*HRIPUI (COVID-19) INLÊNG VÊL KÂRA MALSAWMNA*
*Lawm rawp unla, ma lovin ṭawngṭâi unla, iengkimah lawmthu hril rawp ro...*
~ 1Thessalonika 5 : 16,17&18
Hi article (sermon) hi facebook-ah ka lo post ta sa a ni a, Hmasawnna Thar-a hei insuo nâwk khawm chu ka hmâi sanain a ngam lul naw a. Mîhaiin insuklâr tumna lei dâmah mi ngâi pal râwi an tih tî ka'n lâu a; chu el khêlah hî insuotu inzâum tak hai mitmei vêng naw thei a ni bawk nawh. An dâi ka lo nêr siet met a ni khawmin, ka thu le hla ni lovin, cham le cham loa hnung tienga inthawka dang ruol loa mi nam lût luitu an um lei a ni tî mi lo hrepêk hai sien ka nuom el chau khawm ni lovin ka ngên tak meu meu a nih.
Mî mitmei vêngna leiin iengti kawng zâwng khawmin Hmasawnna Thar-a insuo hi ka tum naw hrim hrim a, ka lo ngaituo phâk bawk nawh. Chuong lâia zinga chun mi inzâum taka inthawkin hî ka article ziek hi Hmasawnna Thar-a insuo dinga ngênna ka dawng a. Phone them thei/ngai lo mi tam takin an lo tiem theia ding tîin an mi ngên ṭâl a. A remchâng naw thu ka hril khum hnung khawmin a tlâwm lemah ka ṭhang ta tho a. Ka thu le hla khawm ni lovin le ni naw hran em em chuong bawk si lovin, Hmasawnna Thar-ah inchuonin a lo um pha ta a nih.
A lo tiem ta sa haiin mi lo hrethiem inla ka hei nuom a. In mi hrietthiem ding tî ka hriet sa a nî leiin lawmthu ka lo hril lâwk a, a mi hrethiem lo hai chunga ruok chu lawm naw thu hril ṭûlin ka hriet chuong naw a, a ṭûl khawmin ngâi da'l raw se. Khing tiengpanga chu, chanchin ṭha hi khawvêl po poa the dar dinga infûi ei ni hrim a, chû kawnga chun tû laka khawm thiem ka'n chang zân a nih.
Aw leh, chu tieng chu lo hun ta sien la. Kum 2020 hi mi tam takin vângduoi kuma ei ruot a; a se zâwnga Corona hripui nghâwng tieng ngur ngur ngaituo chun thil âwm naw lem chu a ni naw hrim.
Amiruokchu thlîrna tukver dang danga inthawka thlîr chun kum 2020 hi kum 5 sûng deu thawa ruo tui ei dawng ṭhat kum tak niin ka hriet, ka lo sui dânin. Ka hriet suol a lo ni pal hlau khawmin, suol lien talaw lâwm lâwm naw nih.
Ruo tui ei dawng ṭhat leiin, lockdown e ti lo chun a lockdown lem ku hi ei lockdown khum lem naw chau niin a'n lang. Thlâi hna hlak hlo hna tam takin a tam a, theihâi hlak chu fâk thei lo ra taka rain, a kûngin tlûkpui vâng khawpin a râ kûr ngêi nguoi a. Leilet tieng ei hei en nâwk a, kum danga thlalêr ram ang deu thawa ṭâwl kak ber bur el hlak kha, bu kûng hring dupin a lo inkhum zo a. Kum danga ruo tui tlâksam leia lampuihai khu chui chui el hlak kha, hnâwng dei dupin a lo um ta a. Tui insil insâwpna ding le fâk le dâwn ding hlak ei hnienghnâr. Ei nghatna tieng tieng lawmna ding ruok lawmna ding ruok a nih.
