BEISEINA LE ṬAWNGṬÂI
BEISEINA LE ṬAWNGṬÂI
*Beiseina chun suklâwm sien la chêu, sukdûdâna chu sel takin tuor unla, ieng lâi khawmin ṭawngṭâi ro.*
(Rom 12 : 12)
Thuvar pakhatin, *"Beiseina nei nawtu chu meng kur sia thî a nih"* a lo ti a. A ni tak zet el, mihriem beiseina nei ta lo chu mithi ang a ni a, mi dama inngâi sien la khawm, milim châng thei ang tho an' ta tîna a nih.
Beiseina nei nawtu chun thî chau a nghâk a, a thî nî chu chatuona dinga a rimsik inṭanna nî a ni ding a nih. Manî inthat a tam lem hai hi chu an hringnunah beiseina nei ta lo an nih. An tâ dingin thî chau hi hâdamna um sun a nî tâk leiin, khawvêl rinumna tlânsan tumin manî hringna hiel an suktâwp ta hlak a nih.
Beiseina hi hmâ tieng pan ṭâl ṭâl dinga mi keiṭhuoitu kut ringum le hrât a ni a, ngîr thei ta lo khawpa ngûi le châua ei tlep el lâi khawma hrât taka tum ram mi ṭhuoi tlungtu a nih.
Beiseina hi mitin a hmû thei lo le a hmû phâk lo khawm a hmuin a dâi phâk a, lungril ngâituonain a hisâp phâk lo khawm a ban phâk vawng a nih. Mitin a hmû phâk lo beiseina mitin Vân ram a mi'n thlîrtir a, Aigupta sala intâng Israel-haiin Kanân ram ngâia an inrûm vawng vawng angin, einî ringtuhai khawmin Vân ram chu ngâiin, hî khawvêl rinum taka hin ei inrûm nî tin el a nih.
Zâwlneihai hmanin Isu la pieng lo hman hun sâwt taka inthawkin khawvêl sandamtû ni dinga a hung pieng ding hi an lo beisei lâwk a. A pieng ta hnung, ei âia thia tho nâwk dai ta lem chu ieng leiin am beisei naw thei ei t'a? Sel taka tuor a, ma loa ṭawngṭâi fan fan dinga infûi ei nih. Ei ṭawngṭâina râ ei zuk hmu el naw khawmin, tâwpsan ding hi ei ni naw hrim hrim. Tlung inhnûk châng um a t'a, tlung inhmat châng khawm a nei bawk ding a nih.
Nisa chu sûm zîng leiin inlang intak deu sien la khawm, suok lovin a um sawng chuong naw ang hin, ei ṭawngṭâina râ hi hmu intak deu inla khawm, ei hmu naw sawng ding tîna a ni nawh. Lazar damnaw sûng po po khan Isu hmêl kha a'n lang naw a, a thî hnung ni lî lâi zet liem ta hnungin a hung inlang chau a ni kha. Abraham kha a thlahai ârasi zât zet an la pung ding thû Pathienin a tiem hnungin, a nuhmei Sari kha kum 90 zet nâu nei thei lovin a ching a ni kha. A tar hnungin Pathien thu tiem a takin a tlung chau a nih. Pathien tâ dingin inhnûk a um nawh.
Isu'n mitdel, zeng le kebâi a sukdamhai kha ei hei ngâituo a, nâupang hriet ding an vâng. Puitling ngawt an ni kha. Chû umzie chu, an pieng tîra inthawka khânga um sa rêng an nih tî chu a chieng. An nâupang hun sûng le an ṭhat vânglâi po po rimsik tuor an nih tî a chieng hle. An' le nang le keiin natna kum hni kum thum vêl chau dâm ei tuor a, ei damna dingin ei ṭawngṭâi a; a dawnna ei zuk hmu nghâl naw lei elin ei beisei ei sukbo a, Pathien lakah ei ning-in-nuor nghâl el dâm hi chu a la'n hma taluo deu naw mawh? Thei hrisêl chu a khâta a ṭil ta chun a hmin tah tîna a ni hlak. Amiruokchu, a la hmin lo hai chu ṭil lovin a kûngah an inkhâi sawng bîk chuong nawh. Hmin hun le ṭil hun an la nei tho hlak. Chuong ang chun, mi ṭhenkhat ṭawngṭâina dawnin lo um hmasa sien la khawm, dawna la um lo hai chu an ṭawngṭâina a hlawsam tîna ni dêr lo a nih. Thei ṭil tekhinnaa ei zuk hmang ang khan, an lo hmin hmasa leia lo ṭil hmasa mei mei chau lem an nih.
Chuleiin beiseina suktâwp lovin ma bawk lovin ṭawngṭâi ei tîu va, a hun takah ei la hmu tho ding a nih. Pathien ngâia chu inhnu deu khawm a hun tak a ni thei a, a'n hma met khawm chu tho chu. Pathien tî hun hun kha a hun tak chu a ni el.
Chûleiin, ei ṭawngṭâinahai hi dawnin a la zuk um el naw a lo ni khawmin, ei beiseina hi suktâwp el ding an' nawh. Pathien thu tiem a tlung pha chu, tû dang ruol lovin thlasik anga inkhêl lovin a la hung tlung ngêi ding a nih. Beisei takin nghâk ei tîu va, tuor fan fan ei tîu.
*Lalpa'n a thû mal mi sâwmpêk raw se.*