni ve ngêi ding a nih. Chû huna chun lo um ta naw ang ni inla, ei nâuhaiin Father's day hi mi ngâithâpêk ve hai sien la ei nuom chie di'm? tî dâm hi ngâituo a ṭha.

Leh, pâhai hi ei Bible-in a mi lo hrilpêk angin, nuhmei lû an ni a, chun pâhai lû chu Krista a nih. Nisienlakhawm pâhai hin Krista hi luah an nei sî naw chun, annî khawm an nuhmeihai tâ dingin lû ni tlâk an ni nawh tîna a nih. Chûleiin nuhmei lû chu pasal a nî theina dingin pasalhaiin (pâhaiin) Krista hi lua an nei phawt a ṭûl a nih. Pasal tam tak chu Krista hi lua nei sî lovin inti nuhmei lû êm êmin an insukluling a, lû an nîna kha changchâwiin, an tî taphawt kha chu sêl le hniel thieng loa ngâiin a sie a ṭha khawm mi'n zâwm luitir vawng an tum hlak. Inbâr lui thil hrim hrim chu a ṭha a um ngâi nawh. Damdâwi khawm inbâr lui chun tûr ṭîum taka inchang thei a nih. Chu chu ngâituo lovin, pa tam chun an nuom a ningin in sûngah kut an vei kâwi a, an nuhmei an nâuhai chu a kâwi a ngilin an vei dân anga inher dingin an dit a, a dum khawm a vâr an intîtir chawt chawt el hlak. 

Pâhai nungchang hi nâuhaiin entawn taka an nei a nî leiin, nâuhai hi pâhai hlimthla an nih tî naw thei ruol lo a nih. Thu ṭha tak takin nâuhai zirtir hai sien khawm, nâuhaiin an zui le zâwm chu pâhai nungchang tho kha a nih. Chûleiin pâhaiin nâuhai chuong chun um hai sien la tia an beisei dân ang chara an khawsak ve hi mâkmaw a nih. 

Pâhai inzâumna tieng hei thlûr nâwk inla, mî pâhai angin varin thil lo thaw thei naw hai sien khawm, hmûsit el ding hi an lo ni nawh. Pâhai hi fahra ei nî ding mi'n pumpeltirtu an nîna ringawta khawm hin châwimâwi an phû a nih. Vawisûn ang huna thiemna le nîna insâng tak ei nei theina khawm hi ei inrimna râ lo ni de sien khawm, a bul ṭantu chu pâhai tho an nih. Pâ boin nâu a um thei nawh.

Pâhai mawphurna hi a rik êm êm a, pâin a zir nawna in sûng chu nu le nâuin an tuor naw thei ngâi nawh. Pâhai hi in sûng hremhmuna inchangtir theitu an ni ang bawkin, Vân rama inchangtir theitu khawm an ni bawk. Pâhai zir naw leia in sûng hremhmuna khawsa mêk hi ei tam ta êm êm a nih. Nâu fahra le hmeithâi siemtû chu pâhai tho hi an nih. Chuleiin Pathien laka an mawphurna hi rik tak a nih. Nâuhai laka an mâw hi Pathienin ṭhîn hun a la nei ding a nih. Mihriem thisen man phûta an um huna chu annî thisen leh inthleng hung ngâi ta'ng a t'a, chu chu tuor lovin hremhmunah an la liempui ding a nih.

Mihriem taksa bungah lû hi a pawimâw tak, a khâwlpui anga taksa bung po po thununtû a nî ang hin, Pâhai hi in khata a lû tak an nî leiin, an dam naw chun in sûng khawm a dam thei ngâi naw a, a tâwpah a la kawi dar hlak. Chuleiin in sûng damna ding chun pâhai an dam phawt a ngâi a nih.

Pâhaiin ei mâwphurna rikzie hi a tharin hrie'ng ei tîu a, chu chun nungchang uluk a lo ṭûlzie hi tû infûi khawm ngâi ta nâwm ei ni a, thil ṭha lampui chu mit sîm pum khawmin hraw ṭhel ta bawk nâwm ei nih.

*Tiemtû po po in rêngin Father's day chibai ditsak takin ka bûk chêu.*