ACCIDENT INRIK TAK TUORNA LE INZAWMA KA TESTIMONY

*ACCIDENT INRIK TAK KA TUOKNA LE INZAWMA KA TESTIMONY.*

Mi tam takin accident/tuok siet inrik tak an tuoka inthawkin Pathien le dâm an intuok pha rawp hlak a, testimony ropui tak tak khawm an dawng pha hiel hlak bawk. Kei ngêi khawm hi chuong ang mîhai lâia tiem sain ka lo um ve ta a nih.

Group hran hran iemani zât vêlah ka testimony hi ka lo post ta a.Tiemtu ṭhenkhatin insuo nâwk dinga an mi ngênna zâr le Pathien ropui nâwk zuolna dingin a hma nêka kim lemin ka hung post nawk a nih. A la tiem lo khawm tam tak an la um a, mi tlâwm te bêkin an lo ṭangkâipui tâkin ti beiseina lei khawm a ni bawk.

Mi ṭhenkhat tâ ding chun lo nêp hle sien khawm, kei ka tâ ding chun a ropuiin a nêp naw hle, nêp khawm ka ti phal nawh, Pathien ropuizie mi'n hmutirtu a ni si a.

Aw leh, thil dangah pêt sei lovin hei ṭan nghâl el ka tih.

Kum 2016 august thla khan SSC (CPO) conduct-na hnuoia mî, SI physical test nei dingin beiseina lien tak neiin Guwahati tieng panin ka'n thawk suok a.

Sienkhawm mihriem beiseina chu Pathien remruotna ṭhang lo chun thil tlâwn el a lo nizie hrechiengtu ni dingin Pathienin ka chungah programme mak tak a hung rêl/siem ta a nih.

Physical test chu kan hei nei ṭan ta a, vângduoithlak takin tî di'm Pathienin a ropuizie  mi'n hmutir a nuom lei (kei chun a ropuizie min hmutir a nuom lei ka ring), high jump kan thawnaa chun châng suolin ka rîng ka nawl tliek pal hlau el ta a. Chu dârkâr la la chun kâr lovin châng thei ta lovin ka hei um chawpchil ta nghâl a, ka sense/feeling khawm chû ruol chun a bo ve ta vawng a. Thi ngei dinga inringna ka nei ta a. Amiruokelchu ka dam khawsuok theina dinga lampui hung inhawng ni âwm hrimin ka khaw hrietna chu a bo chuong naw a, chu khawhrietna chun inthuok thei ta loa ka um thu chu doctor-hai kuomah a mi la'n hriltir thei hrâm a. Oxygen mi pein ka hringna chu samzâi tiet chauva inkhâi nêng nêngin a mi la chel tâng thei hrâm hrâm a.

CT-scan le X-ray kan hei lâk chun ring nêk daiin ka lo serious vieu el a, ka spinal cord c4&c5 a lo tâwk siet hi a lo ni a. Chu thu ka hriet chun a mi sukthlaphâng hle nghe nghe a. Ṭhangpuitu ding Pathien ka ko vêl ruoi a. Operation-in ka hei um a. Dam suok dinga mi ring khawm an um ta naw hiel a, ka laka an beiseina khawm a tâwp vawng a. Lo dam suok te rêng lang khawm mihriem pângngaia ka suok nâwk hi a ring an vâng hle. Chu chu doctor-hai ngaidân khawm a lo ni tah.

Ka khawvêl hi a tâwp rawng rawng a. Ka ta dingin vanpui hi a chim tak meu meu a nih.

Chuonga beidawng taka ka um laiin, ka sangpa phone hi a hung inri ral ral a, a zuk lâk chun tû dang ni lovin, a ruolpa Meitei christien kha lo niin ka chanchin a lo hriet thu le a mi ṭawngṭaipêk nuom thu hi a hung hril a. Kei khawm chun ka lo beisei ve êm êm a. A hril ang chun sâwt naw te hnung chun a hung tlung ta nghâl a, a mi hei ṭawngṭaipêk ta a lungril le titak zetin. A hei ṭawngṭai zo chun kârlovin ka ke invûng lel lul kha a lo ṭîm ta vawng a. Lawmum ka tiin mak khawm ka ti hle a. Ama kuoma le Pathien kuomah lawmthu kan hril mawl mawl a. Amiruokelchu ka la châng thei chuong nawh.

Hospital-a um um ringawt el khan umzie a nei naw thu le insêng râwnna mei mei a nizie an mi hril hnung chun Guwahati-a ka patehai in tieng kan insawn dawk ta a. Ka la'n rik hle a,wheel chair hmang hi thî rina ka lo rin kha a ṭhung tak ngiel khawm ka la thei naw ni chuh. A mangangthlâk ngei!

Wheel chair a ka dam sûng hun po po hmang thei ding ngîrhmuna ka hei um meu chu, dam hrim thlâkhlâna ka nei ta naw a. Ka lungril sâwl luot lei chun ka taksa khawmin a tuor nasa pha hle a.

