CHANCHIN ṬHA HRIL HI MANI IN SÛNGA ṬAN KHER DING A NI AM?
CHANCHIN ṬHA HRIL HI MANI IN SÛNGA ṬAN KHER DING A NI AM?
*"...Khawvêl po poa fe unla, thil siem tinrêng kuoma chun chanchin ṭha hi hril ro..."*
(Marka 16 : 15)
Mi tam tak chun chanchin ṭha hril hi mani in sûnga ṭan hmasak kher kher dingah an ngâi a. Chûleiin mani in sûng sukfel hmasa loa ram thim le puo tieng invawi mî chu a thaw ding thaw loah ei ruot a, bâu ṭhuona takah ei hmang hlak.
Chanchin ṭha hril hi mani in sûnga a'n ṭan hmasa tak ding a nih tî ziek khaw lâi lekha zieka khawm ei la hmu ngâi nawh. A ni ngêi, manî in sûnga inṭan phawt ding chu a nih. Amiruokchu ei Pathien hi *"Alpha le Omega"* a bul le a tâwp a ni a, inṭanna le tâwpna bîk khawm nei lo a nî ang bawkin, chanchin ṭha hril khawm hi inṭanna le tâwpna bîk a nei naw a. Puo tienga khawm ṭan a, mani in sûnga tâwp thei khawm a ni bawk. Mani in sûnga inṭan kher kher ding tî ziek a um nawh.
Ei Pathien hin Ama ring le a thû zâwm dingin tû khawm hi a mi phût lui naw a, dit thlangna a mi pêk a nih. Chûleiin mani in sûngah thei tâwpin chanchin ṭha ei khêkpui a, ei invawipuihaiin mamawna (thlarâua phîngṭâm le dangchârna) an nei sî naw chun, tû khawm hi inba lui thei an ni chuong nawh.
Phîngṭâm le dangchâra inrûm tlawk tlawk um zing a, a mamaw lo lem hai chau an fâk le dâwn ding ei pêk bîk el chu a suolthlâk deu naw ding maw? Chuong ang chun thlarâua phîngṭâm le dangchâra inrûm vawng vawng puo tieng tiem sêng lo um zing lâi a, mani in sûng khur bâk khêl thei lo rawngbâwltû ei ni chun Pathienin iengtin am mi ngâi a t'a?
Ṭhenkhatin rawngbâwltuhai dêusawnaa an hmang ka hriet rawp chu, *"Mani in sûng ram thim invawisan"* tî ṭawngbâu hi a nih. Invawisan khawm a pawina a um dêr nawh; ṭhat nuom lo na ná nà chu ram thim theinghil ṭhaka dam sûnga tung ngha ngat ngatna ding thû um nghâl lo chu. Puo tieng mî, thlarâua phîngṭâm le dangchâr ngâwi ngâwia umhai, mani in sûng mâksana va châwm le va sukkhawp chu Pathien thu le a'n kalna a um nawh.
Ei Bible-a ngêi khawm, *"Mî tû khawm mani nuhmei amani, pasal amani annâwleh nâuhai mâksana mi zui nawtu chu ka mî ni tlâk an' nawh"* tî ziek ei hmu kha. Tîrko rawngbâwlna hring tak tak nei, Pathienin a hmang, sienkhawm nâu inrui chîng nei hi hril ding an tam. Chuonghai chun mani nâuhai ngawr ngawr invawipuiin, ram thim le manî kâwl le kienga thlarâua phîngṭâm le dangchâra inrûmhai theinghil ṭhakin mani in sûng chau awp lum tum ngur el ta hai sien, tu'n am chanchin ṭha hril ta'ng a t'a?
Mani in sûng tlânsan ngama rawngtû chu Pathien khawmin a in sûng tlânsan bîk naw nih. Mani in sûng chau invawipui a, mi dang puo tieng mî invawipuina châng hre dêr lo mî chu rawngbâwltu hmasiel a nih. Fâk ding nei lo kutdaw pakhatin a phîngṭâmin fâk ding bû mi hung ngên sien, *"Ka nâuhai tâ ding a nih"* tipêk tlat inla, ei nâuhai hlakin dû dêr bawk sî lovin hnuoia thê thâng mei mei el ta hai sien, Pathien lung suksen ngawt ei tih. Chuong ang tho chu a nih thlarâu ram khawm. Pathien thua phîngṭâm le dangchâr um zing a, mani sûnghai chau ei invawipui ngur chun ei rawngbâwlna a hlawsam let dêr tîna ni'ng a tih.
Ei Pathien thua hin inphût luina thû a um naw a, a mamaw mawhai tâ ding chaua dit thlangna ram a nih. Amiruokchu mamaw loa inhrehai khawm thei tâwp suoa invawipui ding chu an nih. Ensan ding ei tîna lem chu a ni dêr nawh. An bulah Pathien thû hrilin ei chên chil zing thei naw a ni khawmin, ṭawngṭâinaa ruok chu inthla lo ding an nih.
Chanchin ṭha hi ditsak bîk nei loa chû hnam khâ hnam ti loa inruol rawnga sem dar ding hi ei nih. Pathien ram chu pêk pung thil a ni a, luong suok ei t'a, chu chun ei in sûnga khawm malsâwmna a hung luong lût ve ding a nih.
*Lalpa'n a thû mâwl tea ei suklanghai chu ṭûl le ṭha a tî ang takin mal mi sâwmpêk raw se.*