FÂK LE DÂWN LE SILFÊN NÊKA THUPUI LEM

 FÂK LE DÂWN LÊ SILFÊN NÊKA THUPUI LEM

*Fâk ding nêkin hringna a thupui lem a nih, silfên nêk khawmin taksa a thupui lem bawk.*

~Luka 12 : 23

Mihriemin ngâi thupui zâwng hi ei nei seng a, ei ngâi thupui zâwnghai ruok chu inang naw seng a tih. 

A ṭhenin thuomhnaw tieng an ngâi thupui a, a ṭhenin fâk le dâwn tieng. A ṭhenin khawvêl tienga hâusakna dâm an ngâi thupui a, a ṭhenin thlarâu tienga hâusakna. Chuong ang chun ei ngâi thupui zâwnghai a'n ang naw seng a nih. Amiruokchu mihriemin chî ei thê ang dungzui peiin a râ ei sîk hlak ang hin, ei thil ngâi thupui zâwnghai hin ei nunah nghâwng a se zâwng le a ṭha zâwngin an la nei ngêi hlak. 

Nungchang nêka puo tieng mâwina ngâi thupuitu chun lemchang nun a'n chûk a, Pathien mitmei nêkin mihriem mitmei a vêng lem a, thil ṭha hrim a ngâituo ngâi nawh. Mihriem mitmei chau vêngtu chun mihriem hmû naw lâi ieng suol thaw khawm a pawisa naw a, zân thim hnuoia lem chu a tâ dingin iengkim thaw a thieng. Pathien laka inlang mâwi nêkin mihriem laka inlang mâwi a nuom a, a mâwi theina dingin a thiem thei ang tâwpa lemchang a hung ṭûl ta hlak a nih. Chu chu Farisai mizie Pathienin a itheida tâwp el chu a nih.

Ngâi thupui ding tak hi ngâi pawimaw lovin, hrisêlna tieng nêkin fâk le dâwn le thuom tieng dâm ei ngâi pawimaw lem a, ei ngâi hlut zâwnghai khawm hi thlarâu thil nêkin khawvêl tieng thil deu vawng hi a ni tah. Pawisain a'n châwk thei lo hrisêlna nêkin pawisaa inchâwk thei thil hieng fâk le dâwn le thuom le pâr dâm ei ngâi pawimaw lem a, chûleiin hâusa tak tak thuom mâwi em em el, sienkhawm natna ṭibaium tak tak pâi hi ei tam ta hrim a nih. In ropui tak le motor man to tak tak neia accident râpthlâk tak tuok dâm, thuom mâwi tak sî nungchang pawrche tak sî dâm, kohran le khawtlânga sin thaw hlâwk em em el, sienkhawm Pathien tâ dinga tlâktlâina nei dêr sî lo dâm hi ei ni tâwl tah.

Ei thil ngâi ropui zâwng hai hi ei nei hunah, mi sukropui nêkin an mi suosam nuom lem vieu hlak a nih. Tangka sum ngâi ropuitu chun a tangka sum chu a tâwpah ama rawktu vêkah a la'n changtir hlak. Mihriem ngâi ropuitu chun a tâwpah a mi ngâi ropui chu ngâi nêp hun dâm a la hung nei hlak. Pathien nêka mihriem rawngbâwl hlaktu chun a tâwpah mihriem sietna rawng a la bâwl hlak. Thlarâu bu nêka taksa bu ngâinatu chun tûr ang hlawla a ngâinat naw hun dâm a la hung tlung a, Pathien nêka mihriema ringna innghat hlaktu chu a tâwpah ring tlâk lo, mi hlêm hmanga dâm an la'n changpêk hlak.

Silfên le fâk le dâwn thil nêkin hringna hi a hlu lem a, taksa hringna nêkin thlarâu hringna hi a la hlu lem bawk. Hrisêlna hi ngâi hlut ding a ni lâi zingin, thlarâu damna hi ngâi pawimaw lem ding  a nih. Mihriem hringna hi chu sûm sâwt naw te ang chaua bo nâwk el ding a ni a, thlarâu hringna ruok chu chatuon dai thil a nî leiin inhlut le ngâi ropui hle ding a nih.

 Mihriem hringna hi tâwi te chau a nî leiin, lo awngrawpin rimsikna lo tuor hlak inla khawm, ngai mâw bêk bêk lova lungâwi taka tuor fan fan ding hi ei nih. Thî hma tâwi te, thî hnung ruok chu chatuon a nih. Chûleiin chatuon rama tâwpna le thîna um ta nawna hmuna ei lêng phâta a'n hawi dingzie hi ngâituoin, chu ngêi chu ei inhnêmna le mi sukhlimtu, hmâ tieng pan ṭâl ṭâl dinga kuta mi hûitu le châu châng nia hrâtna thahrui mi petu ni mawl zing raw se.

*Lalpa'n a thû mal mi sâwmpêk raw se.*