Chuonga beidawng taka ka um lai chun, nupui pakhat hi ka patehai ina ka umnaa chun a hung lêng a. Ka chanchin a mi'n dawn a, ka hei hril chun  lungriemin a thlâk a, a mi lainat êm lei chun a mittui khawm chu a tla ta hiel nghe nghe a. Ṭawngṭai dam thei ni naw sien khawm ṭawngṭai an langpêk tlat a. Pathien zârin a hma nêka ka la hung hrât nâwk ngei ding thu le ka la dam ngei ngei ding thu'n a mi thlamuon zo chun a hei ṭawngṭai ta nghâl a. Kei khawm chun a ṭawngṭaina chu ka ringzo ve hle a. Chu ringna chu damnaah a lo inchang pha ta a nih.

  A ṭawngṭai lai tak chun ka kutpâr phar thei ta loa ka fuon el ta kha, a khâtin a hung phar ta dier dier a. Mak tinain ka sip a, ka mang hiel khawm ka sâwn rum rum a. A mi them chângtu an um raw'm sâwnin hmu tumin ka meng zawk nghe nghe a nih. Ka ke chang tiengpang khawm chu Pathien ropuina dingin a lo châng thei ve nâwk ta peia a tûka chun. Pathien thilmak thaw ka mit ngeia ka hmu phutna a ni leiin awi khawm harsa ka ti hiel a, anâchu a tak ngei mi mi hrila ka hriet khawm ni lo, ka mit ngeia ka hmu le ka chunga thil tlung a ni mieu si a. Ringhlel thei ding ruol hi kan' nawh. Chu nêk hmanin Pathiena ka ringna mi sukhrâtpêktuah a lo inchang lem ta hlau a nih.

Nî hai inher liemin a thla hiel a hung invawi hnung khawm chun ka ke vawi tiengpanga ding chun damna thu ieng khawm a la hung hersuokpui chuong naw a. A zeng angin ka vawi tieng ke chu a la châng thei naw zing a. Amiruokelchu hi natna hi a khawhnunga ka sûnghai tâ dinga hmangruo pawimaw takah a la hung inchang ding leia zuk dam el loa Pathienin a mi la tosan hri phawt hi a lo n'a. Ei Pathien biek hi inhmaw lo le muongchâng bawk lo, a hun taka che hlak mî Pathien a ni si a. Iengkim hi a san neia a lo induong lâwk sa vawng  a nizie chu hi ka testimony hin a la hung hril pei ding a nih.

Guwahati-a ka patehai ina inthawk chun kan khuo tieng pan ding chun lungril rik tak pumin kan hei insiem ta a. Doctor-hai chun la'n enkawl dam zet hnunga khuo/vêng tieng fe chau dinga an mi ti kha zâwm chuong lovin, Pathien ringsanin flight-a khawm chuong thei lovin bus sûnga chun zâl ngawtin kan khuo chu kan tlung thei ta a nih. A ropui hi ka ti bêk bêk el.

Ni khat chu tar pakhat hi kan inah hungin cancer-a na dâm phone a inthawkin a ṭawngṭaipêka damna an chang thu dâm mi hrilin kei khawm a mi ṭawngṭaipêk tum a, ka dam ngei ding thu a mi hril zo hnung chun a hei ṭawngṭai ta ngei a. A ṭawngṭai lai chun Pathien ropuizie le a thilmak thaw ka chungah a hung inlang nâwk ta a nih. Chuonga a ṭawngṭai lai tak chun, ka khûp hi a hung inza sur a, a sukin ka kepâr tieng a fe tla riei riei a, chuong chun ka kepâr a tlung charin chawplechilin ka ke chu a hung châng thei ta phut a.

Lâwmna mitthli chu dang ruol lovin ring lo kârin ka bienga chun a hung far tla ta  ṭuk ṭuk a. Pathien kuomah lawmthu kan hril ta mawl mawl a.

Ka sûnghai mit hmu ngeia Pathienin mi sukdam a lo nuom leia khâng chen Guwahati ka um sûnga ka vawi tieng ke hi la sukdam el loa a mi la tosan mei mei a lo ni lem tî ka hung hrietthiem ta a. Chu chun ka lâwmna a sukfamkim zuol a, lâwm dân chin tâwk khawm a mi'n neitir hlei thei naw letling lem hielin ka hriet.

Lâwn thei ta lo dinga wheel chair le dam sûnga ruolṭhaa inman el hmabâka inngai ta kha, Pathien hmangaina le lunginsietna zârin, chu chû ngîrhmun ditum lo tak el chu ka lo pumpel thei ta a nih. Lalpa ropui tak zing raw se.

Pathien thilmak thaw hi na hrietna ringawtin ka lo hriet ve hlak a; tû zet hin chu nuna changtu ka lo ni tah.

Tiemtu dit tak, ieng ang harsatna lo tuok hlak la che khawm, i beisei suktâwp el naw rawh. Pathien kuoma beisei le ringhla loa i hnî a ni phawt chun a pêk ngei ngei ding che a nih tî hi ring ngam rawh. Beisei taka hni a, ring ngamtuhai chun Pathien thilmak thaw hi an hmu ngei hlak si a.

*Lalpa'n ka testimony tlâwm tak hmang hin, tiemtuhai lungrilah sin thaw mawl raw se.*