Kawtthlêr ei hei fang a, hmeruo zawrna ngawtin a lo inchang nawk a, kum dang nêk daiin bu le bâl ei hnienghnâr lem dai a nih. Lockdown hung inṭan hlim lai dâm khan, hmeruo khawm a vâng ding niin ei inhril ṭî rak a. Kan panthlanga khanghmuk kûng chîte um kha ka lo uongpui rak rak a, hlak chu e, inzak a um ta bâk el. A hlutna a bo zo tah. Bazar-ah hlohna nêka tam hman hman inman deu deua hmu ding inchâwk sêng lo hme ding a lo tam taluo annâwm. Pathien malsawmna hi ei thaw suok le inphu lovin inzak um khawpa nasain, a talaw deu thawin ei dawng a nih. Pathien kuoma lawmthu hi hril hril el ding ei nih. Hril nachâng hre lo hai khawmin nuor inpheng ruok chu thaw lo tawp ding. A chî nawh, a mawi nawh, a'n vêtthlâk.
Covid-19 hripuiin khawvêl mihriem a nuoia tiem a lem zo ta lai a, ei fel lei le ei ṭhat lei khawm ni bîk dêr loa hi hrî leia thi pakhat khawm hriet ding ei la um da'l hi chu a mak el chau khawm ni lovin a ropui a nih. A lâwmum khêl tieng dai a nih. Tiena Mosie'n dâr rûl a khaikâng laia a en nuom naw pawla ṭhang am an nih tî ding khawpin ram ropui le changkâng kângin an thîpui ṭuk ṭuk a, einihai ruok chu Bethesda tui fâwna va'n châwm lût ang hlawlin ei dampui ṭuk ṭuk nâwk si. A ṭhen chu hritlâng khawsik nêk hmanin an dam inrang a; Corona hripui hin a mi lel deu khawm ni sien a hawi hiel el. Amiruokchu Covid-19 chunga thu neitu Pathien hring iengkim thaw thei neituhai ei ni leiin, chû huolhimna zâr zo hai ei nî lei a nih.
Covid-19 leiin khawvel mihriem a nuoi têl chu mani sûng le kuohai hmu le enkawl phâk lovin natna khumah an zâl thlek thluk a, ṭâ phâk lo le mitthli far khat khawm hlaw phâk lovin muol an liem a. Einihai ruok chu natna khumah ei um khawmin, mi bâwisawmtu le mi hnêmtu ding ei la nei a; thîna ei tuok khawmin dit tâwkin ei inṭâ khum thei a, a lungawithlâk hle a nih.
Chûleiin ei nat khawmin lawmthu hrilna ding ei nei a, thîna ei tuok khawmin lawmthu hril Pathien laka ei bat zing tho a nih. Covid-19 hripui nghâwng ṭha lo tieng ngur ngur hi ngaituo tum naw'ng ei tîu a, zân thim ngur ngur hi ngaituo lovin, thla var le ârasihai hi thlîr lem ei tîu. Tui inhnawk but but chau hi en lovin, a sûnga chêng nga le thil hringhai hi ngaituo lem ei tîu. A tui sie le inhnawk kha ei fâk ding an' naw a, a sûnga chêng nga le thil dang danghai kha an ni lem. Vân innîm ngawt thlîr lovin, hnuoia chênghai tâ dinga ruo tui malsawmna ei dawnghai hi ngaituo lem hlak ei tîu.
Ei hmu thei nazawng hi ei them phâk kher chuong naw a, ei them phâk taphawt hi ei fâk phâk vawng chuong bawk nawh. Mitdel khawmin a thil hmu phâk lo chu a themin a fâk phâk a, lâwn thei lo (zeng) khawmin a ke hmang lovin a nuomna hmun hmunah a fe thei tho, a kein lungrila a thil tum ieng khawm a dâl chuong nawh. Ei hrâtna hi mi dawm sângtu an' naw a, ei hrât nawna hi mi vaw hnuoitu a ni bawk nawh. Inngai sâng bêk bêk ding hi ei ni naw ang bawkin inngai hnuoi bêk bêk ding hi ei ni bawk nawh. Kristaa chun ei hrâtna khawm che thei loa khuokhirin a um a, ei hrât nawna khawm iengkim thaw theia sukhrâtin a um bawk.Lalpaa hin lawm ding ei ni a, lawm rawp ding hi ei nih.
Lalpa'n a thu mâwl tea ei hrilhai chu ṭûl le ṭha a tî ang takin mal mi sawmpêk raw se.